II Malunda 22 - O Mikanda Ikola

Akaziia u hinga ungana maji-phe a mu jibha kuala Jehu

¹ Ià oso a tungu mu Jeluzaleme, anga a ta Akaziia ku usobha, monʼê ua kasule, bhu kididi kiê, mukonda o anʼa makota oso, a a jibhile kuala o masoladi ejiie ni akua Alábia bhu kibangu; kienhiki Akaziia, monʼa Jolá, kia hingi o ungana ua Juda.

² Ua kexile mu makuinhi a uana a mivu ni kiiadi, kioso kia mateka o kutumina, ua tumina muvu umoxi mu Jeluzaleme; o dijina dia mamʼâ, Ataliia, monʼa Holí.

³ Muenhú ue uende mu jinjila ja dibhata dia Akabe; mukonda o manhʼâ ua kexile, muene mukua ku mu bhana o kaiula, mu kubhanga ima ia ibha.

⁴ Anga u bhanga muene kia ibha ku mesu ma Jihova, kala akua dibhata dia Akabe, mukonda ene a kexile ku mu bhana o kaiula, kioso kia fu tatʼâ, phala o dibuikilu diê.

⁵ Muene ue uende mu phangu jâ iú uai kumoxi ni Jolá, monʼa Akabe, sobha ia Izalaiele, mu kubhâla ni Hazaiele, sobha ia Sídia, bhua zukama ni Lamote-Ngiliiade; Jolá anga a mu kuama kuala akua Sídia.

⁶ Muene anga u vutuka bhu Jizelele mu ku di tumba italakanha ia mu totela bhua zukama ni Lama, kioso kia kexe mu kúlua ni Hazaiele, sobha ia Sídia; anga Azadiia, monʼa Jolá, sobha ia Juda, u kulumuka mu kuhindula Jolá, monʼa Akabe, bhu Jizelele, mukonda ua kexile mu ku kata.

⁷ O kiki ue, kifua kia vondadi ia Nzambi muene, kia Akaziia kuiza mu kuhindula Jolá, mukonda muene kioso kieza, kiene ue Jolá kia tundu mu kubhânga ni Jehu, monʼa Nisi, a mu undu kuala Jihova phala kujimisa muene nzaká o dibhata dia Akabe.

⁸ Anga-phe ki bhita kiki: Kioso Jehu kia mu kumbidila o kizuelu kia Jihova kia tange ku dibhata dia Akabe, ua sange ue o ilamba ia Juda ni anʼa a jiphange ja Akaziia, a kexile mu kixibhidila Akaziia, anga ua jibha.

⁹ Anga u sota kiua Akaziia, (kuma muene ua suamene mu mbonge ia Samádia) anga a mu bonga, hé a mu bheka kua Jehu, anga a mu jibha, a mu funda, kuma, exi; Monʼa ngene a Jozafate, muthu ua sotele Jihova ni muẋima uê uoso ua muvimba. O mu dibhata dia Akaziia ki mua kexile dingi muthu u kala ni nguzu ia kutumina.

Sobha ia muhatu, Atalia mu Juda

¹⁰ O Ataliia, manhʼâ Akaziia, kioso ki a mono kuila monʼê a mu jibha, ua fundumuka iú ua jimisa o mbutu ioso ia sobha, mu dibhata dia sobha ia Juda.

¹¹ Maji-phe Jozabate, monʼa sobha, ua muhatu, ua kuata Jouaji, monʼa Akaziia, iu ua mu katula mu kaxi ka anʼa sobha a kexile mu ku a jibha, iu ua mu te kumoxi ni kilédi kiê, mu xilu dia kuzeka; kienʼiki Jozabate, monʼa sobha Jolá, muhatu ua nganga Joiada (kuma ua kexile phangʼia sobha Akaziia) ua mu sueka ku mesu ma Ataliia, iu ua subhuka muene, ka mu jibha.

¹² Anga u kala ni ene a mu sueka mʼonzo ia Nzambi mivu isamanu; Ataliia anga u kala mu kutumina mu ixi.