Daniiele 3 - O Mikanda Ikola

Nabukodonozolo uimika kiteka kia ulu. Minzangala itatu a a takuila mu kijiku kia túbhia

¹ Sobha Nabukodonozolo, anga u iudika kiteka kia ulu, o kitala kiê makuinhi asamanu a kóvado, o kubumba kuê kua kóvado jisamanu; ua kʼimika mu dinhana dia Dula, mu sengo ia Babilónia.

² Anga sobha Nabukodonozolo u tuma kubhongolola anʼa jingana ni jinguvulu jaʼxi, ni tubhitangu, ni afundixi, ni a-lunda-mbongo, ni jindongixi, ni jifixiiadi, ni jinguvulu joso ja jisengo, phala eze ku lubhandu lua kulumbila kiteka kiemika sobha Nabukodonozolo.

³ Kienhokio ni anʼa jingana, ni jinguvulu jaʼxi, ni tubhitangu, ni afundixi, ni a-lunda-mbongo, ni jindongixi, ni jifixiiadi, ni jinguvulu joso ja jisengo, a bhongoloka ku lubhandu lua kulumbila o kiteka kiemika kuala sobha Nabukodonozolo, enhoso eza anga emana bhu pholo ia kiteka kiemika kuala sobha Nabukodonozolo.

⁴ Bhenhobho katúmua u xika ngonge, u kola ni dízui dia suína, uixi: Enu mu jipovo, ni ifuẋi, ni madimi, a mi tumu, exi:

⁵ Kioso ki mu ívua o mbimbi ia buzina, ni ia mbèndu, ni ia kakoxi, ni ia mbânza, ni ia kisanji, ni ia ngaieta ia jiphukila, kumoxi ni maxikile moso ma mimbu, diundenu-phe, mu bheze o kiteka kia ulu kiemika kuala sobha Nabukodonozolo.

⁶ Uoso u kamba kufukama ni ku ki bheza, mu uola ienhoio a-nda ku mu takuila mu kijiku kia uama túbhia tua muzukuta.

⁷ Kala kikiphe muʼanzanza muenhomo, kioso jipovo joso ki jʼevu o mbimbi ia buzina ni ia mbèndu, ni ia kakoxi, ni ia mbânza, ni ia kisanji, ni ia maxikile moso ma mimbu, ene-oso a fukama ia adiunda muene, ni jipovo, ni ifuẋi, ni madimi, iá a bheza kiteka kia ulu kiemika kuala sobha Nabokodonozolo.

⁸ Anga mu kithangana kienhokio kutukuluka mala amoxi-mu, akua Kaldeia, anga a xitala o jijudé.

⁹ Hé azuela, a jimbuila sobha Nabukodonozolo, exi: Muenexi, tunga soma!

¹⁰ Eie, sobha, Uabhana ngonge, ia kuila muthu uoso kiá uívua o mbimbi ia buzina, ni ia mbèndu, ni ia kakoxi, ni ia mbânza, ni ia kisanji, ni ia ngaieta ia jiphukila, ni maxikile oso a kuxika, kuambe adiunde mu bheza kiteka kiki kia ulu.

¹¹ O uoso u kamba kudiunda, ni ku ki bheza, a mu takule mu kijiku kia túbhia tua muzukuta.

¹² Bhuala-phe mala, jijudé, u ua lumbu éʼmuène kutambula konda ia ikalakalu ia sengo ia Babilónia, ene a-Sadalake, Mizake ni Abede-neko; mala enhá, sobha, kʼala ku ku suua ngó; o jinzambi jé nguâ ku ji xila, katé ni kiteka kia ulu ki uemika, a ditunu ku ki bheza.

¹³ Bhenhobho, Nabukodonozolo, kia uama kiá o njinda iê, uixi: Ngi bhekedienu Sadalake, ni Mizake ni Abedeneko. Iá abheka mala enhá bhu pholo ia sobha.

¹⁴ Nabukodonozolo-phe uzuela, hé u a ambela, uixi: O kuila Sadalake, ni Mizake, ni Abede-neko, mua ki bhange muene kiluelu, kuila jinzambi jami nguenu ku ji bheza, katé ni kiteka kia uluʼiki ki ngemika, nguenu ku ki fukamena?

¹⁵ Kiki-phe, hé kia mi tetulukila kiá, enu muala kiá polondo, kioso ki mu ívua mbimbi ia buzina, ni ia mbèndu, ni ia kakoxi, ni ia mbànza, ni ia kisanji, ni ia ngaieta ia jiphukila, ni maxikile oso a kuxika, anga mu diunda hé mu bheza o kiteka ki nga iudika, kiauabha! O ki muila, nguenu ku ki bheza, mu kithangana kienhokio muene, a-nda ku mi takuila mu kijiku kia túbhia tua muzukuta; Nzambi kuxi-phe ua-nda kutena o ku mi kudila bhu lukuaku luami?

¹⁶ Ni Sadalake, ni Mizake, ni Abede-neko, a kumbulula anga a tangela sobha Nabukodonozolo, exi: Etu, ku maka iá ki tua bhingi ngó ku ku vutuila-ku kima.

¹⁷ Talesa-ze, kuma Nzambi ietu, uoso tuene ku mu bhikila, muéne utena ku tu kudila; o ki tualʼiki muene ua-nda ku tu kudila ku kijiku kia túbhia tuê tua muzukuta, anga u tu tambula ue bhu lukuaku lué, eie u sobha.

¹⁸ Né-mbé ka ki bhange, tuma ku kʼijiia, sobha, kuma etu nguetu kubheza o jinzambi jé, nguetu kufukamena o kiteka kié kia ulu ki uemika eie.

¹⁹ Nabukodonozolo bhenhobho anga uizala ni njinda, pholo i mu kituluka mbebhu a-Sadalake, ni Mizake, ni Abede-neko; anga u kumbulula, u tuma kutemesa o kidijiku kia túbhia lusambuadi, phala o kiene ku i temesa, ki kala ndenge.

²⁰ Anga u tuma mala a mazonda ene mu kilômbo kiê, uixi: Ni Sakalake, ni Mizake, ni Abede-neko, akutienu mu a takule mu kijiku kia túbhia tua muzukuta.

²¹ Mala enhá anga a a kutila bhenhobho ni jikapa jâ, ni jikalasá jâ, ni jithanga jâ ni ji xapé jâ anga a a takula mu kijiku kia uama túbhia tua muzukuta.

²² Kuma-phe o kizuelu kia sobha kia thathamana, o kidijiku kia túbhia kiedi ni kiene ngangû, mulengo-phe uajibha mala ió oso a kuatele a-Sadalake, ni Mizake, ni Abede-neko.

²³ O mala atatu iá-phe, ni Sadalake, ni Mizake, ni Abede-neko, a dibhalela ni mikolo iâ mu túbhia tua muzukuta.

²⁴ Kienhiki sobha Nabukodonozolo ua diuana, anga ufundumuka lusolo; hé uambela tubhitangu tuê, uixi: Abha ki mala atatu u tua takula mu túbhia, òkute ni mikolo? Ene a mu vutuila, exi: Kia kidi muene, sobha.

²⁵ Muene-phe u kumbulula, uixi: Talesa, nga mono mala auana ajituka iá ala kunhunga ni kuimajana mu kaxi ka túbhia, né ngó kujokota mba muáu ku mikutu iâ. O kidífua kia muthu ua kauana, u ki fika mukuá ni kia monʼa jinzambi.

²⁶ Nabukodonozolo bhenhobho, ubhiẋila bhu muelu ua kijiku kia túbhia tua muzukuta, anga u handekela, uzuela, uixi: Enu Sadalake, ni Mizake ni Abede-neko, jingunza ja Nzambi. Suke-ku, tundenu ku kanga, muize bhabha! Bhenhobho, ni Sadalke, ni Mizake, ni Abede-neko anga atunda mu kaxi ka túbhia.

²⁷ Anga anʼa jingana, ni jinguvulu jaʼxi ni tata ja kifuandu kia muenexi, ni tubhitangu, a bhongoloka kutonginina mala iá, hé a sanga kuila túbhia tua lémbua nguzu ia kuoha mikutu iâ; né ngó lundemba luâ lumoxi kuaúka mu mútue, né ngó izuatu iâ kuila i kotanana mba ngó dizumba dia muáu kuila di bhita ku thandu diâ.

²⁸ Nabukodonozolo bhenhobho uzuela, uixi: A tane-ku Nzambi ia Sadalake, ni Mizake, ni Abede-neko, ua tumu anjo iê iú uakudila jiselevende jê, a mu dielela, mbata o ngonge ia sobha a i bulu muene, iá a bhakula o mikutu iâ, mu kuiengesa kubheza jinzambi jengi, kikale ngó o Nzambi iâ.

²⁹ Eme-phe ngi xikisa kiá ngonge, kuila, ku miji ioso-lolo, ni ifuẋi ni madimi, uoso u ẋongùena Nzambi ia Sadalake, ni Mizake, ni Abede-neko, a mu batujule ku iẋimbu-iẋimbu, o diembu diê a di bhange dixita dia uthôkua; mbata kana-ku Nzambi iengi u tena kukudila kala Iú.

³⁰ Sobha anga u beta dingi kuzediuisa Sadalake, ni Mizake, ni Abedeneko, mu sengo ia Babilónia.