II Kolindo 13 - O Mikanda Ikola

Kudimuna akua Kolindo, ni ku a lekela

¹ Tatu kiabhʼú kukala mu kuia kuenioko ku mi kunda. Kala ki ambe o Mikanda Ikôla kuma: Mulonga uoso-uoso ki bhinga a u kuatesa ku kizuelu kia mbangi jiiadi mba jitatu.

² Nga mesena ku mi tangela enu mua diangele kuta ituxi, ni oso dingi amukuá. Ki nga kexile kuenioko lua kaiadi nga mi tangelele-kiu kiá, ni kiki ki ngala kuengi, ngi tona dingi ku mi tangela kuila hinu ki ngi mi sanga, ki ngi mi fikisila dingi, kana.

³ Kienioko enu mua kà kala ni polova i muandala, kuila Kristu muène ua mu zuelela momuami. Muène-phe kia mi zuelela kène ni kubhuila, maji uidikiza kusuina kuê muʼaxaxi kenu.

⁴ Sumbala muène a mu tele ku dikulusu mu kikexilu kia kubhuila, maji iú-uê ku muenhu mu nguzu ia Nzambi. Etu uetu tua bhuila mua muène, maji muandù mona kuma tuala ku muenhu ni Muène mu nguzu ia Nzambi phala ku mi kuatesa enu.

⁵ Di lodienu enu-enu mba mu kuxikana enu momo. Inga ki mua kʼijiia kuma Kristu u kala moxi dienu? Kukamba kukala moxi dienu, kikale mua sekala.

⁶ Nga dielela-phe kuma mu tu ijiia kuma etu ki tu sekala.

⁷ Tua mu kinga-phe Nzambi phala enu ki mu bhange kima kiaiibha, ki mukonda etu tuandala a tu ximana, maji mukonda tua mi andala kuila enu mu bhanga ima ia ujitu. Né mbe etu tuedi kala tua sekala.

⁸ Kuma o kidi ki tu tena ku ki fudisa, kikale tu ki kuatekesa.

⁹ Kiene ki tu sangulukila, kioso etu ki tuila kala tua bhuila, enu anga mu kala ni nguzu. Kiene kiá ki tuene ku mi sambela phala enu mu tenene.

¹⁰ Mukonda dia kiki kiene ki nga mi sonekena imʼiii kiosuʼiki eme ngala kuengi, phala hinu ki ngi mi sanga ki ngi mi temene mu kijingu kia ngi bhana Ngana. Kuma kijungu kia ngi bhana kia kutunga, ki kia ku muanga, kana.

¹¹ Kia xala-ku phange jami, nga mi lekela. Sotenu o kutenena. Ivenu kiambote ioso i nga mù mi ambela. Kalenu muẋima umoxi. Tungenu ni paze. O Nzambi ia henda ni paze anga u kala ni enu.

¹² Di menekenienu mudienu ni beju ia uphange mua Kristu.

¹³ Akua Ngana oso kunu a mi menekena. O kiadi kia Ngana jezú Kristu, ni henda ia Nzambi, ni ukamba ua Nzumbi Ikôla, u kale ni enu oso.