Dialuilu 3 - O Mikanda Ikola

Anʼa Alá ni akua Levi a a tungula phala o kikalakalu kia balaka ia kutakanena

¹ Ingo ia vumu ienʼiii ia Alá ni Mozé, kizuua kia zuela Jihova ni Mozé mu mulundu ua Sinai.

² Majina ma anʼa Alá enhá: Nadabe, muene phande-kumbi, ni Abihu, ni Eliiazale, ni Itamale.

³ Enhá ene o majina ma anʼa Alá a mala, ene a undile ni ku a ta maji, anga maku mâ ma kala mòlumbe mu ku bhanga kikalakalu kia unganga.

⁴ Nadabe ni Abihu anga a fuila bhu pholo ia Jihova, kioso kia bhana tubhia tuengi kua Jihova mu kikangalakata kia Sinai, ene oso-phe ka xi mona; Eliiazale ni Itamale anga a bhikila ku unganga ku pholo ia tatʼâ Alá.

⁵ Jihova anga u zuela ni Mozé, uixi:

⁶ Muiji ua Levi eze bhua zukama, ua bheka bhu pholo ia nganga Alá, ende ni ku mu kalakela.

⁷ Aie ni ku mu langidila muene, a langidile ue kilômbo kioso, bhu kanga dia balaka ia kutakanena, ende ni kubhanga kikalakalu kioso kia balaka.

⁸ A kale ni muanu ua kulangidila o itutu ioso ia balaka ia kutakanena, ene a langidila anʼa Izalaiele, mu ku bhanga kikalakalu kia balaka.

⁹ Jilevita kifua ua bhana kua Alá, ni ku anʼê; Ene a di tungula mu anʼa Izalaiele mu ku a bhana kua muene.

¹⁰ Eie u tungula Alá ni anʼê, a xikamena kiá unganga uâ uene; muthu uengi uiza-bhu u kala muthu ua ku mu jibha.

¹¹ Jihova anga u ambela Mozé, uixi:

¹² Ua mono, eme nga solo jilevita muʼaxaxi ka anʼa Izalaiele, bhu kididi kia ana a phande-kumbi, a tuama kujikula divumu muʼaxaxi ka anʼa Izalaiele; Jilevita a kale ami-eme;

¹³ kuma ana oso a phande-kumbi a di bhange ami-eme; tundé kizuua ki nga beta ana oso a phande-kumbi mʼoxi ia Ijitu, nga di lumbila ana oso a pande-kumbi mua Izalaiele, ni ku athu ni ku ibhaku; a di bhange kiá ami-eme, eme ngi Jihova.

¹⁴ Jihova anga u ambela Mozé mu kikangalakata kia Sinai, uixi:

¹⁵ Alulenu anʼa Levi, ku mabhata ma jitata jâ ni mu kuvuadiua kuâ; anʼoso a mala tundé iú uala ngó mu mbeji imoxi katé ku ukota, u a xinda.

¹⁶ Mozé anga ua xinda mu kizuelu kia Jihova, kala kia mu tumu.

¹⁷ Anʼa Levi a mala majina mâ iâ: Ngelexone, ni Kohate, ni Meladi.

¹⁸ Anʼa Ngelexone majina mâ: Libini ni Ximei mu kuvuadiua kuâ.

¹⁹ Anʼa Kohate a mala, mu kuvuadiua kuâ: Analá, ni Isahale, ni Hebolone, ni Uziiele.

²⁰ Anʼa Meladi a mala, mu kuvuadiua kuâ: Mahali ni Muxi. Kuku kuene kuvuadiua kua Jilevita ku mabhata ma jitata jâ.

²¹ Kua Ngelexone kuene kua tundu akua Libini ni akua Ximei; mene o mabhata ma anʼa Ngelexone.

²² Kia a soneka mala oso tundé iú uala mu mbeji imoxi tulé ku makota, mua tundu sambuadi dia midi ni hama jitanu.

²³ Mabhata ma anʼa Ngelexone a ta kibangu kiâ ku dima dia balaka ku mbandu ia luiji.

²⁴ Kilamba-phe kia dibhata dia tata dia anʼa Ngelexone, muene Eliiazafu dia Laiele.

²⁵ Kimbamba kia anʼa Ngelexone, mu kuambata balaka, o jikulutina ja balaka, ni jithanga jê, ni mavunga ni dibeka dia kuxita bhu muelu ua balaka ia kutakanena.

²⁶ Ni jikultina ja lumbu, ni dibeka dia kuxita bhu muelu ua lumbu, muala balaka ni kalatódio, ni mikolo iê ioso ia tokala-ku.

²⁷ Kua Kohate kuene kua tundu akua Analá, ni akua Izahale, ni akua Hebolone, ni akua Uziiele; mene o mabhata ma anʼa Kohate.

²⁸ Kia a bhange dialuilu mala oso, tundé iú uala mu mbeji imoxi katé ku makota, mua tundu nake dia midi ni hama jisamanu, phala kutambula konda ia dibhezelu.

²⁹ Mabha ma anʼa Kohate a ta kibangu kiâ ku mbandu ia sulu ia balaka.

³⁰ Kilamba-phe kia dibhata dia katata dia anʼa Kohate, muene Elizafane dia Uziiele.

³¹ Kimbamba kiâ o álaka, ni meza, ni kaxtisale, ni jikalatódio, ni imbamba ioso iene mu bhanga na-iu kikalakalu kia dibhezelu, ni dibeka dia kibatulu ni ima ioso ia tokala-ku.

³² Eliiazale monʼa Alá muene u kala kilamba u tumina ilamba ioso ia Jilevita, muene uala ku pholo ia iá a tambula konda ia dibhezelu.

³³ Kua Meladi kuene kua tundu akua Mahali ni akua Muxi; mene o mabhata ma anʼa Meladi.

³⁴ Kia a soneka mala oso, tundé iú uala ngó mu mbeji imoxi katé ku makota, mua tundu midi jisamanu ni hama jiiadi.

³⁵ Kilamba-phe kia dibhata dia tata dia anʼa Meladi, muene Nzudiiele dia Abihaíle; kibangu kiâ a ki ta ku mbandu ia kusuku ia balaka.

³⁶ Kimbamba kia bhana ku anʼa Meladi kienhiki: O jingunji ja balaka, ni mikangala iê, ni jiphiladi jê, ni ibaka iê, ni ima ioso ia tokala ku kikalakalu kiê.

³⁷ Ni jiphiladi ja lumbu lua kondoloka, ni ibaka iê, ni jiphapha jê, ni mikolo.

³⁸ A ta kibangu kiâ bhu pholo ia balaka, ku mbandu ia thunda, ene a Mozé, ni Alá ni anʼâ, a langidila dibhezelu, ni ima ioso i bhanga anʼa Izalaiele mu kubheza; muthu uengi uiza-bhu u kala muthu ua ku mu jibha.

³⁹ Ene oso a a soneka ku Jilevita, a alula kuala Mozé ni Alá kala kia a tumu Jihova, mu mabhata mâ, mala oso tundé iú uala ngó mu mbeji imoxi katé ku makota, ala makuinhi aiadi a midi, ni midi jiiadi.

O Jilevita ni kukula anʼa phande-kumbi

⁴⁰ Jihova anga u ambela Mozé, uixi: Alula ana oso a phande-kumbi a mala mu Izalaiele, tundé iú uala mu mbeji imoxi katé ku makota, u kuate dialuilu dia majina mâ.

⁴¹ Eme-phe u ngi kuatela Jilevita, eme ngi Jihova, a kale ami bhu kididi kia ana a phande-kumbi oso mu Izalaiele; ni ibhaku ia Jilevita i kale iami bhu kididi kia anʼa ibhaku oso a dianga ku a vuala mu Izalaiele ioso.

⁴² Mozé anga u soneka kala kia tumu Jihova, ana oso a phande-kumbi ku ana oso a Izalaiele.

⁴³ Ana oso a mala ku majina mâ, tundé kua iú uala ngó mu mbeji imoxi tulé ku makota, mua tundu makuinhi aiadi a midi, ni midi jiiadi, ni hama jiiadi, ni makuinhi sambuadi ni kitatu.

⁴⁴ Jihova anga u ambela Mozé, uixi:

⁴⁵ Kuata Jilevita bhu kididi kia ana a phande-kumbi mu anʼa Izalaiele oso, ni ibhaku ia Jilevita bhu kididi kia ibhaku ia ene; Jilevita-phe a kale ami, eme ngi Jihova.

⁴⁶ Kuma ana phande-kumbi ala kota mu kuvula, Jilevita ndenge, o hama jiiadi ja mona ni makuinhi sambuadi ni kitatu, a di te-ku a bhingi ku a kula.

⁴⁷ Kala mútue u tambula xikulu jitanu, xikulu ia dibhezelu ia bhana, kuma xikulu i kala ni makuinhi aiadi a jela.

⁴⁸ O kitadi-phe kia ku di kula, oso a di te-ku mudiâ, u ki bhana Alá ni anʼê.

⁴⁹ Mozé anga u tambula kitadi kia ku di kula, kua iá oso a di te-ku ka a kula kuala Jilevita;

⁵⁰ ua ki tambula ku ana a phande-kumbi ku anʼa Izalaiele, kia tena midi ia xikulu, ni hama jitatu, ni makuinhi asamanu, ni xikulu, xikulu iene ia dibhezelu;

⁵¹ kitadʼiki, kia ku di kula, Mozé anga u ki bhana Alá ni anʼê, mu kizuelu kia Jihova, kala kia tumu Jihova kua Mozé.