Dialuilu 8 - O Mikanda Ikola

O kuuika Tundeia

¹ Jihova anga u ambela Mozé, uixi:

² Ambela Alá kuma, kioso ki u uika tundeia, sambuadi dia tundeia tu muikina bhuoso bhuemana o kaxtisale.

³ Alá anga u ki bhanga; u uika tundeia, phala tu muikine ku pholo bhuoso bhuemana kaxtisale, kala kia tumu Jihova kua Mozé.

⁴ Ufunu ua kaxtisale ua kusula, ulu uoso; tundé mbunda iê ia kutula bhoxi katé ku itulu iê, iene ioso ufunu ua kusula; ulungu uê uedikiza Jihova kua Mozé, uene ua kaiela mu kuiudika o kaxtisale.

Kubonza Jilevita

⁵ Jihova anga u ambela Mozé, uixi:

⁶ Katula Jilevita muʼaxaxi ka Izalaiele, u a bonze.

⁷ U a bhanga kienhiki mu ku a bonza: u a sangela menha ma dibônzo, a bhitisa phoko ia bhutu ku mukutu uoso, a sukule izuatu iâ, a dʼiẋike, a zele.

⁸ A kuate-phe kangombe ka ndumbe, ni mubhaku uê ua mákudia, fuba ia kábhia iólunge ni maji, ni kangombe kamukuá ka ndumbe, a ku bhane-ku mu sata ia kituxi.

⁹ Jilevita anga a a bheka bhu muelu ua balaka ia kutakanena; anga u bhongolola kifuẋi kioso kia Izalaiele;

¹⁰ anga u bheka Jilevita bhu pholo ia Jihova. Anʼa Izalaiele bhenhobho a tule maku mâ ku thandu dia Jilevita;

¹¹ Alá anga u bhukila Jilevita bhu pholo ia Jihova, kifua sata ia kubhukila anʼa Izalaiele a a bhakula, phala ki kala kia ene o kubhanga kikalakalu kia ukunji ua Jihova.

¹² Jilevita anga a tula maku mâ ku mítue ia tungombe tua ndumbe; kamoxi u ka bhana mu sata ia kituxi, kamoxi u ka bhana mu sata ia kuoha, a tu satela Jihova, phala Jilevita ku a bhuisa o ikuma,

¹³ Jilevita anga u ji bhaka bhu pholo ia Alá ni bhu pholo ia anʼê, u ji bhakula kua Jihova kala sata ia kubhukila.

¹⁴ Kiene ki u tungula Jilevitʼiki muʼaxaxi ka anʼa Izalaiele; Jilevita-phe a kale ami.

¹⁵ O ki u zubha kubhanga kiki, kiene kiua ki uehela Jilevita kubhanga kikalakalu kiâ mu balaka ia kutakanena; u a bonza, u a bhakula kala sata ia kubhukila.

¹⁶ A ngi bhakuila-nâ kuala anʼa Izalaiele ni akuâ, bhu kididi kia ana oso a jikula divumu, bhu kididi kia ana oso a phande-kumbi; kiene muene ki nga a tambuila.

¹⁷ Kuma ana oso a phande-kumbi muʼaxaxi ka anʼa Izalaiele amiʼeme, ni ku athu ni ku ibhaku; tunde mu kizuua ki nga beta ana oso a phande-kumbi mʼoxi ia Ijitu, kiene ki nga di lumbila-nâ.

¹⁸ Kala kiki, nga tambula Jilevita bhu kididi kia ana oso a phande-kumbi mua Izalaiele.

¹⁹ Jilevita-phe nga ji bhana kala ujitu kua Alá ni kua anʼê, nga ji katula muʼaxaxi ka anʼa Izalaiele, phala a kalakale bhu kididi kia anʼa Izalaiele mu kikalakalu kia balaka ia kutakanena, phala a bhuise ikuma ia anʼa Izalaiele, phala ki mu kale dibhebhu muʼaxaxi ka anʼa Izalaiele, kioso anʼa Izalaiele kia zukama bhu dibhezelu.

²⁰ Ni Mozé ni Alá ni kifuẋi kioso kia anʼa Izalaiele, anga a bhanga kienhiki ku Jilevita; kioso kia tumu Jihova kua Mozé, ku mbandu ia Jilevita, anʼa Izalaiele kiene muene kia a bhange.

²¹ Jilevita anga a di zelesa phala a bhue ituxi, a sukula izuatu iâ, Alá anga ua bhakula kua Jihova kala sata ia kubhukila; Alá anga ua satela mu ku a bhuisa o ikuma.

²² Kia zubha ku a bhanga kiki, kiene kia bokona Jilevita mu kubhanga kikalakalu kiâ mu balaka ia kutakanena, bhu pholo ia Alá, ni anʼê; kioso kia tumu Jihova kua Mozé, ku mbandu ia Jilevita, kiene muene kia a bhange.

²³ Jihova anga u ambela Mozé, uixi:

²⁴ Kia tokala Jilevita kienhiki: Oso ala mu makuinhi aiadi a muvu ni itanu, mba a te-ku, ene a bokona ku ukuenze ua kukalakala mu balaka ia kutakanena;

²⁵ tundé-phe kia bhiẋila mu makuinhi atanu a muvu, ku ukuenze ua kukalakala kaii-ku dingi, u nhoha-ku kiá,

²⁶ se uedi ukuatekesa akuâ, mu tambula konda ia imbamba mu balaka ia kutakanena, u ki bhanga, maji kia muxima uê, kala dingi ni kikalakalu kia mu tokala. Kiene ki u bhangʼiki mu kusokesa kikalakalu kia Jilevita.