II Malunda 17 - O Mikanda Ikola

Jozafate ni muanu uê mu kulonga o mundu

¹ Jozafate, monʼê, anga u hinga ungana bhu kididi kiê; muene hé u di xitila ni nguzu kua Izalaiele.

² Mu jimbonge joso ja nguzu mua Juda, u ta-mu athu a lua ita, ixi ioso ia Juda u i ta masoladi, kumoxi ue ni mu jimbonge ja Ifalaíme, ja tambuile Aza, tatʼâ.

³ Jihova anga u kala ni Jozafate; mukonda uende mu jinjila ja dianga ja Davidi, tatʼâ, nguê kusota Bale.

⁴ Kota muene ua sota o Nzambi ia tatʼâ, iú uende mu ijila iê, kana mu ibhangelu ia Izalaiele.

⁵ O Jihova iú ua kuatesa o ixi ia utuminu uê bhu maku mê, ni Juda dioso dia bhana jinga maujitu kua Jozafate, anga u kala ni matunda avulu.

⁶ Anga muẋima uê u zangalela mu jinjila ja Jihova, anga u ta-ku dingi o kukatula o matala ni mixitu mua Juda.

⁷ O mu muvu ua katatu, ua utuminu uê, muene ua tumikisa ilamba iê kua Benehaile, ni kua Obadiia, ni kua Natanele, ni kua Mikaia, phala ende ni kulonga mu jimbonge ja Juda.

⁸ Ni ene kiá, kumoxi ni jilevita, Semaia, ni Netaniia, ni Zebadiia, ni Azaiele, ni Semilamote, ni Jonata, ni Adoniia, ni Tobiia ni Tobadoniia, o iá, o jilevita; kua ene kua di te o jinganga, Elizama ni Jolamu.

⁹ Anga a longa mua Juda; o divulu dia kitumu kia Jihova ene a kexile na-diu; anga a nhunga jisanzala joso ja Juda ni kulonga muʼaxaxe ka mundu.

¹⁰ Anga uoma ua Jihova u tuluka ku thandu dia mautuminu moso mu jixi ja kexile mu jimbandu ja Juda; ka bhange ita ni Jozafate.

¹¹ Amoxi-mu hanji ku jifilisteu eza jinga ni maujitu kua Jozafate, ni kitadi kia lubhaku; o akua Alábia ue a mu bhekela ku imuna iòfele, sambuadi dia midi ni hama sambuadi ia ilumbe ia jimbudi, ni sambuadi dia midi ni hama sambuadi ia isutu ia jihombo.

¹² Anga Jozafate u kula, u kula muene kinène; anga u tunga imbaka ni jimbonge ja mabhakelu a ibhakatu ia ita mua Juda.

¹³ Ua kexile ni ikalakalu ia vulu mu jisanzala ja Juda, ni athu a ita, ni mala a nguzu mu Jeluzaleme.

¹⁴ O dialuilu diâ dienʼidi, kala kioso kiá kiala o mabhata ma jitata jâ; mua Juda a kexile atumini a jimidi eneʼá: Mutumini Adana; o kua muene a te-ku hama jitatu ja midi ia mala a nguzu.

¹⁵ O ki kua tundu muene, kua kaiela mutumini Nzuanana; kua muene a te-ku hama jiiadi ni makuinhi nake a midi.

¹⁶ O ki kua tundu iú, kueza Amaziia, mona Zikidi, ua di bhakula muene mu vondadi iê kua Jihova, ku thandu diê a te-ku hama jiiadi ja mala a nguzu.

¹⁷ O mua Bejamí, Eliiada, iala dia nguzu, o ku thandu diê, hama jiiadi ja midi ia mala a bhakata jingubu ni mifula.

¹⁸ O kuema diê kua kaiela Jozabade ni hama ni makuinhi nake a midi a zuatela o ita.

¹⁹ Ene oso iá, a kexile mu ku kalakela sobha; mu dialuilu didi ka kexile-mu ene oso a a tele mu jimbonge joso ja nguzu mua Juda kuala sobha.