II Malunda 12 - O Mikanda Ikola

Nzambi u bhana kaxtiku kua Lebouamu mukonda dia kubheza iteka (I Jisobha 14.21-31)

¹ Anga ki bhita-phe, kiki: Kioso Lebouamu kia zubha ku jingisa utuminu uê ni ku u kuatesa kiambote, ngonge ia Jihova ua i xi, ni muene ni Izalaiele ioso.

² Kiene kia bhekesa mu muvu ua katanu ua utuminu ua sobha Lebouamu, o Sizake, sobha ia Ijitu, ua bande mu kúlua ni Jeluzaleme (mbata a tele kituxi kua Jihova).

³ Uiza ni midi ni hama jiiadi ja makalu ni makuinhi a samanu a midi ia akua kusambela jikabalu; o athu ajile na-u ku Ijitu, ni ku Líbia ni ku Suke, ni ku Itiiópia ka xikina kua tanga.

⁴ Anga u tambula jimbonge joso ja nguzu ja kexile na-ju Juda, hé uiza mu Jeluzaleme.

⁵ Bheneʼobho, Semaia, o polofeta, anga uiza kua Lebouamu ni ku adiakime oso a Juda a di bhongoluela mu Jeluzaleme, mukonda dia Sizake hé u a tangela, uixi: Jihova uambe kiki: Enu mua ngi xisa eme, kiene ue eme ki nga miʼehelela bhu lukuaku lua Sizake.

⁶ Kieneʼokio, adiakime oso a Izalaiele ni sobha, a toloka kua Jihova, anga a zuela, exi: Jihova ua lunguʼê! Mukua kidi.

⁷ Jihova kia mono kuila a toloka, kizuelu kia Jihova kieza kua Semaia, kuila: A toloka eme ki nga-ndu ku a jikinisa dingi, maji mu kindala muene nga-nda ku a bhana kididi kia disuamenu phala o njinda iami ki i lundulule ku thandu dia Jeluzaleme, ku lukuaku lua Sizake.

⁸ Maji-phe, a-ndu kala abhikʼê, nda ejiie kia di tungula o ubhika uami ni ubhika ua mautuminu mungongo.

⁹ Sizake, sobha ia Ijitu, anga u banda mu kúlua ni Jeluzaleme, anga jimbongo joso ja inzu ia Jihova u ji tambula, kumoxi ni jimbongo ja inzu ia sobha; uambata ioso. Uambata ue ni jingubu ja ulu ja bhangele Solomá.

¹⁰ O bhu kididi kiê, sobha Lebouamu ua bhange jingubu ja kobidi, anga u ji bhana bhu maku a jikabhitangu ja kilangidilu, a kexile mu ku langidila bhu muelu ua inzu ia sobha.

¹¹ Iá a kexile mu kuila: Kioso sobha kia bokona mʼonzo ia Jihova, akua kilangidilu eza, a ji bheka anga aia na-ju dingi mu ku ji tula mu xilu dia Kilangidilu.

¹² Kioso muene kia di bhombo, o njinda ia Jihova ki i mu tula dingi phala ki i mu sengulule nʼa jimina-ku; mukonda hanji mu Juda mua kexile ima ia mbote.

O utuminu ua Lebouamu

¹³ Mu Jeluzaleme-phe, sobha Lebouamu u di xitila ni ima ia nguzu anga u kuata kutumina. Kieneʼokio Lebouamu ua kexi mu makuinhi a uana a mivu ni umoxi kioso kiandeka kutumina; anga u tumina kuinhi dia mivu ni sambuadi mu Jeluzaleme, mbonge ia solo Jihova mu miji ioso ia Izalaiele phala o ku ta dijina diê momo; o manhʼâ sobha dijina diê Nahama, mukua Amone.

¹⁴ Sobha anga u bhanga kia ibha, mukonda ka iukisa muẋima uê mu kusota Jihova.

¹⁵ O ima ia mukuá-phe dingi ia bhange Lebouamu ku tale ia dianga uixi ia sukidila, mbé ka i soneka mu madivulu ma Semaia, dia polofeta, ni ma Idu, mukua lumono, mu jindunda ja Uvuadiue? Lebouamu ni Jelobouamu álua jinga ita izuua iâ ioso.

¹⁶ Lebouamu anga uzeka ni jitata jê anga a mu funda mu mbonge ia Davidi; o Abiia dia monʼê anga u hinga ungana bhu kididi kiê.