Daniiele 8 - O Mikanda Ikola

Kisuma kia kilumbe kia mbudi ni kisutu kia hombo

¹ Mu muvu ua katatu ua utuminu ua sobha Belxazale, nga diuana kisuma, eme ngi Daniiele, kioso ki nga zubha kubhita ni kia diangele kiokio.

² Mu kisuma nga muene (kuná kala ngala mu mbonge ia Suzane, mu sengo ia Elame) nga muene, mu kisuma, kala ngala ku ndundu ia honga ia Ulai.

³ Ngedi ngi bhetula mesu, nga mono kilumbe kia mbudi kiemana ku kibumu kia ngiji, kiala ni jimbinga jiiadi; jimbinga jalebha muene, maji bhu kala-phe lumoxi lu tunda mukuâ mu kulebha; o lua beta kulebha-phe luene lua suikidila-ku mu kusabhuka.

⁴ Nga mono kuila o kilumbe kia kuata kúlua mítue, ki ṗhuṗha mútue ku luiji, o bhabha ki ṗhuṗha mútue ku suku, o bhabha ki ṗhuṗha mútue ku sulu; iama ioso ia lémbua kuimana bhu pholo iê, ki bhuala ue ua tena ku di bhângela ku nguzu iê. O kiene hé kienda ni kubhanga ioso ia mu tumu o muẋima uê, kiia dingi ni ku di-bandekeza mʼunéne uê.

⁵ O ki nga kuata kubanza imʼiii, talesa, kua solomoka kisutu kia hombo kiejila ku luiji, kia di-ambatesa mʼoxi ioso, o bhoxi ki kia mu diata-bhu; kisutu kienhokio ki kala ni lumbinga lua kidiuanu, lua mu kexila bhu kiuanu kia mesu aiadi.

⁶ Anga ki lunga ku kilumbe kia kexile ni jimbinga jiiadi, ki nga muene ku ngiji; anga ki di-ambatesa ni huiii ia nguzu iê ioso mu kúlua o kilumbe.

⁷ Ngi mona kia bhixila bhuala o kilumbe, anga ki kuama kilumbe anga u ki bukula o jimbinga jene jiiadi, kuma kilumbe kia lémbua nguzu ia ku bhânga-nê; kiaii-phe bhoxi, iu ua ki titidila ni inama iê; o u bhângela kilumbe nʼa ki tambhula bhu maku mê, ka moneka.

⁸ Anga kisutu ki di-bhanga munéne uahi ngó, kia kulu kia kômo! Maji kiedi ki bhixila mu kivula-nguzu, a mu bukula lumbinga lua kudile kiokio; anga bhu kididi kiê bhu sabhuka kiá jimbinga jiuana ja madiuanu, ji lunga ku itembu iuana ia diulu.

⁹ Lumoxi-bhu lu bhana kalumbinga kòfele anga ka lebhelela kiavulu, ka lunga ku sulu ni ku thunda ni kʼoxi ia diuabhela.

¹⁰ Anga lu dikudisa muene katé ni ku kilômbo kia diulu; u kuata amoxi-mu ku kilômbo kienhókio ni ku jithéthembua, u ji lauila bhoxi, hé u ji titidila.

¹¹ Anga lu di kudisa muene katé ki lua kitukila kota dia Ngana uavu kilombo kiê; o jisata jê ja izuua ioso muene ua ji bhuisa-ku, o kididi kia dibhezelu diê muene ua ki lundumuina bhoxi.

¹² O kilômbo a mu bhakuila-kiu muene, mukonda dia kutondala, bhuamoxi ni jisata ja izuua ioso; o kidi ua ki takuila bhoxi; o mu kubhanga kienhiki, kalumbinga kòfele muene mu ka muena kubhanduluka.

¹³ Kia bhiti kiki, anga ngivua-ku muthu uangene uazele iu ua zuela; o muthu uangene uaiuka ua mukuá, uambela ió uakexe kuzuela, uixi: O kisuma kia jisata ja izuua ioso, kiia katé bhebhi, ni kia kutondala ku buikisa, phala kubhakula o kididi kiangene, ni mundu uê, na u titidila?

¹⁴ Muene-phe ua ngʼambela, uixi: Kiia katé mu midi jiiadi ni hama jitatu ja jingoloxi ni imene; kuabhu, kididi kiangene kiabhu lufuku, kiazele.

¹⁵ Kia bhiti kuila, kioso ki nga mono kisuma kiki, eme ngi Daniiele, nga sota ku ki tongolola ni ngi tetuluka; talesa, kua ngi tukulukila kima kala kídifua kia muthu.

¹⁶ O ku kibumu kia ngiji ia Utai, ngevu-ku dízui dia muthu, dia dikola, diexi: Ngabidiiele, o iú mu ijidise kioso kia jimbula o kisuma!

¹⁷ Muene ueza bhua zukama ni bhu ngala eme; o kia mu kuiza muene kiki, uôma ua ngi kuata, nga di-ṗhudika pholo bhoxi. Muene-phe ua ngʼambela, uexi: Tongoloka, monʼa muthu, kuma kisuma kiki kia kà di kumbidila ku dizubhilu dia thembu.

¹⁸ O muene kia kexe ku ngi zuelesa kiki, nga dibhale ni pholo bhoxi, eme ngʼambuka. Maji o muene-phe ua ngi babata, iú ua ngi imika nzànza bhene bhua ngi sangeʼabha.

¹⁹ Uixi-phe: Talesa, ngi ku idikiza kioso kia ká bhita bhu thembu ia sukidila-ku ia njinda. Mbata o dizubhilu, sai thembu iê ia tokala, bhua di xindila.

²⁰ Kilumbe kia mbudi ki ua mueneʼokio, ni mbinga jê jiiadi, ene o jisobha ja Mediia ni ja Pélesa.

²¹ Maji o kisutu kia kindemba kiokio, muene sobha ia Ngeléxia; o lumbinga luonéne lua mu kexe bhu kiuanu kia mesu, muene o sobha iê iadinga.

²² O ki lua bukuka-phe anga bhu kididi kiê bhu sabhuka mbinga jiuana, kia jimbulula kuma kua kà balumuka ma-utuminu mauana mu kifuẋi kiene kimoxʼiki, maji-phe o nguzu ia ió ua diangele-ku, ki iene dingi.

²³ Maji, mu izuua ia sukidila-ku ia ma-utuminu mâ, kia-nda kuila akua kutondala a sekala a zubha, kua kà balumuka sobha u kala ni pholo ia kisuéia, mesene ia kuzambula.

²⁴ Ua kà kala muene ni kutena kuavulu, maji ki mu nguzu iê-muène; ua kà bhanga isunji ni kujibha o mundu; ua kà zediua, mu ima ioso ka lémbua kima, kioso kiandala o muẋima uê kiene kia bhanga; mazonda ua kà a bûba, o povo ia akua-Ngana ua kà i buikisa.

²⁵ Mukonda-phe dia kudimuka kuê, ua kà bhangesa kuila o mangonha bhu lukuaku luê ma bheka kubhanduluka; hé ku muẋima uê ua kà di kudisa; o mukonda dia kutululuka kuê kuala na-ku, ka mono kima ki mu zukutisa, ua kà jibha athu avulu a di tunu ku di bhakula kokuê; ua kà balukila ue Ngana ia Jingana, maji a kà mu sasujula sé lukuaku lua muthu.

²⁶ O kisuma-phe kia ngoloxi ni kia kimene, kia tange, kia kidi muene; maji eie-phe jika-kiu, kuma kima kia izuua ia hádia.

²⁷ Eme-phe, ngi Daniiele, ngʼambuka, nga kexe muene izuua bhu hama ni kukata. Anga ngi balumuka-bhu mu kukuata midimu ia muenexi. Ngi kuata kusasumuka ki ngi banza o kisuma kiki, kana-bhu-phe muthu kia mu tetulukila.