II Malunda 1 - O Mikanda Ikola

Solomá u bhana jisata

¹ Solomá, monʼa Davidi, anga u kala ni kutena kua vulu mʼoxi ia utuminu uê; o Jihova, Nzambi iê anga u kala-nê kumoxi, anga u mu zangeleka kiavulu kinéne.

² Solomá anga u zuelela Izalaiele ioso, ni jikabhitangu ja jimidi ni ja jihama, ni afundixi, ni makota oso a jingana mu Izalaiele ioso, ni adiakime a mabhata, o jitata.

³ Solomá anga uia ni kionge kioso kumoxi-nê, bhu ditala dia dileka dia kexile mu Ngibiione, kuma bhene bhua kexile Balaka ia kionge kia Nzambi, ia iudikile Mozé, ngunza ia Jihova, mu ixi ia kisekele.

⁴ Maji-phe Davidi ua katuile o Alaka ia Nzambi bhu Kidiate-jadimi hé u i bandesa bhu kididi kia i iudikila, kuma ua i tungidile balaka mu Jeluzaleme.

⁵ O Kalatódio ka Kobidi ue, ka bhangele Bezaliiele, monʼa Hudi, monʼa Hule, ka kexile ue bheneʼobho kumoxi ni balaka ia Jihova. Solomá ni kionge kioso, kuene kua kexi mu kuia jinga.

⁶ Solomá bheneʼobho anga u bhakula jisata bhu pholo ia Jihova, ku thanduʼa Kalatódio ka Kobidi kala mu balaka ia kionge, ku thandu diê ua bhela-ku midi ia jisata.

Solomá u bhinga Nzambi ku mu bhana o kuijiia

⁷ Mu usuku uenʼió muene, Nzambi u tukulukila Solomá, hé u mu tangela, uixi: Bhinga ioso i ua mesena, nda eme ngi ku bhane-naʼiu.

⁸ Solomá anga uambela Nzambi, uixi: Eie ua bhange uthu ua vulu kua tatʼetu Davidi; eme ua ngi hingisa usobha bhu kididi kiê-muene.

⁹ O kiki-phe, u Jihova Nzambi, ki dikumbidile, o kizuelu kié ki ua bhana kua tatʼetu Davidi, kuma eie ua ngi bhange ngi sobha ia mundu ua vulu, kala fufutila ia mavu mu ngongo.

¹⁰ Ngi bhane-phe kindala o kuijiia ni unjimu, mbé ngi tene kutunda ni kubokona, mu kaẋi ka mundu iú; mbata nanhi muene u tena kufundisa mundu ua vulu kiki?

¹¹ Bheneʼobho Nzambi anga uambela Solomá, uixi: Mukonda mu muẋima mua ku kalé ngó ienʼiii, eie ua kambe ku ngi bhinga umonhi, mba jimbongo, mba kijingu, mba u bhinga kalunga ka iá oso a ku zembe, mba ngoho ku di bhingila eie-muène ndumba dia izuua ia kukola o muenhu, maji ua bhingi ku kubhana unjimu ni kuijiia, mbé ni u tena kufundisa o mundu uami, u nga ku tudila ku usobha,

¹² o unjimu ni kuijiia a ku bhana-u; nga-nda ku kubhana ni umvuama, ni jimbongo, ni kijingu, kia bhingi kuila kana-ku sobha ua kexile na-kiu kuema dié, o ku pholo ue kana muthu dingi ua kà kala na-kiu.

O kutena kua Solomá ni umvuama uê

¹³ Kienʼiki, Solomá u vutuka mu Jeluzaleme, ua tundu bhu kalundu kala mu Ngibiione, bhu Balaka ia kionge, anga u kuata kutumina Izalaiele.

¹⁴ Solomá anga u bhongolola makalu ni akua kusambela jikabalu, anga u kala ni midi ni hama jiuana ja makalu ni kuinhi dia midi ni kiiadi dia akua kusambela jikabalu, anga u a uanena mu jimbonge muala o makalu, bhu mbanduʼa sobha ia Jeluzaleme.

¹⁵ Sobha anga u bhangesa kuila mu Jeluzaleme muizala ulu ni phalata kala matadi, o miẋi ia misedulu i vula kala mikuzu mu mikáu.

¹⁶ O jikabalu ja kexile na-ju Solomá ja kexi mu ku tunda ku Ijitu; kuambe o linhu ia kubhota, abadi a sobha a kexi mu kuila o ngoji jê a ji sumba mu suilu ia tokala.

¹⁷ Iá a kexi mu kuila dingi o makalu ku tunda mu Ijitu ni ku banda, dimoxi di ta hama jisamanu ja xikulu ia phalata, o kabalu kamoxi hama ni makuinhi a tanu; kienʼiki ue kiene kia kexile mu kubhanga, mu ku katula jikabalu phala o jisobha ja mahiti ni jisobha ue ja Sídia.