II Kolindo 7 - O Mikanda Ikola

¹ O ki tualʼ iki, enu akuetu, o ikanenu ioso ienʼ iii ia tu tokala etuene. Tu dʼ iẋikienu, ni tu bhue o ufusa uoso ua xitu ni ua nzumbi, ni tu zubhe o kuzela, tu kale mù xila Nzambi.

O kusanguluka kua Phaulu kia mu kundila Tito

² Iudikenu kididi phala etu mu miẋima ienu. Kana-ku muthu tua mu bhange phulu, kana-ku muthu tua mu di mangonha, kana-ku muthu tua sota ku mu bhanga kudimuka.

³ Ki nga ki ambela ku mi elêsa. Kuma kala ki nga ki zuela kiá ngixi enu mua tu kala kiavulu ku miẋima, o izuua ioso tuala bhuamoxi, kixi kufuila kumoxi kixi kulaiela kumoxi.

⁴ Nga mi dielela kinéne, kienhiki ngi di thatha kiavulu mukonda dienu. Mu axaxi ka hadi ietu ioso, hanji ngezala ni kusuina, nga xamujuka ni ngalasa.

⁵ Mukonda tunde ki tua bhixidile ku Masedonia, xitu ietu ki ia tenene kubatama. Mu ididi ioso hadi ia tu kondele ku mbandu ni mbandu, jimvunda ni akuetu, ni uôma moxi ku miẋima ietu.

⁶ Kiene kimoxi Nzambi mukua kutululukisa oso a bhondalala, ua tu bhana kutululuka mu kuiza kua Tito.

⁷ O kutana-phe ngó ni kuiza kuê muène ki kuene, maji ue ni njimbu ia kutululuka kuê kua mono ko-kuenu ku mua mu tululukisa na-ku. Muène ua tu kundu o ngùnzu ienu i mua ngi kala na-iu, iú ua tu tangela ue kuila muala ni malamba avulu, katé muala polondo ia ku ngi luila o mvunda. Kienhiki, nga zediua dingi kiengi.

⁸ Né-mbe ku mukanda uami nga mi kuatesa mukondo, ki ngʼidi tamanu ki nga u sonekene. Sumbala kioso ki nga mono kuila o mukanda uenhó ua mi kuatesa mukondo mu ka kithangana ngó, kia ngi fuamene kudiela.

⁹ Maji kiki-phe nga sanguluka, kana mukonda mua kuatele mukondo, mukonda dia mukanda uami, maji mukonda o mukondo uenhó ua mi bhekela kudiela. Kuma o mukondo u mua kuatele, ua u uzala phala enu ki mu tunuke ni kima mukonda dietu etu.

¹⁰ Kuma o mukondo se a u uzala kuala Nzambi, u bhekela kudiela kubhangesa kubhuluka. O ku kima kala kiki, ki kuene dingi kuila tamanu ki nga ki bhangele. Maji o mukondo-phe ua mundu, u bhekela kufua.

¹¹ Talesenu kioso kia bhange Nzambi ni mukondo uenu: Muene ua mi bhangesa kukala mu athu a ujitu dingi, kienhokio ue enu mu edikiza kuma ki muala ni kuêla. Kuthathamana kuahi ngó ku mua kexi na-ku! Uôma uahi u mua kexi na-u, ngunzu iahi i mua ngi kuetelele, muanu uahi, lusolo luahi ngó mu kubazela kiaiibha! Mu ima ioso iii mua dʼidikiza kuma mua zele mu mulonga uenhó.

¹² Kienhiki, sumbala nga mi sonekena o mukanda uenhó, ki nga ki bhangela mukonda dia ió ua bhangele kiaiibha, ki mukonda ue dia ió a mu bhangele kiaiibha. Maji nga sonekena phala o muanu uavulu u mua tu kuatela, u di monekene muʼaxaxi kenu bhu pholo ia Nzambi.

¹³ Mukonda dia kiki tua suina dingi. O ku thandu dia kutululuka kuku ku tua tambula, kua di te o kutana dingi kiavulu mukonda dia ngalasa ia Tito. Kuma enu oso mua mu kuatekesa mu ku mu nhohesa o muẋima.

¹⁴ Mbata eme nga mu telele thathe ienu kua muène, ia ku mi zuela kiambote, o enu ue-phe ki mua ngi kuatesa jisonhi. Etu ima ioso i tuene ku mi tangela, ia kidi. Kiene ue ni thathe i tua tele bhu pholo ia Tito, ia ku mi ximana enu, a i mono kuma ia kidi.

¹⁵ Ni muène ue henda ia mu vulu dingi kia mi lembalala o kutumaka kuenu enu oso, ni kioso ki mua mu tambulula ni ujitu, ni kuditolesa.

¹⁶ Eme ue nga sanguluka, kuma ngi tena ku mi dielela mu ima ioso.