II Malunda 13 - O Mikanda Ikola

Abiia u hinga ungana anga úlua ita ni Jelobouamu

¹ Mu muvu ua kakuinhi ni nake ua utuminu ua Jelobouamu, kiene Abiia kia hingi ungana ua Izalaiele.

² Mu Jeluzaleme ua tumina mivu itatu; o mamʼâ dijina diê Mikaia, monʼa Udiiele, mukua Jibeia; anga ku kala ita, Abiia ni Jelobouamu a zoka.

³ Abiia anga u tumina kubhânga, o kifuẋi kiê kia kexile mala a ilolo ia ita, ua a nona hama jiuana ja midi ia athu; o Jelobouamu ue ua a nona, mazonda oso, hama nake ia midi ia athu, anga ua a ta kiambote mu ididi iê phala kúlua-nê ita.

⁴ Abiia anga uiza, uimana bhu thala ia mulundu ua Zemadaimi, uala mu milundu ia Ifalaimi, hé u zuela: Ngʼivienu, eie Jelobouamu ni Izalaiele ioso.

⁵ Manhi ki kia mi fuama ku kʼijiia, kuila Jihova, Nzambi ia Izalaiele, o ungana ua Izalaiele ua u bhana kua Davidi, ni muene ni anʼê, ku mivu ni mivu, mu kikutu kia môngua?

⁶ Sumbala kiene, maji Jelobouamu, monʼa Nebate, mubhikʼa Solomá, monʼa Davidi, ua balumuka iú ua ẋinukina ngana iê.

⁷ Kokué-muène kua di bande anʼa kadiaphemba, athu ka moneka kia kubhanga; ia a suína mu kúlua ni Lebouamu, monʼa Solomá, kioso Lebouamu kiala hanji mona-ndenge, ua nengana muẋima, anga u a lémbua mu nguzu.

⁸ O kiki hanji mua te muẋima ua kuhandamena kúlua ni utuminu ua Jihova, uala bhu maku ma anʼa Davidi; kiene muene, enu muala mu kifuẋi kia dikota, o tungombe tua ulu tua mi bhangela Jelobouamu, ni tu kale jinzambi jenu, muala na-tu.

⁹ Enu ki mu kaie o jinganga ja Jihova, anʼa Alá ni jilevita, enu mua di bhangela jinganga jenuʼe-nuenu, kala akua jixi jengi? Uoso-uoso uiza mu ku di lumba ni kamona ka ngombe ni sambuadi dia ilumbe ia jimbudi, kithangana kieneʼokio u di bhanga kiá nganga ia ió ki jinzambi ja kima.

¹⁰ Maji etu-phe, Jihova muene Nzambi ietu, nuka tua mu xile; o jinganga a a bhana ukunji ua Jihova, ene anʼa Alá ni Jilevita ala ku kikalakalu kiâ.

¹¹ Ala mu kuohela Jihova, imene ioso ni ngoloxi joso, sata ja kubhakula ni túbhia kua Jihova, ni uasu ua dizumba, ni kutula kiambote ku meza ma zele o jimbolo ja kutela, ni di tudilu dia jikandeia dia ulu ni jikandeia jê, mbé o ku ji uika mu ngoloxi joso, mukonda etu tuala ni muanu ua kikalakalu kia Jihova, Nzambi ietu; maji enu-phe mua mu xi.

¹² O kiki-phe Nzambi uala ni etu ku pholo ia ita, kumoxi ue ni jinganga jê, ala mu kuxika jikoloneta, phala ku ta nzongo ia kúlua nʼenu, enu mu anʼa Izalaiele! Ki mu lue-phe ni Jihova, Nzambi ia jitata jenu, kuma ki mua-nda kuzediua.

¹³ Maji-phe Jelobouamu ua a batamena mu mbandu joso phala ku a tukumuisa ku dima; iá edile ene ala ku pholo ia Juda, o ia a suama ala ku dima diâ.

¹⁴ O Juda phe kia tale, ua mono kuila kua mu bhingi kubhânga ni ku pholo ni ku dima; anga a di kola kua Jihova; o jinganga ue a xika jikoloneta.

¹⁵ Akua Juda hé a di kola; anga ki bhita kuila, kia dikola akua Juda, Nzambi ua kuama Jelobouamu ni Izalaiele ioso bhu pholo ia Abiia ni bhu pholo ia Juda.

¹⁶ Anʼa Izalaiele hé a lenga kia mono Juda, Nzambi phe u a bhakula bhu lukuaku luâ.

¹⁷ Katé Abiia ni kifuẋi kiê a bhange unzangi ua vulu muʼaxaxi kâ; mukonda mua Izalaiele, ku athu a ita òsole, ene a jibhile-ku hama jitanu ja midi ia muthu.

¹⁸ Kienʼiki anʼa Izalaiele a di zangelekele mu thembuʼomo, a a tululula; anʼa Juda a tolola mukonda a dielela kua Jihova, Nzambi ia jitata jâ.

¹⁹ O Abiia hé u landameka Jelobouamu; u mu tambula Betele ni tumbonge tuê mu jimbandu, ni Jesama ni tumbonge tuê mu jimbandu, ni Efelone ni tumbonge tuê mu jimbandu.

²⁰ Jelobouamo ue ka tena dingi kusunga nguzu mu izuua ia Abiia maji a mu kuama kuala Jihova iú uafu.

²¹ Abiia-phe ua di bhange kindanda iú ua sakana kuinhi dia muhetu ni kiuana anga u vuala makuinhi aiadi ni kiiadi kia anʼa mala ni kuinhi dia mona ni kisamanu kia ahetu.

²² Ima ia mukuá dingi ia Abiia, ku tale jinjila jê uixi o maka mê a i soneka mu dilunda dia polofeta Idu.