II Malunda 18 - O Mikanda Ikola

Kikutu kia ukamba bhu kaẋi ka Jozafate ni Akabe (I Jisobha 22.1-40)

¹ Jozafate anga u kala ni umvuama ni fuma iavulu; muene anga u tanga undandu ni Akabe.

² O ki bhua bhiti tu mivu, uia mu ku kunda Akabe ku Samaria. Akabe inga u jibha jimbudi ni jingombe ja vulu muene phala muene ni mundu uê ueza na-u; hé u mu bhomba kubanda-nê ku Lamote-Ngiliiadi.

³ Mukonda Akabe, sobha ia Izalaiele, uambela Jozafate, sobha ia Juda, kuila: Eie uia nʼeme ku Lamote-Ngiliiadi? Muene anga u muʼambela, uixi: Kioso ki uala eie, kiene ue ki ngi kala eme; o mundu uami ela kala o mundu ué; mu ita iii tu kala nʼeie kumoxi.

⁴ Jozafate anga uambela dingi sobha ia Izalaiele, uixi: Lelu, nga ku diondo, ibhula hanji o kizuelu kia Jihova.

⁵ Bheneʼobho-phe o sobha ia Izalaiele u bhongolola, jipolofeta joso, hama jiuana ja athu, ua ebhula, uixi: Tuia ku ita mu kúlua ni Lamote-Ngiliiadi, inga ngi muʼehʼê? Ene-phe exi: Banda; kuma Nzambi ua-nda ku mu bhana bhu lukuaku lué, sobha.

⁶ Jozafate-phe uixi: Bhabha kana-bhu dingi polofeta ia Jihova, ni tu mu ibhule?

⁷ Sobha-phe ia Izalaiele uambela Jozafate, uixi: Sai-ku hanji muthu ku tu fuama kubhuila Jihova, maji-phe eme ua ngi ibhila; mukonda kia zambuila mu upolofeta eme ka ngi zambuila mbote, lémbue, kale ngó phulu mu phulu; o dijina diê Mika, monʼa Ila. Anga Jozafate u vutula, uixi: Sobha, ku zuele kiókio!

⁸ Sobha ia Izalaiele bheneʼobho uixana ngolambole imoxi, u mu ambela, uixi: Mika, monʼa Ila, ngi bhekele-nê bhabha ni lusolo.

⁹ Sobha ia Izalaiele ni Jozafate, sobha ia Juda, a xikama, íú mu kiandu kiê, iú kiandu kiê, a zuata izuatu iâ, iá a xikama mu nzunga, bhua lulama ni dibhitu dia Samádia; o jipolofeta joso anga a kala mu kuzambuila bhu pholo iâ.

¹⁰ Zedekiia, monʼa Kanana ua di iudikila jimbinga ja utadi ua felu, uixi: Jihova uambe kiki: Akua Sídia ua kà a kuama ni jimbinga jenʼiji, katé ki u zubha ku a jikinisa.

¹¹ Jipolofeta joso ue a zambula kienʼiki, kuila: Banda ku Lamote-Ngiliiadi, ua-nda ku tolola; mukonda Jihova ua-nda ku mu bhana bhu lukuaku lué, sobha.

Muzambu ua Mika

¹² O mukunji uai mu kuixana Mika, ua mu ambela, uixi: Tala, o izuelu ia jipolofeta, uila mu kanu dimoxi, iene ioso iambote muene phala sobha; eie ué kizuelu kié kile kala kia muthu momuʼâ, ni u zuele kioso kia uabha.

¹³ Maji-phe Mika, uixi: Ki kôla! Jihova a laie! Kuma kioso ki ngi tangela Nzambi iami, kiene ki nga kà zuela.

¹⁴ O kieza-phe kua sobha, sobha ua muʼambela, uixi: Mika, etu tuia ku ita, ku Lamote-Ngiliide inga ngi muʼehe? Muene-phe, uixi: Bandenu, mua ka tolola. A kà mi bhana-nâ bhu maku menu.

¹⁵ Sobha-phe u muʼambela, uixi: Ngi kuambela lukuxi luosʼulu, phala eie ku ngi tangele, ki kale ngoho o kidi mu dijina dia Jihova?

¹⁶ Muene-phe uixi: Nga mono Izalaiele ioso ia di muangena mu milundu kala jimbudi ja kambe kabhila; Jihova iú uambe: Iá kala ni ngana iâ; kala muthu a vutuke monzo iê ni kutululuka.

¹⁷ Bheneʼobho, sobha ia Izalaiele, uambela Jozafate, uixi: Ki ngi kuambela-kiu, kuila o iú ka tena ku ngi zambuila mbote mu upolofeta, ki kale phulu ngó?

¹⁸ Muene uixi dingi: Ivuenu-phe o kizuelu kia Jihova: Nga mono Jihova ua xikama bhu kiandu kiê, o kifuẋi kioso kia diulu kiemana ku mbandu iê ia dilu ni kumbandu ia kiasu.

¹⁹ Anga Jihova, uixi: Nanhi muene uia mu kubhomba Akabe, sobha ia Izalaiele, nʼa bande bhu Lamote-Ngiliiadi nʼa buile bhobho. Anga uamba dingi, uixi: Edi iú u zuela kiki, ió u zuela kiókio.

²⁰ Bheneʼobho phe kua tundu kilulu anga kʼiza bhu pholo ia Jihova, kixi: Eme nga kà mu bhomba.

²¹ Jihova u kumuna, uixi: Ua ka mu bhomba nʼihi? Muene uixi: Eme nga-nda kutunda; hé nga kà kala ngi nzumbi ia makutu mu kanu dia jipolofeta jê joso. Kuala Jihova: Eie ua kà mu bhomba, ua kà mu tolola uê; tunda, ua kà mu bhange kieneʼokio.

²² Kiki-phe, tala, Jihova ua te nzumbi ia makutu mu kanu dia jipolofeta jé jenʼiji; Jihova iú ua zuela muene kia ibha ku mbandu ié.

²³ Bheneʼobho phe Zedekiia, monʼa Kanana, ua di sunga anga u bhana huxi ku dikanu dia Mika, uixi: Nzumbi ia Jihova ia bhitila njila iebhi, mu ku ngi somboka eme, í ia ku zuelela eie?

²⁴ Mika-phe, uixi: Tala, ua-nda ki mona, mu kizuua kiná, ki ua kèla u tunda dixilu u bokona dixilu, mu ku di sueka.

²⁵ Kieneʼokio phe sobha ia Izalaiele u tanga, kuila: Mika mu kuatienu, mu muʼambate dingi kua Amone, nguvulu ia mbonge, ni kua Johaji, monʼa sobha.

²⁶ Mua kèla: Sobha uambe kiki: Muthu iú mu tienu mʼonzo ia dikuikilu; mu mu dikile ni mbolo ia dilamba, ni menha a dilamba, katé eme ki ngi vutuka ni kutululuka.

²⁷ Kuala Mika: Sʼeie u vutuka muene ni kutululuka, Jihova-phe ki kale kene mu zuelela momuʼami. Anga uamba dingi uixi: Ivuenu-kiu, enu mu mundu uoso!

O ita ia Lamote-Ngiliiadi ni kufua kua Akabe

²⁸ Sobha ia Izalaiele, ni Jozafate, sobha ia Juda, anga a banda muene ku Lamote-Ngiliiadi.

²⁹ Sobha ia Izalaiele anga u tangela Jozafate, kuila: Ni kudimbikiza, eme nga-ndo di ta mu kubhânga, eie-phe u zuata izuatu ié. Sobha ia Izalaiele ua di dimbikiza hé a bokona mu mvunda.

³⁰ Sobha ia Sídia-phe ua bhele ngonge ku jikabhitangu ja makalu mê, kuila kana kubhânga ni ua tolo mba ua kulu, kale ngoho sobha ia Izalaiele muene.

³¹ Anga ki bhita kuila, o jikabhitangu ja makalu, kia mono Jozafate, exi: Iú muene sobha ia Izalaiele; anga a mu kondoloka phala kubhânga-nê; maji Jozafate ua dikola, Jihova iú ua mu kudila. Nzambi ua a isa kuengi.

³² Mbata edi kiki: Jikabhitangu ja makalu kia mono kuila ki muene sobha ia Izalaiele, eha ku mu kaiela.

³³ Anga bhu kala muthu uoleka mufula uê, o kia uʼase, ua kuama sobha ia Izalaiele, mua takanena o ibhakatu iê ia ita ni ngubu. Hé uambela mukua dikalu diê uixi: Lungulula kuaku lué u ngi katule mu ita, kuma a ngi kuama kinéne.

³⁴ Mu kizuua kieneʼokio, mvunda anga i nana, maji-phe sobha ia Izalaiele ua diʼakela muene mu dikalu diê, uemanena ku pholo ia akua Sídia katé mu ngoloxi; o kia fu dikumbi, muene ue uafu.