II Malunda 23 - O Mikanda Ikola

Jouaji a mu unda ku usobha ua Juda, kuala nganga (ia Nzambi) Joiada

¹ O ku tula ku muvu ua kasambuadi, Joiada u sunga nguzu, anga u ta kikutu ni atumini a jihama, ene a Azadiia, monʼa Jolá, ni Ijimaiele, monʼa Nzuanana, ni Azadiia, monʼa Obede, ni Mahaseia, monʼa Adaia, ni Elizafate, monʼa Xikidi.

² Eneʼâ anga a kondoloka Juda, hé a bhongolola o jinganga jala mu jimbonge joso ja Juda ni ió o mítue ia jitata mua Izalaiele, anga eza mu Jeluzaleme.

³ O kionge kioso kieneʼokio anga a ta kikutu ni sobha mʼonzo ia Nzambi. Joiada anga ua ambela, uixi: Talenu, o kiki monʼa sobha ua-nda kuhinga ungana, kala kia tanga Jihova ku anʼa Davidi.

⁴ O kima ki mua-nda kubhanga, kienʼiki: Mbandu imoxi ia jinganga ni jilevita, ene mu ku bokona jinga mu sabhalu, à kala alangidi a mabhitu.

⁵ Mbandu ia mukuá a kà kala monzo ia sobha; o mbandu ia katatu ia kà kala bhu Dibhitu dia Dixikikilu; O kifuẋi kioso kia kà kala mu malumbu ma inzu ia Jihova.

⁶ Maji-phe ki bhu kale muthu u bokona mʼonzo ia Jihova, kikale ngó o jinganga ni jilevita akua kubhanga ukunji; iá a tena kubokona mbata athu a kôla; maji o athu oso a kà kumbidila o kijila kia Jihova.

⁷ O jilevita a kà kondoloka sobha a kà mu ta mu kaẋi, o muthu ni muthu ni mata mê bhu maku; uoso-uoso u bokona monzo a kà mu jibha; maji enu-phe mua kà kala ni sobha, kioso kia tunda ni kioso kia bokona.

⁸ Ni jilevita ni Juda ioso a bhange muene kala kioso kia a tendelela Joiada, o nganga; ià a zangula muene muthu ni athuʼê, ku tale iá a bokona mu sabhalu, uixi iá a tunda mu sabhalu, kuma nganga Joiada o ibuka ka i muangene luua.

⁹ Joiada, o nganga, ua bhana ue ku atumini a jihâma o matoma ni jingubu ja makota ni jingubu jʼòfele ja tokalele sobha Davidi, ja kexile mʼonzo ia Nzambi.

¹⁰ Iú ua zeleka mundu uoso kia mbote, muthu ni mata mê bhu maku, tunde ku mbandu ia Kalatódio ni ku mbandu ia inzu, sobha a mu kondoloka.

¹¹ Anga a katula-phe kiá o monʼa sobha, a mu bheka bhu kanga, hé a mu ta o kitundu ku mútue; a mu bhana umbangi inga a mu bhanga sobha. O Joiada ni anʼê, a mʼundu, anga ela: Sobha, a tunge a some!

¹² Ataliia-phe kioso kiʼevu o kudikola kua kifuẋi, ala kulenga kuia mu kuximana sobha, uiza ku kifuẋi mʼonzo ia Jihova,

¹³ anga u kengelela, u mona sobha iú muene bhu mbandu ia philadi ia zukama na-iu muene, bhu muelu, o atumini ni akua jikoloneta ala bhu mbandu ia sobha; o mundu uoso mu ixi a sanguluka anga a kala mu kuxika ku ima iâ ia kuxikila o mimbu, mbé o kuijidisa kuila kia fuamene o kuimbila diximanu; bheneʼobho Ataliia u tandula o izuatu iê anga u dikola, uexi: Usuéia, enu malʼé! Usuéia, enu malʼé!

¹⁴ Maji o nganga Joiada, u katula jikabhitangu a a tele mu kutumina o kifuẋi kia masoladi anga u tunda na-u bhu kanga, u a ambela, uixi: Mu katudienu muie-nê kuema dia kilômbo, uoso-uoso u sota ku mu kaiela muene, mu jibhienu ni xibhata; kuma nganga ua ambelele, kuila: Kana ku mu jibhila mʼonzo ia Jihova.

¹⁵ Ene hé a mu ta maku, muene-phe ua di tela ia dibokuenu dia jikabalu, uia mʼonzo ia sobha; ene anga a mu jibhila mueneʼomo.

Joiada u ta kikutu ni kifuẋi

¹⁶ Joiada anga u ta kikutu bhu kaii kê-muène ni kifuẋi ni sobha, kuila a kala mundu uangene ua Jihova.

¹⁷ Kia zubha ku ta kikutu, mundu uoso a bokona mʼonzo ia Bale anga dihamba a di bula-bula, a bula-bula ue jikalatódio jene.

¹⁸ O ima ia tokala kubhanga, mʼonzo ia Jihova, Joiada ua i te mu ididi iê, bhoxi dia lukuaku lua jinganga, o jilevita, a a solele kuala Davidi phala ukunji ua inzu ia Jihova, nʼende ni ku bhana o maujitu ma kubhakula ni túbhia kua Jihova, ni kusanguluka ni kuimba, kala kia ki soneka mu kitumu kia Mozé kala kia ki longo ue Davidi.

¹⁹ Anga u ta alangidi a mabhitu, bhu mielu ia inzu ia Jihova, phala ki mu bokone muthu ua di kasanesa ni kima kioso-kioso kia bolo.

²⁰ Hé a katula jikabhitangu, ni makota ma jinganga, ni ió a tumina mu kaẋi ka mundu, ni mundu uoso a tokala mu ixi, anga endesa sobha mu kutunda mʼonzo ia Jihova, hé a bokuena bhu muelu ua dikota, mʼonzo ia sobha, anga a xikamesa sobha ku kiandu kia ungana.

²¹ Akuaʼxi ene oso anga a sanguluka; o mbonge i kala ni kutululuka tunde kia jibha Ataliia ku xibhata.