Habakuke 3 - O Mikanda Ikola

Musambu ua Habakuke

¹ Musambu ua polofeta Habakuke, uila kala ua-lu kuimba, uixi:

² Jihova ngevu, maka mé mu uazuela, o uoma iu ua ngi kuata! Kikalakalu kié u Jihova, bhana-kiu dingi muenhu ku mivu ioso, o i uazuela enda ni ku i ijidisa dingi ku mivu ni mivu; kioso ki u thathamana jinga lembalala, Ngana, o kulenduka kué!

³ Nzambi uijiia ku Tamane, ió Ukôla uijiia ku mulundu ua Palane. (Selah) Fuma iê iezalesa o diulu, o ixi ue iezala ni diximanu diê.

⁴ O kubenha kuê kuèla kala mukengeji, jinzanji jikala mu tunda bhu lukuaku luê; bhenhobho bhene bhua suama o kutena kua nguzu iê.

⁵ Dibhebhu dia kipheku dia mu tuamenena ku pholo, ni imuiku ia túbhia bhoxi dia inama iê.

⁶ Uemana, anga u kala mu kuzonga ixi; ua tale, iu ua uanununa o miji; o milundu iòkulu i sekumuka anga i kituka fufuta, o tu-thuthulundu tua makulu ni makombe, tu senguluka, anga tu jikinina, maji o jinjila ja Nzambi ja kaiela-ku.

⁷ Nga mono jibalaka ja Kuzane ja disuuata ni malamba; o ibènge ia ixi ia Midiiana i kala mu teketa.

⁸ O kuila, eie Ngana, ua thathamena o jingiji? Mba o jihonga jʼòfele ji ua thathamena, inga o musanza ua kalunga u ua temena, phala eie uendele kiki ku thanduʼa jikabalu jé ku ua mondala ni kuthanduʼa makalu mé ma kutoluela ita.

⁹ Mufula ué ua u tukulula katé ki ua di monekena uene uoso; o kuloka kua miloko i ua lokela o ifuẋi, ia di bhange iene o misongo iezala mu kizu kié. (Selah) Eie ixi ua i bulu ì ia di bhange jingiji.

¹⁰ O milundu ia ku mono, ì ia teketa; kua bhiti kihungulule kia menha; o dikungu dia mukiukuluku, ki di moneka hole, a dʼivu dízui diê ni kuleka muene o maku mê bhulu.

¹¹ Ni dikumbi ni mbeji, emana muene mu mazekelu mâ; anga a kala mu ku tala o mifula ia Ngana ia uama túbhia, o ni itelu-telu ia jinzaji ja dionga diê.

¹² Jihova ixi ua iendela ni njinda, o miji ua i titidila ni kutema kuê.

¹³ Eie ueza phala ubhulukilu ua povo ié, Eie ueza phala ubhulukilu ua ió ua mʼundu ni maji; o inzu ia mukua phulu, eie ua i bukula o mukambu ua hongo, eie ua i vulumuna o madisesa mê katé koxi.

¹⁴ Mazonda mê ma ita, eie ua a ṗhuangununa o mútue ni makoue ma ene muene; ene a di lukuila kokuami mukuâ ni kitembu kia vulu phala ku ngi muanga; a sangulukile mudiâ kala ala mu sota kuminha o ngadiama, mu kasuekele.

¹⁵ Eie-phe, ni tubalu tué, uendela ku thanduʼa kalunga ka musanza ua imenha iavulu kinéne!

¹⁶ Eme mu ku kʼivua, mu mala mua ngi bunguluka, mizumbu iami ia nguenguena mu kuívua o kilungutu kia dízui diâ; kilukutu kia kubola kia ngi bokona mu ifuba iami, anga moxiʼomo ngi kala mù teketa mudiʼami; nga-nda kunhoha anga ngʼila muene hudí mu kukinga o kizuua kia malamba mâ, Ngana kià kʼèjila o povo iene kusot, o ku tu jikinisa.

¹⁷ Kuma né-mbe hanji o mufiku ki u tulula, mba ku kala ibundu ku muvide; o ibundu ia mudiva i kala makutu, o mábhia ue a kamba kubhana idima; o jimbudi joso ja kilunga a jʼambata, anga mu ibhanga ioso mu xalʼé ngó sé jingombe;

¹⁸ né kienhókio, eme hanji nga kà sangulukila mua Jihova; nga kà tumbujuka ni ngalasa mua Nzambi ia ubhulukilu uami.

¹⁹ Jihova, Nzambi, muene nguzu iami, muene ua kà suinisa inama iami ni i sokela ni ia jihoha ku milundu, ua kà ngendesa mu ididi ia di leka!