Daniiele 4 - O Mikanda Ikola

Ngonge ia sobha. O nzoji iê ia kimuẋi kionéne, ni kusaluka kuê

¹ Eme Nabukodonozolo ngi sobha: Nga sonekena miji ioso ni ifuẋi, ni madimi moso a tunga mʼoxi ioso: A mi vudixile paze ni kuzediua.

² Nga ki mono kuila kia ngi fuama muene o kufumanesa ijimbuete ni madiuanu oso a ngi kalakela Nzambi, Suke-ku.

³ Ijimbuete iê kukula kuahi, o madiuanu mê undanda uvula! Utuminu uê kima ki nangenena mu thembu joso, u ungana uê kutunda muiji kuiza muiji.

⁴ Eme Nabukodonozolo, ngedile muene kiambote talala-zâi mʼonzo iami, ngi kala mu buingita mu dizêmba diami.

⁵ Nganjiua-phe nzoji, anga i ngi juualesa; o ki nga kuata kubanza kioso kiende isuma ienhiʼii, ni ilunji ia ngi muangana, bhu hama iami bhu ngala anga ngi tandanganha kiavulu!

⁶ Eme-phe nga xikisa ngonge, ngixi: A ngi bhekele bhabha o jinjimu joso ja Babilónia, nda a ngʼijidise kia lombolola o nzoji.

⁷ Ni jinganga, ni jimesene ja iphata ia kutalela ku jithéthembua, ni makaledeia, ni imbanda akua kuzambula, anga eza, eme anga ngʼa tangela o nzoji kioso ki nga i anjiua; maji ene-phe dilomboluelu diê a di lémbua ku ngi tangela-diu.

⁸ Maji ku nga sukila kunu, kiene kiua kia bhixila Daniiele bhu pholo iami, a mu edi Beltexazale, dijina dia tokala ku dihamba diami, muenhú uene ni nzumbi ia jinzambi jikôla; anga ngi mu kundila o nzoji, ngixi:

⁹ Baltexazale, tata, u kilolo kia jinganga joso, eme ngʼejiia kuma momué muala muene nzumbi ia jinzambi jikôla, kana-ku-phe kikutu ki ku jinganena eie; ngi tangele isuma ia nzoji i nganjiua, u ngi bhe dilomboluelu diê.

¹⁰ O ki nga zekele bhu hama, kua ngi bhiti isuma iii: Nga kexe kukengelela, anga ngi talesa, bhu kala muẋi muʼaxaxi ka ngongo, ua di-leka kiavulu.

¹¹ Muẋi iú hé ukuata kukula ni ku dizandela kiavulu, katé ki uatuta ku diulu; anga, katé kua suku oxi, athu oso aia ni ku u mona.

¹² Mafe mê makemba kiambote, o ibundu iê ianzungule, usanga ene oso huta iâ itunda kuenhuku; iama ia mukáu iasange kididi mu kilembeketa kiê, jinjila ji bhita bhulu jitunga mabhata mâ mu jithango jê, xitu ioso hé ienda ni ku di-dikila ku muẋi uenhú.

¹³ Eme ku kilu kuenhoko, nga kuata kukengelela muene, bhu hama bhu ngala; talesa-ze ku iza mulangi, muthu ukôla uala kutuluka ku diulu.

¹⁴ U kuata ku dikola ni nguzu ioso, uixi: Muẋiʼú batulenu-u, solalenu-u o jithangu jê, o mafe mê mu ma lalumuna-ku, ibundu iê muangenenu-iu mu kanga; o iama ioso iene kubutama bhu kixina kiê, kaienu-iu, kumoxi ni jinjila jene mu jithangu jê.

¹⁵ Maji o kixinji kia kixina kiê ki xale ni jindanji jê mu mavu, kiene mu ki kuikile ku isasa ia mukáu bhu lubhambu lua felu ni ngondo; kiende ni kusumina mbundu i tunda ku diulu, kúdia kuê o iangu ia mvunde ia bhoxi kumoxi ni iama.

¹⁶ O muẋima uê a mu lungulule-u, ki u kale dingi ua muthu, a mu bhane kiá muẋima ua kiama; nda akale kienhiki katé mu sambuadi dia jithembu.

¹⁷ Sendesa iii iatundu ku Alangidi, o ngonge iii iangene ia athu akôla; phala ki bhekele athu ku tongolola kuma, mbé Suke-ku muene utumina o ma-usobha ma athu; u ma bhana uoso a mu andala, katé-ze ni sébhue u mu zangeleka muene ku thandu dia athu.

¹⁸ Kiene ki nganjiua ku nzojʼiki, eme, sobha Nabukodonozolo. Eie-phe, Beltexazale, jimbulula o dijingunuinu diê; kuma jinjimu joso mu utuminu uami a di lémbua, ka tena ku ngʼijidisa o dijingunuinu dia dilomboluelu diê; maji eie uasoko-bhu; mbata momué muala nzumbi ia jinzambi jikôla.

¹⁹ Bhenhobho Daniiele, a mu edi Beltexazale, u kumbikinha hanji kithangana katé mu uola iamvimba, ilunji ia mu tandanganha. Sobha-phe ukumbulula, uixi: Beltexazale, nzoji iii ki i ku juualese, mba u tandanganha mukonda dia dijimbuluilu diê. Beltexazale utambuijila, uixi: Ngana iami, o nzoji i lungile kua ió oso a ku kuatela luma, o dijimbuluilu diê di nongone muene oso jinguma jé!

²⁰ O muẋi u uamono uakulu, iú ua dizandela, o mu kitala uatuta ku diulu, anga a u mona katé kua suku oxi ioso,

²¹ ni kuila mafe mê makembe, o ibundu nzungule, ua bhingi ene oso a tuta huta iâ ia kúdia kuenhuku, o iama ia mukáu anga i tunga mu kilembeketa kiê, o jinjila jibhita bhulu anga ji tunga mu jithangu jê.

²² Muẋi iú éʼmuene, u sobha, uakulu uazande, o kijingo kié kiakulu kia tuta ku diulu, o ungana ué uabhixila muene katé kua suku oxi.

²³ O ki ua monuʼokio-phe sobha, kuila mulangi, muthu uangene ukôla, ua-lu tuluka mu diulu, uixi: Muẋiʼú batulenu-u, mu u kokojole jithangu, maji o kixinji kiê ni jindanji jê ki xiale ku mavu, mu ki kuikile ku isasa ia mukáú bhu lubhambu lua felu ni ngôndo; kiende ni kusumina mbundu i tunda bhulu ku diulu, o dikanda dia kúdia kuê, iangu ia mvunde ia bhoxi kumoxi ni iama ku mukáu, nda a kale kienhiki katé mu sambuadi dia jithembu.

²⁴ Didi diene o dijimbuluilu dia nzoji, eie sobha; iii iene ngonge iatundu kua Suke-ku, kioso kia-nda kuiza ku thandu dia sobha, ngana iami.

²⁵ Kala kiki, muʼaxaxi ka athu, a-nda ku ku tubhula-mu anga utunga ni jixitu ku mukáu, a-nda ku ku disa iangu mukuâ ni ngombe, mbundu ia bhulu ia-nda ku ku sukila anga i ku betesa muene; anga unakina sambuadi dia jithembu ji bhita kuthandu dié kienhiki; katé ki u kʼijiia kuamba mbé Suke-ku muene u tumina ma-usobha ma athu, muene u ma bhana uoso ua mu andala.

²⁶ O kiambe-phe exi, kixinji kia muẋi ni jindanji jê ki xiala, kifua-phe o utuminu ué ua-nda kuxialela na-u dingi, kioso ki uzubha ku kʼijiia kuma ku Diulu sai-ku ua tumina ioso.

²⁷ Kala kiki, sobha, tata, xikina kaiula kamiʼaka, sota kubhanga kia iuka, u di bhuise ituxi, bhanga henda ku jingadiama, u di bhuise o phulu, kifua o kiki nga ki ambe sumba hanji kua ku xiala thembu ia ku di-bhola hanji ku mátui.

²⁸ Ima ioso iii-phe sobha Nabukodonozolo ia mu ijiie muene.

²⁹ Mbata kua bhitile ngó kuinhi dia mbeje ni jiiadi, o kia kuata kuimajana kiki, ku thandu dia palaxu ia muenexi mu Babilónia,

³⁰ Sobha-phe u kumuna, uixi: Abha iii ki iene mbanza iadikota ia Babilónia i nga tunga eme, ngixi diene o dibhata dia ungana, dia tundu ku undanda uami, phala kijingo kiami kiie ni kufumana?

³¹ Kiluua a zubha ku ki zuela-phe, sobha, kua mu laukila dízui dia tundu mu diulu, diexi; Sobha Nabukodonozolo a ku ambela kiki: Ungana ua ku bhu!

³² A-nda ku ku kaia, o muʼaxaxi kʼathu u tunda-mu, inda utunga kiá ni iama ku mukáu; a-nda ku ku disa iangu kala ngombe, anga ukala kienhiki katé kua ku bhiti sambuadi dia jithembu, anga ki ku tetulukila kuamba, o Suke-ku mbé muene uene kutumina ma-ungana ma athu, uoso ua mu andala muene, muène a mu bhana-u.

³³ Bhu kumbi dienhodio, mu anzanzʼumu, sobha Nabukodonozolo kiene kia mu tangela kia mu iza muene, muʼaxaxi ka athu ua muangana-mu, iú uakexe kudia iangu mukuâ ni ngombe, mbudu i tunda bhulu ia mu sukila muene ku mukutu, anga ku mu sabhuka kingonha kala minha ia holokoko, o iala hé i mu lebhelela kala iala ia jinjila.

³⁴ Maji, kia zubha kúbhua izuua ienhoio, eme Nabukodonozolo, nga bhetula mesu ku diulu, anga ku ngʼiza dingi kilunji, eme nga tanesa Suke-ku, Ió kene mbambe nga mu ximana, nga mu kola fuma, mbé utuminu uê utuminu ua kunangenena, o usobha uê, kutunda muiji kuiza muiji.

³⁵ Kua muene athu oso atungu mu ngongo kingoho, kioso kia mu kala mu vondadi iê kiene kia bhanga ni ku ilômbo ioso ia diulu ni ku jithungiembu joso bhoxiʼabha; kana-ku muthu utena kufudisa lukuaku luê, ni kuila: Ua-nda bhanga kiebhi?

³⁶ Bhenhobho kilunji kia ngʼiza kiua muʼanzanza muenhomo; o kia ngi tudika kiá dingi ku utuminu uami, ulàmba uami ua ngi tula dingi, o kubenha kuami kua ngiza dingi luamukuá. O makota mami ma jingana ni jindongixi jami eza ku ngi takana dingi; iá a ngi xikika luambukuá ku usobha uami, anga kijingo kiami ki di-bandekeza dingi, o kiòkulu ndenge.

³⁷ Kiki-phe, eme, Nabukodonozolo, ngedi: Muenexiʼa diulu atane-ku! A kule, ajinge! Ngi mu zangeleka ni ku mu ximana jinga, mbata ikalakalu iê ioso kidi mu kidi, uendelu uê kutetuluka kuoso, oso ambe ku di zangeleka, muene u a toza anga a sebuluka muene.