Dialuilu 17 - O Mikanda Ikola

O mbangala ia Alá i bhana itulu (kuiuka)

¹ Bhenhgobho-phe Jihova u zuelesa Mozé, uixi:

² Ambela anʼa Izalaiele, u tambule kua ene jimbangala, ku dibhata ni dibhata dia jitata, u tambula-ku mbangala, ku ilamba iâ ioso, kala kiala o mabhata ma jitata jâ, kuinhi dia mbangala ni kiiadi; hé uila o muthu dijina diê u di soneka ku mbangala iê.

³ Maji o dijina dia Alá u di soneka ku mbangala ia Levi; mukonda kala mútue ua dibhata dia jitata jê, u kala ni mbangala iê.

⁴ Hé ua kà ji tula mu balaka ia kutakanena, bhu pholo ia umbangi, bhu nga-nda kuijiia kokuenu.

⁵ Hé kia kà kala-phe kuila, o mbangala ia muthu uoso ngi mu sola eme ia-nda kutuluka; mu kubhanga kiki ngi zubha-ku o makulongolola ma ana a Izalaiele a mu ngi longolola na-u eme, mu ku mi longolola enu.

⁶ Mozé-phe anga u ki tangela anʼa Izalaiele; anga o ilamba iâ ioso a mu bhana jimbangala, kilamba ni mbangala imoxi, kala kiala o mabhata ma jitata jâ; kuinhi dia mbangala hi kiiadi; o mbangala ia Alá ia kexi ue mu kaẋi ka jimbangala jâ.

⁷ O Mozé anga u tula o jimbanji bhu pholo ia Jihova, mu balaka ia umbangi.

⁸ Anga ki bhita-phe kuila, o ki kuákie, Mozé ua bokona mu balaka ia umbangi, tala-phe, o mbangala ia Alá, ia tela o dibhata dia levi, ia tûluka; mbata ia bhana itulu, ia sabhuluka tuthangu i iemi ibundu ia amêndoua.

⁹ Mozé bhenhobho, o mbangala joso u ji katula bhu pholo ia Jihova anga uiza na-ju ku anʼa Izalaiele oso; o ene ia a di muena-kiu, anga muthu ni muthu u zangula-bhu o mbangala iê.

¹⁰ Bhenhobho-phe Jihova uambela Mozé, uixi: Tona dingi ku ta o mbangala ia Alá bhu pholo ia umbangi, phala ku i bhaka, i kale kijimbuete phala o ana a ẋinuka; mu kubhanga kiki ua-nda ku a zubha o makulongolola mâ ene ku ngi longolola na-u, nʼa kambe o kúfua.

¹¹ Anga Mozé u bhanga kienhiki; kala kia mu tendelela Jihova, kiene muene kia bhange.

¹² Bhenhobho-phe, ana a Izalaiele a zuelesa Mozé, Exi; Tala-ze, etu tua mu fua, tua mu buila, etu tua mu buila-phe etuʼenʼoso.

¹³ Ió uoso u zukama ku balaka ia Jihova, u fua; enu malʼenu, manhi tu jima o mbutu etuʼenʼoso?