II Kolindo 8 - O Mikanda Ikola

O mukungu ua kubhindumuna o jikidistá ku Judeia

¹ Kima kiamukuâ, enu jiphange, nga tumu ku mʼ ijidisa o kiadi kia bhana Nzambi mu jingeleja ja Masedonia.

² Kuma ene mu ku a lola mu polova ia jihadi javulu. Maji ezala ni ngalasa iâ, o mu uadiama uâ uazongo a bhana kia nzungule mu kubindumuna.

³ Ngala ngi mbangi iâ, kuma ene a suku bhuoso bhu a tena, katé o bhuene bhu a tena a somboka-bhu. Maji a bhana mu vondadi iâ,

⁴ kuma a tu bhingile muène ni kudionda kuavulu kutambula o ujitu uenʼiú, ua mukungu ua kubindumuna o akua Ngana ku Judeia.

⁵ Ki kiene ngó. Ene a beta dingi kubhanga, o ki tua fikile etu ndenge. Kima kia dianga ene a tuamene ku di bhana ene-muène kua Ngana. O kia kaiadi kua etu-ene, mu vondadi ia Nzambi.

⁶ Katé Tito tua mu bhingile, mukonda muène ua mi matekesa o kikalakalu kiki, phala a mi kuatekese o kuzubha ujitu uenʼiú.

⁷ Mu ima ioso enu mua londekesa kuila muala kota, o akuenuʼ oso ndenge; ni mu kuxikana, ni mu kuzuela, ni mu kuijiia, ni mu vondadi ioso i muala na-iu ia kukuatekesa akuenu, ni mu henda, i mua tu kala na-iu. O mu kikalakalu kia henda, tuandala ue kuila enu mu kala kota mu kubhanga, o akuenu oso ndenge.

⁸ Ki nga ki ambela ue kala ngandala ku mi tumina. Maji nga mesena ngó kuila mu ijiia ue o muanu ua akuenu, phala ene a mone ue mba o henda ienu ia kidi.

⁹ Kuma o henda ia dikota ia Ngana ietu Jezú Kristu mua ijiia; sumbala muène ua kexile mvuama, ua di bhangele-phe ngadiama, mukonda dienu, phala enu ku uadiama uê mu mone o umvuama.

¹⁰ Ku maka iâ, nga mi ambela-phe kioso ki nga fika: kuila kota enu o kuzubhidisa kindala o kima kiokio ki mua mateka o muvu ua bhiti. Ku dimatekeneu enu-enu mua tuamena, ki mu kukuatekesa ngó, maji ni mu kuandala o kukuatekesa.

¹¹ Uila kiki-phe, suinenu ni kikalakaluʼ iki, mu zubhe kiá o ku ki bhanga. Mu ki bhanga-phe kia soko ni kioso ki muala na-kiu.

¹² Kuma se sai muthu uandala kubhana, Nzambi u xikina o ujitu, kala muthu kioso ki ala na-kiu.

¹³ Ki nga ki ambela ue phala ngʼ ahule akuenu, enu ni ngi mi xine o kinemenu ku thandu, maji nga ki ambela o kusokelesa.

¹⁴ O ki muedi, enu kiki muala ni kia nzungule, kiauabha muene o kubindumuna akuenu oso a bhindama. Oko enu uenu, hadia ki mu tata, ene anga a kala ni kia nzungule, bhenhobho ene uâ a tene ku mi kudila. Mu kienʼ iki enu oso bhu kale o kusokelela.

¹⁵ Kala ki ambe o Mikanda Ikôla kuila: Ua nona kiavulu kana kima kia mu subhuka, o ua nona kiatolo kana kima kia mu kambe.

Tito ni akuâ

¹⁶ Tua sakidila-phe kiavulu Nzambi ua mi tela o muanu uene umoxi ni etu mu muẋima ua Tito phala ku mi kuatekesa.

¹⁷ Kuma muène uetaia muene ki tua mu bhingi. Kua di te dingi kuila, mukonda-phe dia muène kukala ni vondadi iavulu ia ku mi kuatekesa, ua katuka kuia ku mualʼ oko muene mu vondadi iê-muène.

¹⁸ Tua katula ue kumoxi ni muène, phange ietu ene ku mu xila mu jingeleja joso, mukonda dia kikalakalu kiê kia kukola o Njimbu Iambote.

¹⁹ Kua di te o kuila, o phange ietu muenʼiú, muène a mu solo ni ku mu tungula kuala o jingeleja phala ni tuendela jinga-nê kumoxi. Muène a mu solo phala ku tu kuatekesa mu kikalakalu kiki kia henda, mbé o kufumanesa Ngana Nzambi, ni mu kuidikiza ue kuila ni kidi kiene etu tua mesena kukuatekesa.

²⁰ Uila kiki, tua bhindamena kuiengesa kuila bhu kala ni athu a tu fika kiaiibha, mukonda dia nzungule ia ujitu iú u tua mu tambula ku mukungu.

²¹ Kuma o vondadi ietu, tua mesena kubhanga kima kiaiuka, kana ngó bhu pholo ia Ngana, maji ni bhu pholo ue ia akuetu.

²² Kumoxi ni ene, tuala ku mi tumikisa dingi phange ietu iamukuâ. Muthu iú etu tua mu lola jinga kiá kiavulu, etu tuejiia kuila muène izuua ioso uala polondo phala kukuatekesa. O kiki ki edi enu ue ua mi dielela dingi kiavulu, muène ue ua beta dingi kukala ni vondadi ia kukuatekesa.

²³ Se bhu kala muthu uibhula Tito, muène mukua kisangela kiami, mukalakadi ni mukuetu mu ku mi kuatekesa enu. Se ebhula o jiphange jetuʼiji a mùia ni muène, ene akunji a a katula kuala o jingeleja, athu ene mù bhana ujitu kua Kristu.

²⁴ Kala kiki, phala o jingeleja jamakuâ nʼ a kʼ ijiie, jiphange jiji a edikisienu-phe bhu pholo ia jingeleja kuila enu mua a zola, ni kuila ue etu tua lungu, bhu kaxi ni thathe ietu i tuene ku mi tela.