II Malunda 14 - O Mikanda Ikola

Aza u hinga ungana, anga u tolola Zela, mukua Itiiópia

¹ Abiia anga u zeka ni jitata jê, hé a mu funda mu mbanza ia Davidi; o Aza, monʼê, anga u hinga ungana bhu kididi kiê; o mu izuua iê, ixi anga i kala ni kutululuka mu kuinhi dia mivu.

² Aza anga u bhanga kia iuka, kia fuama, bhu mesu ma Jihova, Nzambi iê.

³ Kuma jikalatódio ja jinzambi jengi ua ji katula, o matala mâ ua ma sengulula; o iteka iâ ua i bula-bula, o mixitu iâ ua i kokela bhoxi.

⁴ Iú ua tendelela Juda kuila, a sote Jihova, dia Nzambi ia jitata jâ; o kitumu ni kijila a ki aluke.

⁵ Ua muange ue matala ni iteka ia dikumbi mu jisanzala joso ja Juda, anga u mona kuila ixi ioso ia utuminu uê ia tululuka muene kiambote.

⁶ Anga u tunga jisanzala ja nguzu mua Juda; mbata ixi ia tululukile kiambote, kuma mu mivu ieneʼoio ki kua kexile uoso u lua-nê ita; mukonda a mu bhana kunhoha kuala Jihova.

⁷ Anga uambela Juda, uixi: Tu tunge jimbonge jiji, tu ji kondoluese imbaka ni jinzu ja matala, ni mabhitu ni jiphapha, kiosuʼiki ixi iala hanji ni kutululuka bhu pholo ietu, mukonda tua soto Jihova, dia Nzambi ietu; tua mu sota, muene iú ua tu bhana o kutululuka mu jimbandu joso. Anga a tunga, a soma, a kala ni kuzediua.

⁸ Aza anga u kala-mu ni kifuẋi kia hama jitatu ja midi ia masoladi mua Juda a bhakata ngubu jʼonene ni jisosa; ni hama jiiadi ni makuinhi nake a midi ia masoladi mua Bejamí a bhakata ngubu jʼofèle ejiia o kuasa ni mifula; ene oso iâ, mala muene a mazonda.

⁹ O Zela-phe, mukua Itiiópia, anga u a tundila ni kifuẋi kia midi ia jimidi ja masoladi, ni hama jitatu ja makalu, anga u bhixila katé bhu Malesa.

¹⁰ Bheneʼobho Aza ue anga u tunda mu kutakana-nê; anga ita a i kuatela mu dikôlo dia Zefata, bhua zukama ni Malesa.

¹¹ Aza anga u dikola kua Jihova, Nzambi iê, uixi: Jihova, o kukuatekesa, phala eie, ki kima; kixi o mukua nguzu, kixi ió kala ni nguzu ia kima; tu kuatekese-phe, eie u Jihova, dia Nzambi ietu, mukonda tua dielela kokué, o mu dijina dié muene mu tuejila mu kúlua ni kifuẋi kiki; Jihova, tata! Eiʼeie u Nzambi ietu! Ka ku tolole kuala o muthu.

¹² Jihova anga u nemeka akua Itiiópia, bhu pholo ia Aza ni bhu pholo ia Juda, akua Itiiópia anga a lenga.

¹³ Aza-phe ni kifuẋi kia kexile na-kiu, anga a a landameka muene katé bhu Jelale, anga kúbua ndumba ia akua Itiiópia, mukonda ene ka kexile dingi ni kanguzu né kòfele ngó; mbata a a iokojola bhu pholo ia Jihova ni bhu pholo ia Kifuẋi kiê; bhenʼiobho o ana a Izalaiele ambata-bhu ndumba dia ibongele.

¹⁴ Anga a tolola jimbonge joso ja kexile mu jimbandu ja Jelale, mukonda o kimbuua kia Jihova kia kexile ku thandu diâ; anga mbonge joso a ji bhunda mukonda mua kexile mbole ia vulu.

¹⁵ A nemeka ue ku ilunga ia ibhaku; anga ambata-ku ndumba dia jimbudi ni jikamelu hé a vutuka kiua mu Jeluzaleme.