Daniiele 2 - O Mikanda Ikola

Nzoji ia sobha a i lombolola kuala Daniiele

¹ Mu muvu ua kaiadi ua kutumina kua Nabukodonozolo, Nabukodonozolo uanjiua jinzoji; anga ku mu iza-phe kutandanganha kuavulu mu muẋima, hé u fula kilu.

² Sobha anga u tuma kuixana jingânga, ni jimesene ja iphata, ni imbanda, ni akua Kaldeia, phala a mu jimbuile jinzoji jê; ene anga eza hé a bhixila bhu pholo ia sobha.

³ Sobha anga uzuela, uixi: Nganjiua nzoji; maji kua ngʼiza-phe kutandanganha mu muenhu, kua kuijiia o dilomboluelu diê.

⁴ Akua Kaldeia-phe hé ambela sobha, mu dimi dia akua Sídia, exi: Muenexi, tunga, soma! O nzoji tanga-iu ku abhikʼé, nda etu tu mone-bhu o dijimbuluilu diê.

⁵ Sobha u kumbulula akua Kaldeia, uixi: Nzoji ia ngi lenge (ia ngi jimbi); enu-phe se mu kamba ku ngi lembalesaiu, anga mu i tanga dijimbuluilu diê, nga-nda ku mi sasujula, o mabhata menu ngi ma bhanga maxita.

⁶ Maji, hé mua ngi lembalesa-iu, anga mu i jimbulula, mua-nda kutambula kijingo kokuami, ni maujitu, ni kuzangalala kuonéne; kala kiki ngi lembalesienu nzoji, ni dijimbuluilu diê.

⁷ Ene a mu vutuila lua kaiadi, exi: Sobha, tangela jiselevende jé o nzoji, etu dijimbuluilu diê tu di bhana muene.

⁸ Sobha ukumbulula, uixi: Nga mono kuma mua mesena ku ngi landukisa; mukonda mua kʼijiia kuma nzoji ia ngi jimbi.

⁹ Hé kiene-phe, se mua lémbua ku ngi ijidisa o nzoji, kima kimoxi ngó kia mi kinga: kuma-phe mua funha maka ma makutu, phala ku ngi sabhuila-u bhabha, katé ki somboka o thembu; lémbue-phe, ngi tangedienu o nzoji, nda ngi ki mone kuila, kidi, dijimbuluilu mua soko-bhu ku di bhana.

¹⁰ Akua Kaldeia anga a vutuila sobha, bhu pholo iê, exi: Diba didi, mu ngongo iosʼumu, kana-mu muthu u tena ku ku ambela-diu, sobha; ki kuala ue sobha, né uakudila kuebhiʼoko, nʼa jijila kima kala kiki ku jinganga, mba ku jimesene ja iphata, mba ku akua Kaldeia.

¹¹ Kala kiki, eie sobha uajijila kima kiabhonzo; u ku lomboluela-kiu sobha, ka moneka; kikale ngó jinzambi, jinzambi-phe ki ji tunga mu xitu mumu kumoxi ni athu.

¹² Kienhiki sobha kia kʼivu, uatemanana, njinda ia mu kuata kiavulu; anga u tanga, uixi: Jinjimu joso mu Babilónia a ji jibhe-mu!

¹³ Ngonge-phe iatundu ia kujibha jinjimu joso; anga a sota ue Daniiele ni akua dianda diê phala ku a jibha.

¹⁴ Daniiele anga u di tongesa kiambote ni Adiioke, kabhitango ka alangidi a sobha, uatundile ni ngonge mu jibha o jinjimu mu Babilónia.

¹⁵ Daniiele u kumbulula anga uambela Adiioke, vunda dia muenexi, uixi: Ngonge ia sobha isakalela-hi kiki, enu malʼenu? Adiioke iu ua jimbuila Daniiele o kikuma kioso kia bhangesa kiki.

¹⁶ Daniiele-phe anga uia mu zuela ni sobha; ubokona, hé ubhinga sobha, uixi: Ngi bhane kathangana, nda ngi ku jimbuile nzoji iê.

¹⁷ Anga Daniiele uia ku bhata diê, u ki jimbuila ue Hananiia, ni Mizaiele ni Azadiia, akua dianda diê;

¹⁸ phala a dionde o henda ia Nzambi ia diulu, bhu kaxi ni kijinganu kiki, phala o Daniiele ni akua dianda diê ka fuile kumoxi ni jinjimu joso jene mu Babilónia.

¹⁹ Bhenhobho Daniiele a mu tukuluila o kijinganuʼiki mu kisuma kia usuku; Daniiele bhenhobho u kala mu ximana Nzambi ia diulu!

²⁰ Daniiele anga uzuela, uixi: Dijina dia Nzambi a di ximane tunde ku mivu katé ku mivu ia hádia ni hádia, kuma ni unjimu ni nguzu ima iê-muène ngó.

²¹ Muene u sondolola o jithembu ni ithangana; muene mukua kutulula o jisobha ku ungana mba u a tudika-ku; muene mukua kuila jinjimu u a bhana unjimu, akua kilunji u a bhana o kuijiia ni uhete.

²² Kima kia jingana, kia kasuèkele, muene u ki aneka; kioso kiala mu kitombe muene u kʼijiie, kuma muene ua tunga ni mukengeji.

²³ Uixi-phe: Eie, Nzambi ia jitata jami, Tana-ku, eme ngi ku tumbula fuma! Kuma eie ua ngi bhe unjimu ni nguzu; mukonda o ki tua ku bhingi, eie ua ngʼijidisa-kiu, mbata ua tu lomboluela kioso kia katela sobha ku thulu iê.

²⁴ Mukonda dia kienhiki-phe, Daniiele uai anga ubokona mʼonzo ia Adiioke mu zuela-nê, ió a mu katuile sobha phala kujibha jinjimu joso mu Babilónia; o kia bokona, ua mu ambela kiki: Jinjimu mu Babilónia ku ji jibhe luua; ngi bokuese kua sobha, eme nga-nda ku mu jimbuila o dilomboluelu diê.

²⁵ Adiioke-phe, ni lusolo, u bokuesa Daniiele bhu pholo ia sobha, anga u mu ambela kiki: Nga bongo muthu, muʼaxaxi ka ana a a kuika mua Juda, muene ua-nda ku ku tetuluila o kijinganuʼiki, eie u sobha.

²⁶ Sobha hé uambela Daniiele (a mu edi Beltexazale), uixi: Eie mbé ua soko-bhu o ku ngʼijidisa o nzoji i nganjiua, ni ku i lombolola?

²⁷ Daniiele hé u kumbulula bhu pholo ia sobha, uixi: O kijinganu ki uajijidila eie, sobha, né jinjimu, mé jimesene ja kutalela ku jithéthembua, né jinganga ja isuma ni iphata, né akua kuzambula, ka ki tena ku ku tetuluila-kiu, sobha.

²⁸ Sai-ku Nzambi ku diulu, muene mukua kujingununa ijinganu ioso; muene-phe ua-tumu kuijidisa sobha Nabukodonozolo kioso kia-nda kuiza-ku mu izuua ia sukidila-ku; o nzoji ié ni isuma i ua diuana ki uele ku kilu bhu hama ié, ienhiʼii:

²⁹ Kioso, eie sobha, ki uala bhu hama ié, kua kuiza ixinganeku kioso kia-nda kuiza-ku ku pholo ku ua lungu. Uoso-phe mukua kujingununa o ijinganu ioso, iu ua ku ijidisa kioso kia kʼèza-ku.

³⁰ Eme-phe, o ku ngi tukuluila o kijinganu kala kiki, ni ki ngi tetulukila, ka ki bhangela kuila eme nga beta o kuijiia athu oso mu ngongo ndenge, maji ua ki bhangela mu ku ku ijidisa o dilomboluelu, eie u sobha, phala ku ku tetuluila o ixinganeku ia muẋima ué ni i ku jimbuilukile kiambote.

³¹ Sobha, eie uakexe kutala, o mu kutala uamono kiteka kionéne; kiteka kiki kukula kuahi ngó, o kubenha ngó, o kubenha kuê, kʼila léko-léko, hanji kiemana bhu pholo ié; o ku ki tala mesu ki kuatesa uoma!

³² O mútue ua kiteka kienhokio ua ulu uafina; o thulu ni maku phalata ioso; o dilembe ni matabela ngòndo:

³³ o mu tuluingi ianama iê ia utadi ua felu; o mákanda a inama edi o kuku felu, o kuku utuma.

³⁴ Eie-phe ki uakuata kukengelela kienhiki, uatukumuka ditadi dia bamuka ku mulundu, sé lukuaku lua di bamuna, di dieza mu di bekula ku inama ia kiteka ia felu ni utuma, o mákanda oso a inama ia a di sasujula.

³⁵ Bhenhobho-phe kiá, ni felu ni utuma, ni ngòndo ni phalata kumoxi kiá ni ulu, iene ioso sasu-sasu, anga ikituka kala ibhiate i ala kubhiata bhu mbango, kitembu kia i ambatesa, katé iendelela ni kididi bhu ia kexile ki bhu moneka dingi; maji o ditadi-phe dia nemeka o kiteka, dia di bhange mulundu uonéne, anga uizalesa oxi ioso.

³⁶ Iii iene o nzoji i uanjiua; maji ue o dilomboluelu diê, sobha, tua-nda ku ku tangela-diu kiá.

³⁷ Eie, muenexi, u ngana ia jingana muene; kuma o Nzambi ia diulu ua ku bhana utuminu ni ukuenze, ni undanda, ni ulâmba.

³⁸ Iú uedi kuene kuoso kua tungu anʼa athu, ni iama ku mukáu, ni jinjila bhulu, ua ku bhakuila-iu bhu maku mé; iú ua ku bhana u o kutena kua ku i tumina; é-muene-phe u mútue ua ulu.

³⁹ Kioso-phe ki u tunda-ku eie, kua kà ku bhingana utuminu uamukuá, uala ndenge, o ué-eie kota; anga kua kʼèza kiua utuminu ua katatu, ua utadi ua ngôndo, uene hé ua kà tumina oxi ioso.

⁴⁰ O ua kauana utuminu ua nguzu mukuâ ni felu; kiene ki tuzala o felu anga ibukula ima ioso, kikala o felu isasujula o ima ioso, uene ue kiene ki ua kà bukujula anga usesumuna o mautuminu oso a mukuá.

⁴¹ O ki uamono-phe kuila o makànda a inama ni milembu iedi o kuku ia utuma ua ngûmbi, o kuku ia felu, kifua-phe o utuminu ió ua kà di uanununa; hanji-phe kakusuina ka felu iu na-ku; kiene ki uamuena kuila o felu ia di-lungu ni utuma ua diloua.

⁴² O milembu iê ia inama, o ki iedi kuku ia felu, kuku ia utuma, kia jimbulula kuma o utuminu ió, ua kèla o ku mbandu kuku uasuina, o ku mbandu kuku uabhuila, uabotomoka muene.

⁴³ O ki uamono kuamba o felu ia di-lungu ni utuma ua diloua, utuminu ió ua kà di fungisa ni mbutu ia athu ku miẋima-miẋima mu makusakana mâ, ka tena-phe ku dʼivisa kiambote mudiâ, kala o felu ue ki i tenê ku di lunga kumoxi ni mavu.

⁴⁴ Maji, mu izuua ia jisobha jenhiji, o Nzambi ia diulu ua kà bhekaku o utuminu ki u xikina dingi ku u jikinisa; o utuminu iú kà u ehela ku bhita dingi bhu maku ma miji iengi; uene kiá ua kà sasujula o mautuminu mosoʼama anga a-bhua-ku, maji o uene ua kà xalela ni kutumina mu thembu joso katé ku hádia ni hádia.

⁴⁵ Kiene ki ua muena kuila ku mulundu kua bamuka ditadi, maji ki maku ma di bamuna, dieneʼdi dia sasujula o felu, ni ngôndo, ni utuma, ni phalata, ni ulu, Nzambi, Kutende uadimuna sobha, phala ku kuijidisa ima ioso hádia ia-nda kuiza ku pholo ki zubha kubhita iosuʼiii; o nzoji ia kidi, o dijimbuluilu diê dia kidi.

Daniiele a mu bhanga nguvulu ia Babilónia

⁴⁶ Bhenhobho sobha Nabukodonozolo u di takula hé u di-ṗhudika pholo bhoxi, anga u bheza Daniiele, u tuma ku mu satela mubhaku ua musa ni maji a mazumba.

⁴⁷ Sobha anga ukumbulula Daniiele, uixi: Kia kidi kiene, Nzambi ienu muene Nzambi ia jinzambi, muene Ngana ia jisobha; muene ue o mukua kutukulula ni kujingununa o ijinganu; mukonda o kijinganuʼiki eie ua ki lende muene o ku ki tetulula.

⁴⁸ Anga sobha uzangeleka Daniiele ni kijingo kiavulu, u mu bhana ndumba ia jimbote jamakota, hé u mu bhanga nguvulu ia sengo ioso ia Babilónia, anga a mu tudika ue ku thandu dia jinjimu joso jala ni kuijiia mu Babilónia.

⁴⁹ Maji Daniiele ua bhingi kua sobha, iú ualumbu Sadalake, ni Mizake ni Abedeneko mu kuendesa o ikalakalu ioso ia sengo ia Babilónia; o Daniiele muene u kala mu xikama jinga ku mbanza bhu muelu ua sobha.