II Kolindo 12 - O Mikanda Ikola

Isumua ni ima ia madiuanu ia mono Phaulu

¹ Kua ngi bhingi ku di hanza, sumbala ki kua ngi fuama. Kindala ngi kuata ku maka ma isumua ni majingunuinu ma ngi bhana Ngana.

² Ngejiia muthu, ua kexi kidistá, kua bhiti kiá kuinhi dia mivu ni iuana, muenʼiú a mu ambatele katé ku diulu dia katatu. Hé mba ua kexile mu mukutu, mba mu mukutu ua tundile-mu, ki nga kʼijiia—Nzambi ngó ua kʼijiia.

³ Ngi ki tona muene, ngejiia muthu muenʼiú, a mu ambatele mu kapota diesu katé mu Palaízu, hé mba mu mukutu, mba ku kanga dia mukutu, ki nga kʼijiia—Nzambi ngó ua kʼijiia.

⁴ O kuenioko anga u ivua ima ki i xikina ku i lombolola mu maka, ima i kola ki i xikina ku i zuela ni mizumbu ia muthu.

⁵ Mukonda dia muthu muenʼiú, eme ngi di hanza muene. Maji ki ngi di hanze mukonda diami eme-muene, ki kale ngi di fiiala ngó o kubhuila kuami.

⁶ Kuma se ngandalele ku di hanza, ki ngeji ku kala ngi semenhi, kuma nga tange o kidi. Maji nguami ku di hanza, phala kana muthu u ngi fika ni ukota uengi, ki kiene kia ngi mono, kia ngʼivu.

⁷ Mukonda-phe dia majingunuinu kuvula kinéne, kuiengesa kuila ngi zangalala kiavulu, a ngi bhana uhaxi uonéne mu xitu. Uhaxi iú ueza kala mukunji ua Satana, mu ku ngi bhana jihuxi, phala ki ngi zangalale kiavulu.

⁸ Uhaxi ueniʼú anga ngi u diondela lutatu kua Ngana, phala a ngi katule-u.

⁹ Muène-phe ua ngambela uixi: O kiadi kiami ki ku sokesa-na-u. Kuma nguzu iami i beta kota mu kutena mu ku bhuila kué. Uila kiki-phe, nga sanguluka, kimuua ngi di fiiala o kubhuila kuami, phala nguzu ia Kristu i kale ni kutena momuʼami.

¹⁰ Uila kiki, nga sanguluka muene mu kubhuila ni kulebhuka, ni kubhindama ni ku ngi zukutisa, ni kukala mu ibhidi mukonda dia Kristu. Kuma kithangana ki nga mu bhuila, kiene kia mu ngʼ iza o nguzu.

Phaulu mukua muanu ni henda

¹¹ Eme nga zuela kala ngi semenhi, enu-enu-phe mua ngi bhinjika o ku ki bhanga. Nga fuamene enu mu ngi ximana. Kuma jipoxolo jojo ja tundu akuʼâ, ki ja ngi tundu ni kima, sumbala ki ngi kima.

¹² Kidi kiene, o ima iedikiza o upoxolo uami, iokalakale mu ʼaxaxe kenu ni muanu uoso. Ijimbuete ia isumua ni madiuanu, ni jinguzu javulu.

¹³ Kima kiahi kia mi bhangesa ku kala ndenge ku jingeleja ja mukuá? Hé kima, mukonda eme muène nga kambe ku mi nemena mu ku mi bhinga dikuatekesu.

¹⁴ Talesenu-phe, lutatu kiabhu lu nga di iudika kuia kuenioko mu ku mi menekena; ki nganda ku mi bhinga-phe kima. Kuma ki nga bhindamena kitadi kienu, nga mi bhindamena-ku enu. Mukonda o ana ki ene a lûndila jitata, maji jitata jene ji lûndila o ana.

¹⁵ Eme ngi ki sangulukila kiavulu o ku mi texila ioso i ngala na-iu, katé ni eme-muène ku di bhana mu kusota o mienhu ienu. Kifua se o henda iami iia ni kuvula, enu o ienu iia ni kusosoloka?

¹⁶ Uila kiki, enu-enu muanda ku ki xikina kuila eme ki ngi mi nemena ni kima. Kuma sai-ku ni muthu uanda kuzuela uixi: Ua dimuka, ua mi kuatela mu ndunge ni makutu.

¹⁷ Manhi enʼió oso nga a tumine ko-kuenu, sai-bhu muthu ua mi bhange kudimuka?

¹⁸ Nga bhingile Tito kuia ku mi kunda, kumoxi ni phange ia mukuâ mu kuxikana. Manhi Tito ua mi bhange kudimuka? Ki kia kidi muene kuma kiiadi kietu, o muẋima uetu uene umoxi, o uendelu uetu ue uene umoxi?

¹⁹ Enu mua mu fika kuma etu tua mu di lungisa bhu pholo ienu. Ki ki xikina! Tua zuela kala kia tu tumu Kristu, bhu pholo ia Nzambi. Ima ioso-phe i tu bhanga, enu akuetu, ia ku mi kuatekesa.

²⁰ Kuma ngala ni héle, sumba ku matelu-matelu, hinu ki ngi mi sanga, ki mu kala uila ki nga mi mesena kukala, eme uami ki ngi kala uila ki mua ngi mesena kukala. Ngala ue ni hele, sumba ku matelu-matelu hinu nga kà sanga jimvunda ni madixinga, kizembu ni luimbi, makulokalala, kutangelela, ukumbu, ni jikavuanza.

²¹ Ngala dingi ni hele, sumba ki bhita, kuila hinu ki ngiia kuenioko, Nzambi iami u ngi tununa bhu pholo ienu. Hé ngi kala mù dila mukonda dia enʼió avulu, oso a diangele kuta ituxi, maji nguâ kudiela o undumbu uâ ni ufusa, ni uhabhu uoso ua bhange.