Dialuilu 27 - O Mikanda Ikola

Ahatu ue a lundula

¹ Bhenhobho ana a Zelofadi a ahatu eza, Zelofadi-phe muene monʼa Hefele, monʼa Ngiliiade, monʼa Makidi, monʼa Manasa, ku mabhata ma Manasa monʼa Zuze; ana ahatu enʼiá majina mâ: Makala, ni Noué, ni Hokala, ni Midika, ni Tidiza.

² Anga emana bhu pholo ia Mozé, ni bhu pholo ia nganga Eleazale, ni bhu pholo ia ilamba ioso ia kilômbo, bhu muelu ua balaka ia kutakanena, hé a zuela, exi:

³ Tatʼetu ua fuila mu kikangalakata; ka di bandele-phe kua ió a bhukumukina Jihova, o kibuka kia Kola; ua di fuila ngó ni ituxi iê muene; ka xi monʼa diiala.

⁴ Dijina dia tatʼetu-phe di jimukina-hi mu kaẋi ka dianda diê, mukonda dia kukamba monʼa diiala? Etu uetu tu bhane ue undundu uetu, kumoxi ni jiphange ja tatʼetu ja mala.

⁵ Mozé anga u bheka maka mâ bhu pholo ia Jihova.

⁶ Jihova anga u ambela Mozé, uixi:

⁷ Anʼa Zelofadi, a ahatu, a zuela kiambote; u a bhana muene kulundula kumoxi ni jiphange ja tatʼâ; undundu uoso ua xi tatʼâ, u bhite kua ene.

⁸ Uá kambela ue anʼa Izalaiele kuma, hé bhu kala muthu uafu, ka xi monʼa diiala, undundu uê monʼê ua muhatu u u lundula.

⁹ O kia kamba mona ua muhatu, undundu uê mu u bhana jiphange jê ja mala.

¹⁰ O kia kamba jiphange jê ja mala, undundu uê mu u bhana jiphange ja tatʼâ, ja mala.

¹¹ O tatʼâ ue, kia kamba jiphange ja mala, undundu uê mu u bhana ndandu iê uoso ua mu tokala, uoso ua mu zukama mu undandu, muene u u lundula; ku anʼa Izalaiele ki kala kijila kia kutetutula milonga, kala kia tumu Jihova kua Mozé.

Mozé u sola Josuué ku mu bhingana

¹² Jihova anga u ambela Mozé, uixi: Eie u banda mu mulundu iú ua Abadimi, o ixi i ngi bhana anʼa Izalaiele u i muena ku sámbua.

¹³ O ki u zubha ku i mona, eie ue a ku bhongolola ku malembʼê, kala phange ié Alá kia mu bhongolola.

¹⁴ Mukonda mua kambe kutumaka kizuelu kiami mú kikangalata kia Zini, kia bhiti mvunda ia kilômbo, enu mua kambe ku ngi kôlesa ku mesu mâ, bhua fuafuela menha. (Ene o menha a Medibah, bhu Kadexi, mu kikangalakata kia Zini.)

¹⁵ Mozé anga ua ambela Jihova, uixi:

¹⁶ Jihova, Nzambi ia jinzumbi ja xitu ioso, a xinde muthu, u xala mu kulanga o kilômbo,

¹⁷ a a kale ku pholo mu kutunda ni mu kubokona, a a songuele mu njila, a a bhiẋidise kididi, mbebhu kilômbo kiangene kia Jihova ki ki kale kala jimbudi ja kambe mubidi.

Josuué a mu xinda kuma muene kabhinganu ka Mozé

¹⁸ Jihova anga u ambela Mozé, uixi: Kuata Josuué dia Nune, diiala uala ni Nzumbi moxi diê, u mu tule lukuaku lué ku thandu;

¹⁹ u mu bheke bhu pholo ia nganga Eleazale, ni bhu pholo ia kilômbo kioso, u mu tendelele bhu pholo ia ene oso.

²⁰ Ku kijingu kié u katula-ku, u ta kua muene, phala kilômbo kioso kia anʼa Izalaiele a mu tumake.

²¹ Muene uimana bhu pholo ia nganga Eleazale, o ió u kala mu ku mu zambuila, muzambu ua Udimi kua Jihova, hé bhu kala kutunda, kizuelu ki tunda kua muene; hé bhu kala kubokona, kizuelu ki tunda kua muene; ni muene ni ana oso a Izalaiele kumoxi, kilômbo kiê kioso.

²² Mozé anga u bhanga kala kia mu tumu Jihova; u kuata Josuué, u mu bheka bhu pholo ia nganga Eleazale, ni bhu pholo ia kilômbo kioso;

²³ anga u mu tula maku u mu tendelela, kala kia tumu Jihova kua Mozé.