Dialuilu 35 - O Mikanda Ikola

Mabhata ma Jilevita

¹ Jihova anga u ambela Mozé mu dinhana dia Mouabhe, bhu mbandu ia Njolodá, sámbua dia lulama ni Jedikó, uixi:

² Tuma anʼa Izalaiele kuma mu jixi jâ, ja kà tambula mu undundu, Jilevita a a bhane-ku jimbonge ja kutungila; a a bhane ni míkáu i zukama ku jimbonge mu jimbandu.

³ Jimbonge ji kala ja kutungila; o mikáu-phe i kala mbebhu jingombe jâ kudila, ididi ia imbamba iâ, ni ibhaku iâ ioso.

⁴ O mikáu i mu bhana Jilevita, i kala mbambe iê midi ia kóvadu tundé ku kimbaka, i kondoloka muene dibhata dioso.

⁵ Kuema dia mbonge mua kà zonga midi jiiadi ja kóvadu, mbambe iê ia thunda; midi jiiadi ja kóvadu, mbambe iê ia sulu; midi jiiadi ja kóvadu, mbambe iê ia luiji; midi jiiadi ja kóvadu, mbambe iê ia ku suku; dibhata ni kimbaka kiê di kala mu kaẋi. Uene mukáu ua tokala ni mbonge ioio.

⁶ Ku jimbonge-phe ji mu bhana Jilevita, bhu kala mbonge jisamanu, ji kala jimbonge ja kukondamena, ja kuila uoso ua jibha muthu kuene kua lengela; ku jimbonge jisamanuʼiji, ku di ta dingi makuinhi auana a mbonge ni kiiadi, ji mu bhana Jilevita.

⁷ Jimbonge joso ji mu bhana Jilevita, ji kala makuinhi auana a mbonge ni nake; mu ji bhana ni mikáu iâ.

⁸ Mu ku a solela ididi mu ixi i mua uanena anʼa Izalaiele, a a bhana ixi ia dikota, ene a kala kota mu bhana ididi ku Jilevita, a a bhana ixi iatolo, a kala ndenge mu bhana ididi ia Jilevita; ididi mu i sokesa kiambote, mu undundu ua ene.

O jimbonge ja dilengelu

⁹ Jihova anga u zuela dingi ni Mozé, uixi:

¹⁰ Ambela anʼa Izalaiele, u a tangela, kuma: Kioso ki mu zaúka Njolodá, hé mu kubokona ixi ia Kanana,

¹¹ mua kà sola jimbonge, ji mi kala muene bhua zukama ji kala jimbonge ja kukondamena, phala uoso ua jibha muthu, ka ki bhange luelu, kuene kua lengela.

¹² Ji kala jimbonge ja kulengela; hé muthu ala ku mu kaia kuala muzokediʼa manhinga, phala ka fue, katé kiʼemana bhu pholo ia kilômbo, nʼa mu fundise.

¹³ Ku jimbonge jiji, ji mu tungula, ji kala mbonge jisamanu, jenu ja kukondamena.

¹⁴ Jitatu ji kala ku sámbua kunu dia Njolodá, jitatu ji kala mʼoxi ia Kanana; ji kala jimbonge ja kulengela.

¹⁵ Kixi anʼa Izalaiele, kixi musonhi, kixi nzuángiza ueza kutunga, ji kala jimbonge jâ ja kukondamena, mbebhu uoso ua jibha muthu, ka ki bhange luelu, kuene kua lengela.

¹⁶ Hé ua mu kuama ni felu, iú uafu, kijibhanganga muene; o kijibhanganga-phe mu mu jibha muene.

¹⁷ Hé ua mu kuama ni ditadi dia kuata, di tena kujibha muthu, muthu iú uafu, kijibhanganga muene; o kijibhanganga-phe a mu jibha muene.

¹⁸ Ne-mbé ua mu beta ni muxi ua kuata, u tena kujibha muthu, muthu iú uafu, kijibhanganga muene, o kijibhanganga-phe a mu jibha muene.

¹⁹ Muzokediʼa manhinga muene u jibha o kijibhanganga; bhuoso bhua takanena-nê, a mu jibhe.

²⁰ Hé ua mu nenguna mukonda ua mu zembe, mba ua mu batamena, hé u mu takula kimbamba, muthu iú ua fu,

²¹ mba ua mu beta ngó ni maku, mukonda dia ku mu zemba, katé kia fu; uoso ua beta mu mu jibha muene, mukonda kijibhanganga; muzokediʼa manhinga muene u jibha o kijibhanganga, bhuoso bhua takanena-nê.

²² Maji-phe, hé ua mu nenguna kala ua tukumuka, ka mu kala ni unguma mba ua mu takula ngó kimbamba, sé ku mu batamena;

²³ mba ua kundumuna ditadi di tena kujibha muthu, maji muthu ka mu mono, ua takula ngó muthu iú ua fu, maji ka mu zembe, kandalele ku mu bhanga phulu;

²⁴ bhenhobho-phe kilômbo ki fundisa iú ua beta ni iú muzokediʼa manhinga, kala ki tua bhana o ijiia iii;

²⁵ kilômbo-phe, a tambule iú ua jibha, bhu maku a muzokediʼa manhinga, a mu bheke dingi mu mbonge ia kukondamena, muoso mua lengelele; a tunge muenhomo katé bhu ufuilu ua nganga ia dikota, a mu undile ni maji akôla a kuundila.

²⁶ Ua jibha-phe, se u xia mu mbonge ia kukondamena, mukonda dia kima kioso-kioso, hé u somboka bhu mbambe iê,

²⁷ muzokediʼa manhinga nʼa mu sange ku kanga, bhu mbambe ia mbonge ia kukondamena ua somboka-bhu, muzokediʼa manhinga nʼa mu jibha, kèla kuma kituxi kia te.

²⁸ Mukonda ua tokalele u kala mu mbonge iê ia kukondamena, katé bhu ufuilu ua nganga ia dikota; nganga ia dikota-phe hé ua fu, ió a vutuke kiá ku ixi ia undundu uê, mulonga uabhu.

²⁹ Maka iá a kale ngonge ienu ia kufundisila, ku miji ienu ioso, ku mabhata menu moso.

³⁰ Uoso u jibha mukuâ kiluelu, kijibhanganga, a mu jibhila mu kuzuela kua jimbangi; mbangi imoxi-phe ki i tena kubjibhisa muthu mu umbangi uê.

³¹ Kia mukuá dingi, kijibhanganga ka tena ku di kula, hé uala muene muêdi; ki kale mu mu jibha muene.

³² Ua lengela mu mbonge iê ia kukondamena, ka tena ue ku di kula nʼa vutuke ku bhata, kikale u kinga katé bhu ufuilu ua nganga ia dikota.

³³ Kienhiki ixi i mua tungu ki mu i te lufuku; kuma o manhinga ma kijibha ma fukula ixi; ixi ki i xikina ku i bonza o lufuku lua manhinga ma kijibha, ki kale uoso ua jibha u bhana ue o manhinga mê.

³⁴ Ixi ki mu i fukule, ioso i mua tungu, muʼaxaxe ka ixi mu nga tungu ue eme; kuma eme Jihova nga tungu mu kaẋi ka anʼa Izalaiele.