II Malunda 11 - O Mikanda Ikola

Ngana Nzambi u fudisa Lebouamu kúlua ni kuinhi dia miji

¹ Lebouamu kieza mu Jeluzaleme, u bhongolola mʼonzo ia Juda ni Bejamí hama ni makuinhi nake a midi ia muthu òsole, ejiia kiambote kúlua ita phala kúlua ni Izalaiele, phala o ungana a u vutuile kua Lebouamu.

² Maji-phe, kizuelu kia Jihova kieza kua Semaia, muthu ua Nzambi, kuila:

³ Tangela Lebouamu, monʼa Solomá, sobha ia Juda, ni Izalaiele ioso mua Juda ni mua Bejami, uixi:

⁴ Jihova uambe kiki: Kana kubanda, mba mu zoka ni jiphange jenu; muthu ni muthu a vutukile mʼonzo iê, mukonda kima kiki kia tundu kokuami. Anga evua kizuelu kia Jihova hé a fula kuia mu kúlua ni Jelobouamu.

Lebouamu u Kolesa Jimbonge ni Imbaka

⁵ Lebouamu anga u tunga mu Jeluzaleme; u bhanga jimbonge ja imbaka mua Juda.

⁶ Ua tungu-phe Beleme, ni Etane, ni Tekoua,

⁷ ni Betesule, ni Soko ni Adulane,

⁸ ni Ngate, ni Malesa, ni Zife,

⁹ ni Adolaíme, ni Lakiji, ni Azeka,

¹⁰ ni Zola, ni Ajalone, ni Hebolone, ja kexile mua Juda ni Bejamí, jimbonge ja nguzu.

¹¹ Anga u kuatesa imbaka ienʼiii, anga u ta-mu jikomanande ni inganja ia makudia, ni maji, ni vinhu.

¹² Anga mu mbonge joso u ta-mu jingubu ja makota ni mifula; anga u ji kolesa kiavulu kinéne. Ni Juda ni Bejamí-phe, ji kala mbonge jê-muène.

En ʼoso akua uoma ua Jihova eza mu Jeluzaleme

¹³ O jinganga joso ue ni jilevita a kexile mua Izalaiele ioso, a tunda mu jimbambe jâ anga a di bhongoluela kua muene.

¹⁴ Mukonda o jilevita a xisa muene mikáu iâ ni jixi jâ ja a tokala, iá eza mua Juda ni Jeluzaleme, (mbata Jelobouamu ni anʼê ua a kaie, phala kende ni kubhanga ukunji ua Jihova.

¹⁵ Muene iu ua di sotela jinganga jêmuène, mbé o kusatela bhu ididi ia di leka, ni madimonho, ni tungombe tua iudika muene-muène.)

¹⁶ O kuema dia iâ, kua kaiela eneʼoso mu miji ioso ia Izalaiele, a bhana mixima iâ mu kusota Jihova, Nzambi ia Izalaiele, eza mu Jeluzaleme phala kubhana jisata kua Jihova Nzambi ia jitata jâ.

¹⁷ Kienʼiki a kuatesa utuminu ua Juda, anga a jingisa Lebouamu, monʼa Solomá, mu mivu itatu; mukonda mu njila ia Davidi ni Solomá ende-mu mivu itatu.

O diembo dia Lebouamu

¹⁸ Lebouamu anga u katula Mahalata, monʼa Jedimote, monʼa Davidi, nʼa kale muhatuʼé; ni Abihaíle, monʼa Eliiaba, monʼa Jese,

¹⁹ ua mu bhana ana iá; Jeuze, ni Samadiia, ni Zahama.

²⁰ O kuema diê, ua katula dingi Mahaka, monʼa Abisalone; o muenhú iú ua mu vualela Abiia, ni Atai, ni Ziza, ni Selomite;

²¹ Lebouamu anga u beta kuzola Mahaka, monʼa Abisalone, ahetuʼê oso a mukuá ni jisai, ndenge; mbata muene ua kexile ni kuinhi dia muhatu ni nake ni makuinhi asamanu a jisai; anga u vuala makuinhi aiadi ni nake dia anʼa mala ni makuinhi asamanu a anʼa ahetu.

²² O Abiia monʼa Mahaka muene a mu te ku pholo kuala Lebouamu phala a kale dikota mu jiphange jê, mukonda muene ua mesenene ku mu bhanga sobha.

²³ Anga u bhanga unjimu: Ku anʼê oso, amoxi-mu ua a muangena mu jixi joso ja Juda ni Bejamí, mu jimbonge joso ja nguzu; inga u a sukumuina nzungule ia makúdia; hé u a sotela kifuẋi kia ahetu.