II Jisobha 18 - O Mikanda Ikola

O utuminu ua Ezekiia sobha ia Juda. Kultu ia Jihova

¹ Hé ki bhita-phe kuila, mu ku tula mu muvu ua katatu ua utuminu ua Ozeia, monʼa Hela, sobha ia Izalaiele, kiene kiandeka Ezekiia, monʼa Akaji, sobha ia Juda, o kutumina mua Juda.

² Kioso ki andeka o kutumina, uala ngó mu kitala kia makuinhi aiadi a mivu ni kitanu, iú ua tumina makuinhi aiadi a mivu nʼivua mu Jeluzaleme; o dijina dia manhʼâ Abi, monʼa Zakadiia.

³ Iú ua bhanga jinga ima ia iuka bhu pholo ia Jihova, kala kioso kia i bhanga jinga Davidi, dia tatʼâ.

⁴ Kuma muenʼiú ua katula o matala oso, o italamu ioso ua i bula-bula, o mixitu ua i kokela bhoxi, o nhoka ia utadi ia bhangele Mozé muene ua i tuetujula; mukonda katé hanji bhu kizuua kieneʼokio, o anʼa Izalele a kexi mu i ohela uasu ua dizumba ni ku ixana, exi: Nehuxtane.

⁵ Ma kudielela Jihova, Nzambi ia Izalaiele, ki kua kexile muthu uoso u soka ni muene mu sobha joso ja Juda, kixi ió a mu diangelele, uixi ió a kaiela kua muene.

⁶ Mukonda ua di-bande kua Jihova, o kuene ka tundu-ku dingi, iu uaiuka jinga o ijila ioso ia bhele (Jihova) kua Mozé.

⁷ Kienʼiki ue o Jihova iú ua kexile jinge ni muene; o kuoso-kuoso kuʼaia, o uendelu uê ua ku di-langa kinéne; muene anga u bilukila sobha ia Asídia, u di-tuna ku mu bhikila.

⁸ O akua Fidíxia u a tolola katé mu Ngaza, katé muene mu jimbambe jâ, tundé ku inzu ia matala ia akua kilangidilu katé mu mbonge ia kimbaka.

⁹ Anga ki bhita kuila, mu muvu ua kauana ua sobha Ezekiia, (uene-phe ua kasambuadi ua Hozeia, monʼa Hela, sobha ia Izalaiele), kiene kia bande Salamanazale, sobha ia Asídia, mu kulua ni Samádia, anga o mbonge u i kondoloka ni masoladi.

¹⁰ O kiabhu mivu itatu, mbonge ia toloka; kiene muene, mu muvu ua kasamanu ua sobha Ezekiia, uene-phe o muvu ua kʼavua ua Hozeia, sobha ia Izalaiele, uene ua tambula na-u Samádia.

¹¹ Anga akua Izalaiele a a balakala ku Asídia kuala sobha ia Asídia; iú ua a tumikisa ku Hala ni ku Habolo, kua zukama ni ngiji ia Ngozane ni mu jisanzala ja akua Mediia phala a tunge momo.

¹² Kuma a fulu kutumaka o dízui dia Jihova, Nzambi iâ, o kikutu kia te-nâ Jihova, ene a ki tundu ufe; o ioso ia a tendelela Mozé, o mukalakadi ua Jihova, ene nguâ-uâ ku ivua, nguâ ku i bhanga.

Senakedibe u lua Juda

¹³ Maji ue, ku tula mu muvu ua kuinhi ni kiuana ua utuminu ua sobha Ezekiia, o Senakedibe, sobha ia Asídia, ua bande mu kúlua ni jimbonge ja nguzu, ja di xitila imbaka mua Juda, ií ua ji tolola.

¹⁴ Bhenhobho Ezekiia, sobha ia Juda, ua tumu kutangela sobha ia Asídia, bhu Lakiji, kuila: Nga te mulonga! Ngi sondoloke nga ku diondo; o ioso i u ngi xinda, ngi ku bhekela-iu. Kieneʼokio-phe o sobha ia Asídia iú ua xindi kua Ezekiia sobha ia Juda hama jitatu ja jitalendu ja phalata ni makuinhi a tatu a talendu ja ulu.

¹⁵ Ezekiia bhenhobho hé u mu bhana o phalata ioso ia kexile mʼonzo ia Jihova ni iii ioso ia kexile mu malundilu a dibhata dia sobha.

¹⁶ Mu thembu ieneʼoio kiene Ezekiia kia batula o ulu ua kexile ku mabhitu a Tembulu ia Jihova ni ku jiphidika jê kua u xiile Ezekiia dia sobha ia Juda muene, iú ua u bhana sobha ia Asídia.

¹⁷ Sumbala kiene, maji o sobha ia Asídia hanji a tumikisa Talatana, ni Labesadi, ni Labesaki, hé a tunda bhu Lakiji ni kifuẋi kia dikota kia masoladi, aia kua sobha Ezekiia, mu Jeluzaleme; anga a banda, eza mu Jeluzaleme; o ene kia bande ia eza kua muene, emana bhu mulombo ua dijiia dia dikota dia lulama ku njila ia mukáu ua musukuidi.

¹⁸ O kiexana sobha, kua tundu Eliiakime dia monʼa Hilikiia, o kimbadi, ni Sebena, o musoneki, ni Nzoua dia monʼa Azafe, o thandala.

Labesaki u lebhula Ezekiia ni Jihova

¹⁹ Anga Labesaki u a tangela, uixi: O Ezekiia mu tangedienu, kuila: O sobha ia Asídia, sobha ia dikota, uambe kiki: Eie, o kudielela kuenhuku, kudielela kuahi ku uala-na-ku? Kima kiahi ki ua dielela?

²⁰ O ki ua mu ki tanga eie, (mu kanu dié ngoho), uixi: Nga sokobho o kuta kikutu ni kutena kúlua ita. Nanhi muene ua mu dielela kindala, phala eie ku ngi balukila?

²¹ Eie-phe ua dielela Ijitu, o mbangala ia bukukʼoio, ia bhingi se muthu u i kuata ni nguzu mu ku sota kudi-fikidila, iene i mu bokuena bhu kanda dia lukuaku hé i mu tundila ku kanga? Kiene-zʼiki kiala Falaó, sobha ia Ijitu, phala oso a mu dielela muene.

²² O ki mu ngʼila-phe, muexi: Tua dielela kua Jihova Nzambi ietu; manhi ki muenʼiú, a mu katuila o matala ni jikalatódio kuala Ezekiia, iú uambela Juda ni Jeluzaleme, uixi: Bhu Kalatódio kaka, kala mu Jeluzaleme, bhene ngó bhu mu fukamena?

²³ Tala-ze, kiki-phe, bhana jihutile kua muadiʼami, sobha ia Asídia, nda eme ngi ku bhane hulukaji jiiadi ja jikabalu, mba eie u tena ku ji muena asambedi oso a ji mondala.

²⁴ Eie u tena kiebhi o ku kuatesa sonhi ku kilamba kimoxi ngó ku ilamba iofele ia mu bhikila ngana iami? Inga ua dielela Ijitu mukonda dia kuvula makalu ni athu a a sambela?

²⁵ Inga ua fika kuila eme nga dʼijiia ngó ni kubanda eme mueneʼami mu kumuanga o kididi kiki, ki Jihova ua ngi tumu? Jihova muenemuène ua ngi tumu, uixi: Banda, uie ku ixi iii, u i muanga-muange.

²⁶ Bhenhobho ni Eliiakime, monʼa Hilikiia, ni Sebena, ni Nzoua, ambela Labesaki, exi: Tua kudiondo, etu tu abhikʼé, tu zuelesele mu mbimbi ia akua Sídia, kuma tu ivua muene kiambote, kana ku tu zuelesela bhu pholo ia mundu iú, uala ku thandu dia kimbaka, mu mbimbi ia akua Judeia.

²⁷ Maji Labesaki ua a vutuila uixi: Manhi o ngana iami ua ngi tumu o ku ku tangela ngoho eie ni muadiʼé o maka musoʼama? Manhi o maka iá ka a tumu ue, kotakota, o ku ambela o mundu uenʼiú ua xikama ku thandu dia kimbaka phala nʼadie o tuji tuâ ene kumoxi ni enu, nʼanue ue o masu mâ-ene-muèniʼèlele?

²⁸ Kieneʼokio o Labesaki unzangamana, hé u di-kola ni dízui dia suína mu mbimbi ia akua Judeia iene, uzuela, uixi: Ivuenu maka a sobha ia dikota, o sobha ia Asídia.

²⁹ Sobha uambe kiki, uixi: O Ezekiia ka mi tobhese; mukonda kʼanda kutena ku mi bhulula bhu lukuaku luê;

³⁰ ni ngó ue bhuʼofele, Ezekiia ka mi dielelese kua Jihova, kuamba: Kidi muene, Jihova ua-nda ku tu bhulula, o mbonge iii ka-nda ku i bhakula bhu maku ma sobha ia Asídia.

³¹ Ezekiia-phe kana ku mu bhana mátui, kuma o sobha ia Asídia uambe kiki, uixi: Tenu maka nʼeme, muize kokuami ni mibhaku, nda muthu ni muthu a die ku muvide uê, ni ku mufiku uê, ni kúnua o menha a tunda bhu fixi iêmuène-muene.

³² Katé bhu ngʼijila mu ku miʼambata ku ixi ia di-fuangana ni ienu-iene; ixi ia tiliku ni uálua; ixi ia mbolo ni vinhu; ixi iezala midívua, ni maji, ni uiki; o kuenhoko mua kà kola muenhu, ki mu-fu, kana; o Ezekiia-phe ki muende ni ku muʼivua; mukonda uandala ku mi balukisa, uixi: Jihova ua-nda ku tu kudila.

³³ Manhi o jinzambi ja akua jixi jengi, ja tena kuila, kala nzambi i bhulula o ixi iê, bhu lukuaku lua sobha ia Asídia?

³⁴ O jinzambi ja Hamate ni Alapade, jiʼkuebhi? O jinzambi ja Sefalavaime, ni Hena ni Iva, a ji bhange kiê? Mbebhu jene ja tenene kubhulula Samádia bhu lukuaku luami?

³⁵ Mu kaẋi ka jinzambi josuʼiji, ja akua jixi, jebhiʼbhu ja tenene kubhulula o ixi iâ bhu lukuaku luami, phala ue o Jihova a tene ku bhulula Jeluzaleme bhu lukuaku luami?

³⁶ Maji o mundu uoso muene ni kuene hudí, ka mu vutuila ngó né kizuelu kimoxi, kuma, o sobha ua tumine kutanga, kuamba: Kana ku mu vutuila.

³⁷ Kieneʼokio ni Eliiakime dia monʼa Hilikiia, o kimbadi, ni Sebena, o musoneki, ni Nzoua dia monʼa Asafe, o thandala, a vutuka kua Ezekiia mu ku di-mona-nê, ni izuatu ia tandujuka, hé a muʼijidisa o maka oso a tange Labesaki.