II Malunda 20 - O Mikanda Ikola

Jozafate a mu bhana o kutolola jinguma jê kuala Ngana Nzambi

¹ Anga ki bhita kuila, kia zubha kubhita ima iii, anʼa Mouabhi, ni anʼa Amone, kumoxi ni akua Amone a mukuá, eza mu kúlua ita ni Jozafate.

² Anga kuiza athu amoxi-mu ku ki ambela Jozafate, exi: Kú kuiza kifuẋi kia dikota, kia mu tunda ku sámbua dia kalunga ni ku ixi ia Sídia, a mu kuiza mu kúlua nʼeie; kiki-phe iá kiá bhu Hazazotamale, bhuʼela: Enjedi.

³ Bheneʼobho Jozafate uoma ua mu kuata, hé u di ta mu kusota Jihova, anga u tuma o kujila, mu Juda ioso.

⁴ Akua Juda oso hé a di bhongolola mu kubhinga dikuatekesu kua Jihova; o mu jimbonge joso ja Juda ue mua tundu athu eza mu kusota Jihova.

⁵ Jozafate anga uimana mu kaẋi ka kionge kia Juda ni kia Jeluzaleme, mʼonzo ia Jihova, bhua lulama ni lumbu lua ubhe,

⁶ anga uila, uixi: Àuá! Jihova, tata! Nzambi ia jitata jetu, kifua kʼeie muene u Nzambi mu diulu? Kʼeie muene u Mutumini ku thandu dia mautuminu moso ma akua jixi? O bhu lukuaku lué bhuene bhuala o nguzu ni kutena, ki kuala u tena kubhânga nʼEie.

⁷ Manhi, Eie u Nzambi ietu, akua ixi iii, a tungile-mu, Eie ku a kaiela kuengi, bhu pholo ia mundu ué ua Izalaiele, eie ua bhana ixi iâ ku mbutu ia Mbalahamu, kamba dié, ku mivu ki iene kúbhua?

⁸ Ene iá a tungu momo; o dijina dié ia a di tungila kididi kikôla, exi:

⁹ Se ku tuiza kioso-kioso kia ibha, xibhata, milonga, kipheku mba nzala, etu-phe tua-nda kuiza ku pholo iaʼnzu iii ni ku pholo ié; kuma dijina dié diala mʼonzo mumu; mu kutata kuetu, tua kà di kola kokué, eie-phe ua kà tuivua, hé u tu kudila.

¹⁰ Tala-phe kindala o anʼa Amone, ni anʼa Mouabhi, ni akua milundu ia Seíle, u ua fudixile Izalaiele kubhita mu kaẋi kâ, kia kexe mu kuiza, a mu tunda mʼoxi ia Ijitu, anga a a kunga muene, a bhita kuengi, hé a fula o ku a jikinisa,

¹¹ o kiki-phe a tu bhe o futu, iá a mu kuiza phala ku tu kaia, mu ixi ia undundu ué, i ua tu lunduisa.

¹² Ai! Nzambi ietu, tata! Manhi hádia eie kua kâ a fundisa? Mukonda momuetu sé-mu nguzu, mu kumona o kifuẋi kiosuʼiki kia mu tuʼendelʼetu. Ni kia kubhanga tua lémbua ku kʼijiia! Kuabhu! Maji-phe o mesu metu tua ma te kokué.

¹³ O Juda ioso-phe kienhokio emana bhu pholo ia Jihova, kumoxi ni tumbonga tuâ ni ahetuʼâ, ni anʼâ.

¹⁴ Bhenhobho Nzumbi ia Jihova iza mu kaẋi ka kionge ku thandu dia Jehaziiele, monʼa Zakadiia, monʼa Benaia, monʼa Jehiiele monʼa Mataniia, levita, ku anʼa Asafo.

¹⁵ Anga uila: Enu Juda ioso bhanenu mátui, ni enu mua tungu mu Jeluzaleme, nʼeie sobha Jozafate: Jihova uambe kiki: ki mu kale ni uoma mba mu sasumuka mukonda dia kifuẋi kiki kia dikota, mukonda o mvunda ki ienuʼenu, maji ia Nzambi.

¹⁶ Mungu mu kulumuka mu ku zoka-nâ; tala, ene anda kubandela ku mbanjidilu ia mulundu ua Ziji, mua ka di bongela-nâ kua suku o dikôlo, ku pholo ia kikangalakata kia Jeluuele.

¹⁷ Mu mvunda iii, enu ki mua-nda kubhânga; mu sukila ngó mu kanga, hé muʼimana, nda mu mone kiá o ubhulukilu ua-nda ku mi bhana Jihova, eie Juda ni Jeluzaleme, ki mu kale ni uoma bha mu sasumuka; mungu muene ndé-nu mu kutakana-nâ, mbata Jihova ua kà kala ni enu.

¹⁸ Bheneʼobho-phe o Jozafate u di bhala ni pholo bhoxi mu ku diunda; ni Juda ioso ue ni iá a tungu mu Jeluzaleme, anga a di takula bhoxi mu kubheza Jihova.

¹⁹ Jilevita, ku anʼa Kohate ni ku anʼa Kola, anga a balumuka phala kuximana Jihova Nzambi ia Izalaiele ni dízui dia suina kinène.

²⁰ Mu kimenemene kia selu anga a balumuka, hé a tunda mu kuia ku kikangalakata kia Tekoua; kioso ene kia mu tunda, Jozafate u nzongamana hé u handekela, uixi: Ngʼivienu, eie Juda, ni enu mua tunga mu Jeluzaleme; xikanenu kua Jihova, Nzambi ienu, nda mu kale bhua kondama; xikanenu ku jipolofeta jê mua kà zediue.

²¹ Anga u di longesa ni mundu, iú ua tungula akua kuimbila Jihova, phala aie ni kuximana Ngana Ukôla, mu kutunda ene a songuela ió abhakata, ni kuila: Ximanenu Jihova, mukonda o kulenduka kuê kua kalelà-ku.

²² O kithangana kiandeka ene ni kutana ni kuximana, Jihova ua te madibatamenu a kubatamena anʼa Amone, ni anʼa Mouabhi ni akua milundu ia Seíle eza mu kúlua ni Juda, anga a a tolola.

²³ Mukonda anʼa Amone, ni anʼa Mouabhi a bilukila akua milundu ia Seíle phala ku a jikinisa ni ku a jimisa o mbutu; ene kia zubha o kujikinisa o akua milundu ia Seíle, a di kuatekesa dingi ene mudiâ o kudijikinisa.

²⁴ Kieneʼokio-phe ue, Juda ua bhixila bhu kilangidilu kia kikangalakata; o kia tale ku kifuẋi, a mono kuila mikutu ngó ia imbi ia fu, ia zeka bhoxi, ni umoxi ngó ka subhuka.

²⁵ Jozafate anga uiza ni kifuẋi kiê mu kubhunda o madibongela anga a sanga ndumba dia jimbongo ni nzungule ia imbi, ni ima iate kiavulu, hé a di katuila ndumba dia ima ia bhingi kuila ia mukuá a lémbua ku iʼambata; anga a bhanga izuua i tatu ni kubhunda o ibongèle, kuma ia vudile.

²⁶ O ku tula mu kizuua kia kauana, anga a di bhongoluela mu Dikôlo dia Belaxa, mbata mueneʼomo muene mua ximanena Jihova, kiene kididi kiokio kia kʼixanena dijina dia Dikôlo dia Belaxa katé mu kizuua kia lelu.

²⁷ Kieneʼokio mala oso a Juda ni Jeluzaleme, a vutuka ni kusanguluka, ala mu kuiza mu Jeluzaleme; o Jozafate ua a tuamenena ku pholo; kuma Jihova ua a bhana kusanguluka ku mbandu ia jinguma jâ.

²⁸ Anga eza mu Jeluzaleme kʼonzo ia Jihova ni kuxika tukoji ni jimbânza ni jikoloneta.

²⁹ O uoma ua Nzambi anga u tulukila ku thandu dia mautuminu moso mu jixi jeneʼojo, kioso ene kievu kuila Jihova ua bhângela Izalaiele ku jinguma jê.

³⁰ O ixi ia utuminu ua Jozafate anga ila muene hudí; Nzambi ua mu bhana kunhoha ku jimbandu joso.

O utuminu ua Jozafate

³¹ O Jozafate anga u tumina mua Juda. Kioso kiʼandeka kutumina, ua kexile ngó mu makuinhi atatu a mivu ni kitanu; anga u tumina makuinhi aiadi a mivu ni kitanu mu Jeluzaleme; o dijina dia manhʼâ, Azuba, monʼa Sili.

³² Muene uende mu njila ia Aza, tatʼâ, ka tundumu; ua bhanga jinga kia iuka ku mesu ma Jihova.

³³ Sumbala kiene, maji o matala ka ma katula, mukonda o mundu muẋima uâ ka u iudikile luua mu ku di tuma ni Nzambi ia jitata jâ.

³⁴ Abha o ima ia mukuá ia bhange Jozafate, kutale ia dianga, uixi ia sukidila, manhi ki iòsoneke mu mikanda ia Jehu, monʼa Hanane, ua i lunduluila mu divulu dia jisobha ja Izalaiele?

³⁵ O kia zubha kubhita ima iosuʼiii, Jozafate, sobha ia Juda ua kuata ukamba ni Akaziia, sobha ia Izalaiele, ua bhange ima ia vulu ia ibha.

³⁶ Ua kuata-nê ukamba phala kubhanga jinaviiu ji tena kuia ku Talxixi; jinaviiu anga a ji bhangela bhu Enzone-Ngabele.

³⁷ Maji-phe o Eliiezele, monʼa Dodova, mukua Malesa, ua zambula mu upolofeta, ku mbandu ia Jozafate, uixi: Mukonda eie ua di bundu ni Akaziia, Jihova ua bulu ue o ikalakalu ié. O jinaviiu anga ji budika muene, hé a lémbua kuia ku Talxixi.