Efezo 3 - O Mikanda Ikola

Lelu a kʼijiia kuma Nzambi uexana ni matumbu. Phaulu mukunji ua ku a tangela o Njimbu

¹ Mukonda dia kiki, eme Phaulu, ngi Pelezu ia Kristu Jezú, mu mulonga uenu mu akua matumbu.

² Mbata nga fika kuila ki mu kamba ku kʼivua o ukunji ua ngi bhana mu kiadi kia Nzambi, phala mbote ienu.

³ Kuma o kikutu kia Nzambi kia suekele, ua ngi idikiza-kiu mu kisumua. (Tu-maka tutu eme nga tu soneka kiá,

⁴ se mu tu tanga kiambote muanda kuijiia kuma o kikutu kia Kristu eme kia ngi jimbulukila).

⁵ Mʼ ukulu ku miji iamukuâ o kikutu kiki kà edikisile-kiu luua; o kiki-phe Nzambi mu Nzumbi iê ua ki tukuluila o Jipoxolo jê jangene ni Jipolofeta.

⁶ O kikutu kieniiki: Mukonda dia Njimbu Iambote, o akua jixi jengi, ala uâ mu kisangela kumoxi ni Jijudé mu mabesá moso ma Nzambi. Kuma ala idiandu ku mukutu uene umoxi; akua kisangela mu polomesa ia bhana Nzambi mua Kristu Jezú.

⁷ Iene o Njimbu Iambote ia ngi katuila kuma ngi ngunza, mukonda dia kiadi kia Nzambi kia ngi bhana mu kukalakala kua nguzu iê.

⁸ Eme muene ngala ngi ndenge ia jindene mu ʼaxaxe ka akua Ngana oso. Maji o Nzambi ua ngi bhange ujitu uosʼú ua ku ngi bhana o kutudila matumbu o Njimbu Iambote, ia jimbongo ja Kristu, jolémbue ku ji tongolola.

⁹ Phala ue kuidikisa athu oso o kikutu kiki kia kexile kiòsueke tundé xàhulu kua Nzambi ua bhanga o ima ioso.

¹⁰ Phala o kiki, atumini ni a-kutende ku ididi ia diulu a ki muena ku Ngeleja, kioso ki enda o unjimu ua Nzambi ua vula matelu.

¹¹ Nzambi ua bhange kiki kala ki andala muène mu kikanenu kiê kiòkulu-kulu kia tenesena mua Kristu Jezú, Ngana ietu.

¹² O mu kuongama kuetu ni Kristu, mua muène tua-bhu o uôma, kuma tua tambula disesa dia kubhiẋila bhu pholo ia Nzambi, mukonda dia ku mu xikana.

¹³ Uila kiki, nga mi bhingi kuila kana kukala ni usudi mukonda dia jihadi ji ngala ku mi talela, inda ji kale jenu ja kutambula fuma.

O musambu ua Phaulu

¹⁴ Mukonda dia kiki, nga fukama jiphuna bhu pholo ia Tata ia Ngana ietu Jezú Kristu,

¹⁵ kua tundu o kidifua kia utata uoso mu diulu ni mu ngongo,

¹⁶ eme ngala kubhinga kua Nzambi phala a mi bhane kala kia fuama mu jimbongo ja unéne uê, o kukala ni nguzu dingi iavulu ia Nzumbi iê ku muthu uenu moxi.

¹⁷ Eme nga mu bhinga dingi phala Kristu a mi tunge ku miẋima ienu mu kuxikana. Nga mu samba phala o ki muila mua te jindanji, mua kuata, mua xikama mu henda,

¹⁸ mu kale mu athu mua tena kutongolola kumoxi ni akua Ngana oso, kioso ki soka o kukula, ni kulebha, ni kuzonga, ni kitala,

¹⁹ ni kuijiia o henda ia Kristu ia tundu o kuijiia kuoso, ni mu kale ni kuizala ni kuizala kuoso kua Nzambi.

²⁰ Kiki o Nzambi muenʼió ua soko-bhu kubhanga ioso i tua tena o kubhinga, ni ioso i tua tena o kubanza, nʼa te-ku dingi kiatundu kiavulu, mu nguzu iê i tu kalakala moxi,

²¹ Nzambi muène a tambule fuma ni ku Ngeleja, ni mua Kristu Jezú, ku miji ioso katé ku hádia ni hádia! Amén.