II Malunda 19 - O Mikanda Ikola

Polofeta Jehu u bazela sobha Jozafate

¹ Jozafate, sobha ia Juda, anga u vutuka kubhata diê ni kutululuka, ku Jeluzaleme.

² O Jehu, monʼa Hanani, mukua lumono, hé u tunda mu ku mu tumbidila, uambela sobha Jozafate, uixi: Eie ueji ku kuatekesa muthu ua ibha, ni kuzola ió a zembe Jihova? Kiene njinda ia dikota ia Jihova ki iejila ku thandu dié.

³ Sumbala kiene, maji a sange hanji ima ia mbote momué; mukonda o mixitu eie ua i katula mu ixi, eie ua iudika muẋima ué phala kusota Nzambi.

Ku ta afundixi mu ixi

⁴ Jozafate anga u tunga mu Jeluzaleme; u tona dingi kubhita ni ku tala o mundu tunde bhu Beleseba tule ku milundu ia Ifalaimi, iú ua a bhangesa kuvutukila dingi Jihova, Nzambi ia jitata jâ.

⁵ Iú ua te afundixi mu ixi, mu jimbonge joso ja nguzu, mbonge ni mbonge.

⁶ Anga uambela afundixi, kuila: Talenu kiambote; ioso i mu bhanga kuma o kufundisa kuenu ki kua tundu ku muthu, maji kua tundu kua Jihova; o Muene-phe uala ni enu mu uenji uenʼiú ua kufundisa.

⁷ O kiki-phe, uoma ua Jihova u kale ni enu; alukenu-kiu, mu ki bhange; kuma kua Jihova, Nzambi ietu, ki ku moneka kituxi, mba kusuua jipholo ja athu, mba kuẋikina maujitu.

⁸ Ku difundixilu dia Jihova ni ku batuilu dia milonga, Jozafate ua te-ku ue amoxi-mu ku jilevita, ni ku jinganga, ni ku iá o mítue ia jitata mua Izalaiele; anga a vutuka kiua mu Jeluzaleme.

⁹ Anga u a tendelela, kuila: Muenda kienʼiki, mu uoma ua Jihova, ni ujitu, ni muẋima ua muvimba.

¹⁰ O mu ima ioso ia katungu iza kokuenu, ia tundu ku jiphange jenu, a tungu mu jimbonge jâ, bhu kaẋi ka mahâẋi ni mahâẋi, ni bhu kaẋi ka itumu ni ijila, ni bhu kaẋi ka jingonge ni mabatuilu, muenda ni ku a bazela mbé ka kale ni mulonga kua Jihova, phala ki kuize njinda ia dikota ku thandu dienu, ni ku thandu dia jiphange jenu; bhangenu kienʼiki, mu kambe ku kala mu akua mulonga.

¹¹ Talesenu, Amadiia, nganga ia dikota, muene ua-nda ku mi kexila ku pholo mu ima ioso ku mbandu ia Jihova, o Zebadiia, monʼa Ijimaiele, o kikuna mu dibhata dia Juda, u mi kexila ku pholo mu ima ioso ku mbandu ia sobha; o jifixiiadi ue, o jilevita, iá ku pholo ienu; suinenu-phe, mu ki bhange; Jihova uanda ku kala ni oso a iuka.