II Malunda 10 - O Mikanda Ikola

O kubaluka kua kuinhi dia miji ia Izalaiele

¹ Lobouamu anga uia bhu Xikeme, mukonda Izalaiele ioso ejiie bhu Xikeme phala ku mu hingisa usobha.

² Anga ki bhita kuila, Jelobouamu, monʼa Nebate, kia kʼivu, (mbata muene ua kexile mu Ijitu mua lengelele mukonda dia sobha Solomá) u tunda ku Ijitu, u vutuka.

³ Mukonda a mu tumine ku muixana; muene anga uiza kua Lebouamu kumoxi ni Izalaiele ioso, hé a muʼambela, exi:

⁴ Jungu ietu tatʼenu ua tu nemesa na-iu, kiki-phe eie tu sosolole ubhika ua kabhikolo ua tatʼenu, ni jungu ia neme ia tu bhinjika jinga naiu, nda tu ku bhikile.

⁵ Muene anga ua ambela, uixi: Ndénu; mu izuua itatu, muize kokuami. Mundu anga a muangana.

⁶ Lebouamu anga u ta kaiula ni ikulakaji akexile jinga bhu pholo ia tatʼâ Solomá, kia kexile ku muenhu, uixi: Enu mu ngi bha kaiula kahi mu ku vutuila mundu iú?

⁷ Ene anga a mu zuelela, exi: Se eie u di bhanga u muthu uambote, ua nengana muẋima ku kifuẋi kiki, anga u a tela maka ma mbote, ene izuua ioso a-ndu kala muene abhikʼé.

⁸ Maji muene-phe kaiula ka adiakimi ua kaxiʼê, iú uai mu ku ta kaiula kengi ni minzangala nʼakuá a kulu-nê kumoxi, iú ua kexile-nâ kumoxi bhu pholo iê.

⁹ Hé uʼebhula, uixi: Enu kaiula kahi ku mu bhana, ki tu vutuila mundu iú, a ngʼambela, kuila: Tu sosolole jungu ia tu bhinjika jinga na-iu tatʼenu?

¹⁰ O minzangala ia kudila na-iu bhua moxi, a muʼambela, exi: Mundu iú u a tangela kiki: A kuambela kuila: Tatʼenu jungu ietu ua i nemesene dingi kinéne, maji eie-phe tu sosolole-ku. Eie-phe ua tangela kiki: O mulembu uami ua theketheke, ua beta kubumba o malombo ma tatʼetu ndenge.

¹¹ Kienʼiki se tatʼetu ua miʼambatesa jungu ia neme, eme-phe ku jungu ienu nga-nda ku ta-ku dingi; o ki kala tatʼetu ua mi beta ni jixikote, eme-phe kiá nga-ndu mi beta ni jimbalanganza.

¹² Jelobouamu anga uiza mu kizuua kia katatu kumoxi ni kifuẋi kioso kua Lebouamu, kala kia ambelele sobha muene, kuila: Mu vutuka kokuami mu kizuua kia katatu.

¹³ Mu ku a vutuila, sobha Lebouamu anga u a vutuila ni kuhanduluka kuoso, mukonda o kaiula ka adiakime ngué na-ku.

¹⁴ Hé u a zuelela kala kia muʼambela kaiula ka minzangala, uixi: Se o jungu ienu tatʼetu ua i nemesene, eme-phe nga-ndu mi tela-ku dingi; tatʼetu ua mi beta jinga ni jisuanzu, eme-phe nga-ndu mi beta ni jimbalanganza.

¹⁵ Kienʼiki sobha ngué kubhana mátui ku kifuẋi, mukonda o kulunguluka kuku, kima kia tundu kua Nzambi, phala Jihova a tenese o kizuelu kiê, kia zuelele ku ukunji ua Ahiia, mukua Silo, kua Jelobouamu, monʼa Nebate.

Kuinhi dia miji i kaiela Jelobouamu

¹⁶ Izalaiele ioso-phe kia mono kuila sobha ngué ku a bhana mátui, bheneʼobho o kifuẋi a vutuila sobha, exi: Davidi tuala-nê ni kima kiahi? Mua monʼa Jese etu ki tuala-mu dingi ni undundu ua kima; enu Izalaiele, muthu ni muthu aie mu fundu iê! Eie-phe Davidi, langa diembu diê. Bheneʼobho Izalaiele ioso aia mu jifundu jâ.

¹⁷ Maji-phe o anʼa Izalaiele a tungile mu jimbonge ja Juda ene a tumina jinga kuala sobha Lebouamu ku thandu diâ.

¹⁸ Kieneʼokio sobha Lebouamu anga u tumikisa Hadolamu, ua kexile mu kulangidila o lubhaku; maji-phe anʼa Izalaiele a mu buba ni matadi, iú uafu; sobha Lebouamu kia ki mono, u lenguluka kubanda mu dikalu diê, anga u lengela mu Jeluzaleme.

¹⁹ Kienʼiki anʼa Izalaiele kia salumukina inzu ia Davidi, katé mu kizuua kia lelu.