Dialuilu 5 - O Mikanda Ikola

Akua dibhute, ni ió a kasana, a a tubhula mu kibangu

¹ Jihova anga u ambela Mozé, uixi:

² Tuma anʼa Izalaiele, a tubhule mu kibangu oso a kate dibhute, ni oso ku mikutu iâ kuala kutunda ima iabolo, ni oso a kasana mukonda dia imbi;

³ a kale diiala, a kale muhatu, mu a tubhula mu kibangu, a kale ku kanga, phala ka kasanese kibangu, mukonda eme muene nga tungu mu kibangu.

⁴ Anʼa Izalaiele anga a ki bhanga, a a tubhula mu kibangu; kala kia tange Jihova kua Mozé, kiene kia bhange anʼa Izalaiele.

O kijila kia kufuta milonga

⁵ Jihova anga u ambela dingi Mozé, uixi:

⁶ Tangela anʼa izalaiele, hé diiala mba muhatu u ta kituxi kioso-kioso, kiene kuta muthu, anga u bhukumukina Jihova, muthu ió uala ni kuêla.

⁷ U bhinga-phe, u fisala kituxi kiê kioso kia te; u bhaka mulonga kioso ki ua tokala, u ta-ku dingi mbandu ia katanu ia kiki kia futu, a bhane kua ió uoso mukua mulonga uê.

⁸ Mukua mulonga se ua fu, ka xi dilemba kua tokala ku bhaka mulonga, a bhane kiá kua Jihova, ki kale kiangene kia nganga; kumoxi ni kilumbe kia mbudi kia sata ia kiluuluilu ia-nda ku mu luulula.

⁹ Kiene ue, ujitu uoso ua anʼa Izalaiele, ua ima ia kulumba, ua bhakula kua nganga, u kale ua nganga muene;

¹⁰ ima ikôla ia bhake muthu uoso-uoso, iangene ia muene; kioso kia bhana muthu kua nganga, kiê-muène.

Kunuisa muhatu mukonda dia ku mu fika ni phanda

¹¹ Jihova anga u ambela dingi Mozé, uixi:

¹² Ambela anʼa Izalaiele ua tangela kiki: Hé mukajiʼa muthu u dianguka hé u ta kituxi kua muadi uê,

¹³ diiala diengi anga u zeka-nê, muadi uê ka kʼijiia, a ki sueka, muhatu ua kasana, o kiene ki kiala mbangi, ki bhuala ua a kuatela mu kituxi,

¹⁴ o diiala diê-phe kua muiza muxima ua difuba, muhatu ua te kituxi; iú uala ku mu kuatela difuba, mba ue difuba diê ngó, muhatu ka te kituxi,

¹⁵ bhenhobho diiala u bhinga u bheka mukajʼê kua nganga, ni mubhaku uê uiza na-u, mbamdu ia kakuinhi ku efah ia fuba ia sevada; ka lunduluila-ku-phe maji, ka te-ku ue uasu ua dizumba kuma mubhaku ua kúdia kua difuba, ua kufika kiaiibha, mubhaku ua dibanzelu, u bhekela ku banza o kituxi.

¹⁶ Nganga anga u mu sunga bhua zukama, u mu bheka bhu pholo ia Jihova;

¹⁷ nganga-phe u katula menha akôla, mu kitutu kia mavu; o ku fufuta ia bhoxi mu balaka u zangula-ku ue, u ta mu menha.

¹⁸ Nganga anga u bheka muhatu bhu pholo ia Jihova, kindemba ku mútue ua muhatu a ki vungununa, ki kala ngó, o mubhaku ua makudia ua dibanzelu a mu kuatesa-u bhu maku, o mubhaku ua mákudia ua difuba; nganga-phe muene u kuata ni lukuaku luê o menha alulu a bheka mázui.

¹⁹ Nganga anga u mu lokesa, u ambela muhatu: se kuende ni diiala, se kua dianguka mu bhanga ufusa, eʼmuene u mukajiʼa muthu, menha iá alulu a bheka mázui, ka ku bhange kima.

²⁰ Maji-phe se ua ki bhange, eʼmuene u mukajiʼa muthu, se ua bhange ufusa, sai diiala ua zeka-nê, ki muene muadi uê,

²¹ (bhenhobho-phe nganga u lokesa muhatu mulôko ua mázui, u ambela muhatu kiki:) Jihova a ku bhange u mukua mázui, u mukua kisunji mu kaẋi ka kifuẋi kié, a bhangese ditabela dié ku kamba nguzu, divumu dié di jimba.

²² Menha iá a bheka mázui, a ku bokone mu divumu, a bhangese ditabela dié ku kamba nguzu, divumu dié di jimba, Mu hatu-phe ua kèla, Amene, Amene!

²³ Nganga anga u soneka mázui oso iá mu divulu, anga ua jimuina mu menha alulu enhá:

²⁴ Muhatu anga u mu nuisa menha alulu a bheka mázui; menha-phe enʼiá a tesa mázui a mu bokona, hé a ludila momo.

²⁵ Nganga anga u tambula mubhaku ua makúdia ma difuba, uala bhu maku a muhatu, u kala mu bhuka mubhaku ua makúdia bhu pholo ia Jihova, hé u u bheka ku kalatódio;

²⁶ nganga anga u katula dibhûbhu ku mubhaku ua makúdia, o mubhaku ua dibanzelu, hé u di ohela ku kalatódio; anga ua ká nuisa o menha ku muhatu;

²⁷ o kia zubha ku mu nuisa menha, se kia kidi muene ua bhange ufusa, ua te kituxi kua muadi uê, menha-phe ma bheka mázui ma mu bokona bhenhobho, ma bheka misusu, katé divumu diê di jimba, ditabela di zoza, muhatu ió-phe u kala kisunji mu kaẋi ka akuá.

²⁸ O ki kala-phe ka bhangé ufusa, ua zediê, ki ku mu bhiti kima, ni kuaia u bhanga muiji.

²⁹ Kiene kijilʼiki kia difuba, hé mukajiʼa muthu u dianguka, anga u bhanga ufusa;

³⁰ mba muxima ua difuba ua kuata diiala, mukajʼê ua mu fika ima iaiibha; u bheka-phe muhatu kua Jihova, nganga anga u mu bhitisa ku utalelu ua kijila kiosuʼiki.

³¹ Diiala ka kala ni kuêla, muhatu-phe ki kala ʻlamba dia kituxi kiê.