Dialuilu 36 - O Mikanda Ikola

Undundu ua ahatu mu kusakana

¹ Mítue ia mabhata ma jitata, mu kuvuadiua kua Ngiliiade, monʼa Makidi, monʼa Manasa, kia vuadiua anʼa Zuze, a bhiẋila, anga a zuela ni Mozé, bhu pholo ia ilamba, bhu pholo ia mítue ia mabhata ma jitata, mu anʼa Izalaiele,

² a zuela, exi: Jihova ua tumu ngana ietu kuuanena anʼa Izalaiele ni jisorte o ixi iii ia undundu uâ; ngana ietu a mu tumu ue kuala Jihova kuila undundu ua Phangʼietu Zelofadi, anʼê a ahatu a u lundula.

³ Ene-phe, se a sakana anʼa mala ku miji ia mukuá, ia anʼa Izalaiele, undundu uâ a-nda ku u katula ku undundu ua jitata jetu, nʼa u bandekeza ku undundu ua muiji uengi, kuoso kuaii mu bhata dia kusakana; kala kiki, etu undundu uetu uia ni kutebhunuka.

⁴ Kutula ku muvu ua ufolo ua anʼa Izalaiele, undundu uâ ua-nda kuxalela ku muiji, koko, kuoso kuaii mu sakana; kala kiki, undundu uâ a u katula ku undundu ua jitata jetu, iu uela kiá kuengi.

⁵ Mozé anga u tuma anʼa Izalaiele mu kizuelu kia Jihova, uixi: Muiji ua anʼa Zuze, kidi kiâ kia zuela.

⁶ Ku maka-phe ma anʼa Zelofadi a ahatu, kia zuela Jihova, kienhiki: A sakane kioso kia di sola ni miẋima iâ, maji ki kale a sakanena mu mabhata ma muiji ua tatʼâ.

⁷ Ki ki bhite kuila undundu a u tebhununa ku muiji iú, nʼa u bandekeza ku muiji ió; ki kale-phe anʼa Izalaiele ene oso a naminine ku undundu ua muiji ua jitata jâ.

⁸ Uoso mona ua muhatu ua lundula undundu uoso-uoso mu muiji uoso ua anʼa Izalaiele, kieza mu kusakana, ki kale u sakana diiala dia tokala ku dibhata dia muiji ua tatʼâ.

⁹ Kienhókio undundu ki ua kèla u tunda muiji uiza muiji, kuma anʼa Izalaiele ene oso a bhiẋila ni kulundula mu undundu ua jitata jâ.

¹⁰ Kala kia tumu Jihova kua Mozé, kiene kia bhange anʼa Zelofadi a ahatu;

¹¹ kuma Makala, ni Tidiza, ni Hokala, ni Midika, ni Noua, anʼa Zelofadi a ahatu, ene oso a sakana ni mala anʼa jiphange ja tatʼâ.

¹² A sakana mu mabhata ma anʼa Manasa, monʼa Zuze, kuene kua sakanena; undundu uâ iú ua kala mu muiji ua tatʼâ.

¹³ Iene itumuʼiii ni jingonge ja tumu Jihova kua Mozé, phala a ji tendelele, anʼa Izalaiele, kioso kiala mu dinhana dia Mouabhe, bhu mbandu ia Njolodá, sámbua dia lulama ni Jedikó.