II Kolindo 1 - O Mikanda Ikola

Umenekenu

¹ Eme Phaulu, Poxolo ia Kristu Jezú mu vondadi ia Nzambi, ni phange ietu Timote, tua soneka o mukanda iú phala o Ngeleja ia Nzambi iala mu mbonge ia Kolindo, ni akua Ngana oso mʼ oxi ia Ngelésia.

² Ku kale kiadi ku mualʼ oko, ni uembu u tunda kua Nzambi Tata ietu, ni kua Ngana ietu Jezú Kristu.

Phaulu u sakidila Ngana ua mu kondo o malamba

³ A ximane Nzambi, Tata ia Ngana ietu Jezú Kristu, Tata ia jihenda, Nzambi ió athu oso kuene mù tambula o dikuatekesu!

⁴ Muène mukua ku tu kuatekesa mu hadi ietu ioso, phala tu tene ue kukuatekesa oso ala mù tala hadi kala etu. O dikuatekesu dioso di tualù tambula etu kua Nzambi, diene ue di tu kuatekesa na-diu akuetu.

⁵ Uila ki tua tambula mbandu ku jiphaxi ja Kristu, kiene ue, mua Muène, ki tua tambula mbandu ku dikuatekesu diê dia dikota.

⁶ Se etu-phe tu tala hadi, enu tua mi talela-iu, mu ku mi konda malamba ni ku mi bhulula. O ki kala a tu bhandulula, ni enu uenu mu bnhanduluka phala ni mu tambule nguzu ia kubhalakata mu jiphaxiʼ ojo jene jimoxi ni jetu.

⁷ Mu kienʼ iki, ni kudielela kuetu ku tua mi kala na-ku, kua di fikidila kiambote. Kuma tua kʼ ijiia kuila o ki mua nomona ku jiphaxi jetu, mua nomona ue ku dikuatekesu dioso di bhana Nzambi.

⁸ Kuma ki tua mi mesena, jiphange, kuila mu kamba kuijiia o hadi ioso i tua tale mu Azia. Kuma o hadi i tua bhiti na-iu ia tu xinine koko, ia vudile kinéne, ni kinemenu kiê kia vudile ue, katé ki tua di fikile dingi kuila tu tunda-ku ni kukola muenhu.

⁹ Etu-ene moxi dietu tua tambuile kiá lubhe lua kalunga kala athu a xikamena o ku a jibha. Maji kia tu bhiti kienʼ iki, phala ki tu di fiiale etu-ene, maji tu di fiiale Nzambi, u tena kufukununa o madifundu.

¹⁰ Muène iú ua tu kudila ku kalunga kosuʼ oko, hanji ue uanda ku tu kudila. Ni ku pholo muène tua mu dielela ni muẋima uetu uoso o ku tu kudila jinga,

¹¹ kiosuʼ iki-phe ni enu uenu mua mu tu kuatekesa ni kusamba kuenu. Kienʼ iki o mu kubhinga kua mu tu bhingila athu avulu, ki bhekele ue kuila athu dingi avulu anda kusakidila Nzambi mukonda dia mabesá Muène a-nda ku tu bhana.

Kia bhangesa Phaulu kukamba kuia ku Kolindo

¹² Kuma etu o thathe ietu ieniii, o kitongoluelu kietu kia tu bhela umbangi muʼaxaxi kenu, kuma tuende mu ngongʼumu mu kuzela ni kidi kia tu bhana Nzambi. Tuende ue, kana mu jindunge ja xitu maji mu kiadi kia Nzambi.

¹³ Kuma ki tua mi sonekena ima iengi, maji iene kiá i mua tena kutanga ni kuijiia. Nga kinga-phe kuila mu zubha muene kutetuluka kia mbote,

¹⁴ mu ima ioio kindalʼiki i muejiia ngó mbandu, phala o mu kizuua kia Ngana ietu Jezú Kristu mu zangalale mukonda dietu, uila etu mukonda dienu.

¹⁵ Mu kudielela kiki o ima ioso ienhiʼii, ku dimatekenu ngambele kudianga kuiza ko kuenu, phala ku mi kunda, mbé o mbote mu i mone lua kaiadi.

¹⁶ Mukonda ngambele ku mi somboka mu kuia ku Masedonia, ni ku mi sanga dingi mu kuvutuka ku Masedonia, phala mu ngi xinjikile njila iami ia kuia ku Judeia.

¹⁷ O ki ngambele kubhanga kiki kifua ngedikiza kulungujuka mba ima i ngi kana ku bhanga kifua ngi i kanena mu xitu, phale ngi kale ngi mukua kuila, hinu kiene kiene, hinu kana kana?

¹⁸ Kabasa Nzambi uala fiiele, ua kʼijiia kuma hundu ietu ko kuenu ki ia kuila kiene ni kana:

¹⁹ Kuma Monʼa Nzambi, Jezú Kristu, tua mu kola muʼaxaxi kenu, eme ni Sidivanu ni Timote, kene kuila kindala kiene, kindala kana, maji mukua kiene mu kiene.

²⁰ Né mbe ikanenu ia Nzambi i vula kinéne, kua muene kua kala kiene, kua muène ue ku tunda o kuila Amén, ki bhekela ku mbandu ietu tu fumanesa Nzambi.

²¹ Maji u tu kuatenesa ni enu ni etu mua Kristu, ua tu undu o maji, muène Nzambi;

²² uedi ni ku tu ta kidimbu, ni ku tu bhana diẋîkina dia Nzumbi iê ku miẋima ietu.

²³ Eme-phe Nzambi a ngi kale mbangi ku thandu dia muenhu uami, kuma kia ngi fudisa kuia kindala ku Kolindo mukonda enu nga mi fikixila.

²⁴ Ki kuila tuala ni ukota ua kutumina o kuxikana kuenu, maji tuala tu akuatekexi a ngalasa ienu.