II Malunda 15 - O Mikanda Ikola

Aza u jimisa ubhezelu ua iteka anga u fukulula dingi kikutu kia Jihova

¹ Kieneʼokio, o Nzumbi ia Nzambi anga iza ku thandu dia Azadiia, monʼa Obede.

² Muenʼiú anga u tunda, uia mu kutakana ni Aza, u muʼambela, uixi: Enu Aza, ni Juda dioso ni Bejamí ngʼivienu! O Jihova uala ni enu, kiosuʼiki enu muala ni muene; se mu mu sota, mua-nda ku mu sanga; o ki muʼila mu mu xa, muene ue ua-nda ku mi xa.

³ O Izalaiele-phe ua kexile muene ndumba dia izuua, ka monekene Nzambi ia kidi, ka monekene nganga i fuama ku mu longa, ka monekene kitumu.

⁴ Maji-phe, mu dilamba diâ, kiela jinga a diela anga a bilukila kua Jihova, Nzambi ia Izalaiele, anga a mu sota, a mu sanga jinga muene.

⁵ O mu izuua mueneʼomo, ki ku kexile kubatama né kua iá oso a tunda, mba kua iá oso a bokona, maji mavuua ngó mu mavuua kua iá oso a tungile mu jixi jeneʼojo.

⁶ Mbata athu a di lungulukila mudiâ, o sanzala i lungulukila sanzala ia mukuá, aia ni ku di jibha-jibha; mukonda Nzambi ua a bhondeleka ni mukondo uoso uavulu o matelu.

⁷ Maji-phe suinenu muene, makuʼenu ka botomoke; mukonda o kikalakalu kienu kiala ni futu iê.

⁸ O Aza kioso kievu o maka iá ni upolofeta ua tange o polofeta, monʼa Obede, ua suína dingi, iú ua katula imbamba ioso ia insunji mʼoxi ia Juda ni ia Bejamí ni mu jimbonge joso ja tambuile mu milundu ia Ifalaimi, anga u bhangulula dingi o Kalatódio ka Jihova, ka kexile ku pholo ia dibhitu dia lumbu lua dikota lua Jihova.

⁹ Anga u bhongolola Juda ioso ni Bejamí ni ene kiá kumoxi ni jinzuangiza a tungu mua Ifalaíme ni mua Manasa ni mua Ximinhá; kuma mua Izalaiele a vulu a kexi mu ku tunda-mu eza kua muene, kia mono kuma Jihova, dia Nzambi iâ, uala ni muene.

¹⁰ Anga a di bhongoluela mu Jeluzaleme, ku mbeji ia katatu, mu muvu ua kakuinhi ua utuminu ua Aza.

¹¹ Mu kizuua kieneʼokio anga a bhakula kua Jihova, ujitu ku ima ia bhundu, ieza na-iu, hama jisamanu ja jingombe ni midi jisamanu ja jimbudi.

¹² Hé a bokona mu kikutu kia kusota Jihova, Nzambi ia jitata jâ, ni muẋima uâ uoso, ni muenhu uâ uoso.

¹³ Ni kuila uoso ngué kusota Jihova, Nzambi ia Izalaiele, u fua, tunde ku mona-ndenge tule ku muadiakime, tunde ku diiala tule ku muhatu.

¹⁴ Anga a di lokela kua Jihova, ni dízui dia suina, ni kutana ni kuxika jimbungu ni jikoloneta.

¹⁵ Juda ioso hé a sanguluka ni mulôko uenʼiú; mukonda a loka muene ni muẋima uâ uoso, ia a mu sota muene ni hânji ioso, ia a mu bongo. Anga Jihova ua bhana dinhohenu ku jimbandu joso.

¹⁶ O Mahaka ue, mamʼa sobha Aza, muene ua mu tulula ue ku kiandu, mbé ka kale dingi mu kutumina ku usobha; mukonda ua bhangele Aselah, kiteka kia ibha kiavulu; o kiteka kienʼiki, kia ibha kiavulu, Aza u ki muanga-muanga, hé u ki bula-bula, anga u kiʼohela bhu mbanduʼa ngiji ia Kidelone.

¹⁷ Maji o matala-phe mua Izalaiele ka a katulamu; sumbala kiene, maji o muẋima ua Aza ua iukile jinge izuua ioso ia muenhu uê.

¹⁸ Hé u bheka kʼonzo ia Nzambi, ima ioso ia lumbile tatʼâ ni iii ia lumbile muene-muéne: ni phalata, ni ulu, ni itutu dingi ia fuama.

¹⁹ Ki ku kexile ita kale ngó mu muvu ua makuinhi a tatu ni kitanu ua utuminu ua Aza.