Daniiele 9 - O Mikanda Ikola

Musambu ua Daniiele: Makuinhi sambuadi a jisemana; Mexiia

¹ Mu muvu uadianga ua Ndala monʼa Asuuelo, ku muiji ua akua Mediia, a mu hingixile ku utuminu ua akua Kaldeia.

² Mu muvu uene uadiangʼó ua utuminu uê, eme ngi Daniiele, mu kutongolola mu madivulu, nga sange kuma mivu ia tanga Jihova, kua polofeta Jelemiia, kuma iene mivu ia tokala kukumbidila o kibuika kia Jeluzaleme; ua i xinda makuinhi sambuadi.

³ Anga ngi lungulukila pholo iami kua Ngana Nzambi, mu ku mu sota ni musambu ni ku mu dionda, bhenhobho nga jidi, ngi di ta kidinhaji, ngi di kuua utókua.

⁴ Anga ngi dionda Jihova Nzambi iami, nga di fisala, ngixi: U Nzambi ionéne, u kuatesa uoma! Eie uene mu kukumbidila o kikutu, u mukua ku kuatela henda kua ió oso a ku zola, hé aiuka o ijila ié;

⁵ etu tuate ituxi, tua bhalumuna mulonga, tua bhange kubhukumuka, tua ku balukila, o mu ijila ié tua tundumu ni mu itumu ia mabatuilu mé;

⁶ tuedi ni jipolofeta jé, o jiselevende jé, ene ku tu tudila kioso ki ua-mbe eie, ki tuala ku a bhana dingi mátui kia tangela jisobha jetu mu dijina dié, ni ilamba ietu, ni adiʼetu, ni mundu uoso mʼoxi.

⁷ Eie, Jihova, ualungu muene, etu-phe sonhi ja tu fuama té mu leluʼidi, ni mala mu Juda, ni akua Jeluzaleme, ni Izalaiele ioso-lolo; kixi ia a zukama, kixi ió oso ala ku makanga, ku jixi kuoso ku ua a tande, mukonda dia kutondala kuâ ku a ku tondalela na-ku eie.

⁸ Jihova, tata, pholo ia tu sonoka ni jisonhi, maji kia tu fuama, nʼetu ni jisobha jetu, ni ilamba ietu, ni jitata jetu, mukonda tua ku te kituxi.

⁹ Maji eie Jihova, Nzambi ietu, momué muene ku kuatela henda ni kuloloka; oko etu tua mu kitukila muene!

¹⁰ O dízui dia Jihova, Nzambi ietu, ki tua di tumaka, phala ni tuendele mu jingonge jê, ja tu tambuisa bhu lukuaku lua jiselevende jê, o jipolofeta.

¹¹ Xi, Izalaiele ioso-lolo kitumu kié a ki lueza, abhuka mu njila, mbé o dízui dié a fule ku di tumaka. Mukonda dia kienhiki, ni mázui, ni mulôko uoso uòsoneke mu kitumu kia Mozé, ngunza ia Nzambi, ioso muene ia di lunduluila ku thandu dietu; mukonda Jihova tua mu te kituxi.

¹² Muene iu ua kumbidila o kizuelu kiê kia tu kanena na-kiu etu, kumoxi ni afundixi etu, a tu tetuluila jinga o milonga, iu ua bheka o jingongo ja vula kiki ku thandu dietu, ja bhingi kuila o kiki kia bhiti mu Jeluzaleme nuka kiʼa bhitile kuoso-kuoso bhoxi dia diuluʼabha.

¹³ Uíndua uoso uòsoneke mu ngonge ia Mozé ua tu tula muene! Maji-phe hanji tua tokoka kumbolomoka bhu pholo ia Jihova Nzambi ietu, phala ni tu biluka hé tu bhana dikunda ku ikuma ietu, anga tu kuata kudielela ku kidi kiê.

¹⁴ Kiene kia bhangesa Jihova kukala ni muanu ua kuiibha kuosʼuku, iu ua ku tuluila kuthandu dietu. Mukonda Jihova Nzambi ietu, ualungu muene mu ioso ia tu bhange, muene u fundisa mu kidi kiê, mbata etu-ku tua bhukumukina o diízui diê kuma tua fulu ku dívua.

¹⁵ Ni kidi kiene, Jihova, Nzambi ietu, eie muene ua katula o mundu ué kʼoxi ia Ejito, ni lukuaku lua undanda, dijina dié diʼdia fumana, katé mu kizuua kia lelu; tua te kituxi, tu akua ikuma ia phekalu!

¹⁶ Jihova tata, mukonda dia jihenda jé ja vulu kinéne, sondolola njinda ié ni kutemanana kuosʼuku ku ua tula ku thandu dia dibhata dié dikôla Jeluzaleme, uene ku mulundu ué uangene; mukonda o ki tualʼiki ituxi ietu, ni ikuma ia jitata jetu, iabheka môndo kua Jeluzaleme ni ku mundu ué, ala ku tu ta-u muene kuala athu oso u tua tunga-nâ a tu kondoloka mu jimbandu.

¹⁷ Kiki-phe, Nzambi ietu, batekela o musambu ua selevende ié, ni kudionda kuamiʼuku, o dibhezelu dié dia kituka ngùndu, muikina-diu dingi ni kubenha kua pholo ié, mukonda dia dijina dié.

¹⁸ Nzambi iami, bheteka mátui kunu, uívue; tona mesu, u mone kubhondalala kuetu, u tonginine ue o mbanza iatokala mu dijina dié. Mbata o ki tuala kusamba kiki bhu pholo ié, ki tua dielela o kulunga kuetu, maji tua dielela mu kulenduluka kué eie ku uene na-ku kua nzungule.

¹⁹ Eie Jihova, tata, ivua! Eie Jihova, tata, loloka! Eie Jihova, tata, tu suue, u sakalale mu kalakala, kana kukokoloka! Nga ku bhingi mu dijina dié eʼmuene Nzambi iami, tata; kuma diembu dié ni mundu ué afumana kuma a kutokala.

O sambuadi dia jisemana

²⁰ O ki nga kuata kuzuela kiki, ni kusamba, ni kufisala kituxi kiami, ni kituxi kia mundu uami ua Izalaiele, ni ku lundulula o musambu uami ua kutoloka bhu pholo ia Jihova, Nzambi iami, nga-lu diondela o mulundu uangene ua Nzambi iami.

²¹ O ki nga kuata o kuzuela kiki ni kusamba, o dikuenze Ngabidiiele, nga mu muene mu kisuma kiami kia kuandekela, ueza ni kutuka malusolo, bhu kumbi dia sata ia ngoloxi, ua bhiẋila, u ngi kuata lukuaku.

²² Anga u ngi longesa, u zuela nʼeme uixi: Daniiele, ngeza kindalʼiki phala ku ku ijidisa o diba.

²³ Kioso ngó ki uandeka o kudionda, kiene kia ngi bhana o ngonge, eme ngeza phala ku ku jimbuila-iu, mukonda eie u muthu a ku zola kinéne. Uívua-phe kiambote o maka iá, kisuma kiki ki ku tetulukile.

²⁴ Mundu ué ni diembu dié diangene a a xindila makuinhi sambuadi a jisemana, mbé o kujima kitondalu, ni kuzubha-ku o ituxi, ni kuta o kiamenga kia kulamba o kikuma, anga a mi bhekela kiua o kulunga kuxialelà-ku, o isuma ni upolofeta anga a i jika kiá ni idimbu, anga a unda kiá o Dilemba dia anangene, uene ni kuzela kua tundu athu oso.

²⁵ Eie tuma-phe ku kʼijiia: tunde bhu tubhukila o ngonge phala kubhetula dingi Jeluzaleme ni ku mu tunga, katé bhua kéjiia Mexiia, o Mʼona Ngana, bhuala sambuadi dia semana, ni makuinhi asamanu ni kiiadi kia jisemana; a kà tunga dingi o jinzunga ni imbaka, maji a kà ji tungila mu thembu ia hadi ni mbùnda.

²⁶ O kia kà bhua o makuinhi asamanu a jisemana ni semana jiiadi, Mexiia a kà mu katula-ku, kà mu mona dingi; o mundu ua kilamba kia kèza-ku, ua kà buikisa o diembu diosuʼodio ni Tembulu, o dizubhilu diâ dia kà a bhitula mukuâ ni menha a disenza; kuà kala-phe ita mu ita katé bhu dizubhilu, oko a xindi-bhu ibuika.

²⁷ Muenephe ua kà ta kikutu ni athu a ndumba mu semana imoxi; semana-phe iiza ngó mu kaxi, jisata u ji bhuisa-ku ni mibhaku ia musa; o ua kà bhanga isunji ioso iii-phe, muene ue kua kà mu iza mubuikixi, anga a mu lalumuna kienhiki katé kiá bhu dizubhilu; o kioso kiòxinde anga à ki lundulula ue ku thanduʼa mubuikixi muene.