II Malunda 16 - O Mikanda Ikola

Aza u ta kikutu ni sobha ia Sídia

¹ Ku muvu ua makuinhi a tatu ni kisamanu, kia utuminu ua Aza, kiene kia bande Bahasa, sobha ia Izalaiele, mu kúlua ni Juda, anga u tunga mbonge ia Lama, mbé ki bhu kale muthu, uehela Aza, sobha ia Juda, kutunda mba kubokona.

² Kieneʼokio-phe, Aza u katula phalata ni ulu, mu dibhakelu dia jimbongo ja inzu ia Nzambi, ni ja inzu ia sobha, anga u u tumikisa kua Bene-Hadade, sobha ia Sídia, ua tungile mu Damasku, uixi:

³ Bhu kaẋi kami nʼeie bhuala kikutu, kala ki kia kexile bhu kaẋi ka tatʼetu ni tatʼenu; tala, nga ku tumikisa phalata ni ulu, eie nda uie, ua kà fuise o kikutu kiala bhu kaẋi kê-eie ni Bahasa, sobha ia Izalaiele, phala muene a ngi sondoloke.

⁴ Bene-Hadade anga uívua kia zuela sobha Aza, hé u tumikisa jikabhitangu ja ifuẋi ia masoladi ia kexile naiu, mu kúlua ni jimbonge ja Izalaiele, hé a kuama o mbonge ia Inzone, ni ia Dane, ni ia Abele-Maíno; ni jimbonge joso ja mabhakelu ma iselengenhe ia ita mu ixi ia Nafitali.

⁵ Anga ki bhita kuila, Bahasa kia kʼivu, ueha kutunga Lama; kikalakalu kiê ua lémbua kiá o kuia na-kiu ku pholo.

⁶ Kieneʼokio sobha Aza u ambata Juda dioso, ene anga eza ni matadi ma Lama, ni miẋi iê ia mu tungile na-iu Bahasa; ima ienʼiii hé u tunga na-iu Jeba ni Mispa.

⁷ Mu kithangana kieneʼokio muene, Hanani mukua lumono ueza kua Aza, sobha ia Juda, uixi: Kuma eie ua dielela kua sobha ia Sídia, o kudielela Jihova, Nzambi ié, kana, kuabhu-phe o kifuẋi kia masoladi ma sobha ia Sídia kia ku sutunuka bhu maku.

⁸ Manhi akua Itiiópia ni akua Líbia ka kexile kifuẋi kia dikota ni jinzungule ja makalu ni akua kusambela jikabalu? Maji-phe eie mu kudielela Jihova, muene ua a bhakula bhu maku mé.

⁹ Mukonda-phe o Jihova mesu mê ma bhita mu ngongo ioso, phala ku di londekeza o kusuína kuê mu ku kudila ió oso ala ni muẋima ua tenena kua muene; mu kiki-phe eie ua bhange ulaji mukonda tunde lelu ua-ndu kala jinga ni ita iza kokué.

¹⁰ Maji Aza u thathamena mumoni anga u mu ta bhu ditolongo mu dikuikilu; mukonda kienʼiki kia mu thathamesa kiavulu muene; Aza ue mu izuua mueneʼomo uandeka kiá kutatesa amoxi-moxi-mu ku kifuẋi.

Ufilu ua Aza

¹¹ Tala, ima ioso ia bhange Aza, ku tale ia dianga uixi ia sukidila, a i soneka mu divulu dia jisobha ja Juda ni ja Izalaiele.

¹² Aza anga úbua ni uhaxi ua inama, mu muvu ua makuinhi a tatu nʼivua, a utuminu uê; o uhaxi uê anga u vula kinéne muene, maji mu mahaxi mê ua lembuele kusota Jihova anga u dielela ngoho o imbanda.

¹³ Aza hé u zeka ni jitata jê; anga u fua mu muvu ua makuinhi a uana ni kamoxi, a utuminu uê.

¹⁴ Inga a mu funda mu mbila iêmuène, ia di kandeia mu mbonge ia Davidi, anga a mu zekesa bhu hama iezalesa ni ima ia mazumba ni ima iate kiavulu, iò iudike kuala jimesene ja ima ia mazumba ma mbote; anga a mu bhangela kiohela kionène ni ima ienʼiii.