Daniiele 12 - O Mikanda Ikola

Jithembu ja sukidila-ku: maka m ʼòjike ni idimbu

¹ Mu thembu munhá Mingedi, kilolo kiadikota, ua kà balumuka, ni kuimanena ku bhângela anʼa kifuẋi kié, bhua kà kala-phe thembu ia phaxi, tunde kia bhanga o muiji ua athu, kiluua i kala-ku, katé kiki; maji mu thembu ienhoio, o kifuẋi kié kia kà bhuluka, uoso a mu sanga dijina mu Divulu.

² Ndumba ia athu ió aia ku kilu mu fufuta ia mavu ma ʼxi, a kà fukunuka, amoxi a kʼàia ku muenhu ki uàbhua, amukuá a kʼàia ku kididi kia phaxi, kuà kala o sonhi ni lusebu lu nangenena.

³ Oso a dimukine mu kuenda kuâ, a kà lekujuka kala ki benha o muanha ua diulu, oso a longa jinga o mundu ku sota ni kukaiela o kulunga, à kà benha mukuâ ni jithéthembua katé ku hádia ni hádia.

⁴ Eie ue, Daniiele, maka ià jika-u a suke bhenhabha; jika ue idimbu ku divulu didi, katé bhua kà suka o thembu; avulu a kʼèza-ku, a kà tutumba ku mbandu ni mbandu mu jixi joso, o kuijiia-phe kua kʼàia ni ku dibandekeza.

⁵ Eme ngi Daniiele, o ki nga tale, nga mono kiiadi emana, o iú ku mbanduʼa ngiji ku sámbua kunu, o mukuá ku mbanduʼa ngiji ku sámbua kuná.

⁶ Umoxi iu uebhula diiala ua zuata kizuatu kia linho, ua kexe kulu dia hungulule ia menha a ngiji, uixi: O kiki, madiuanuʼama, ma kà bhita thembu kuẋi?

⁷ Anga ngʼivua o muthu ua zuatele kizuatu kia linho, iu uakexe kulu dia hungulule ia menha a ngiji, ua zangula lukuaku luê lua dilu ni lukuaku luê lua kiasu ku diulu, iu ua di-lokela kua Iuná uene ku muenhu ki u moneka dizubhilu, uixi: Bhua kà bhita thembu iòxinde, ni jithembu jòxinde, ni kaxaxi ka thembu, o kia kà zubha kubhuisa o kutena kua povo iangene, kiene kiua kia kà bhita o ima ioso iii.

⁸ Eme-phe kia zuelʼiki nga kʼivu maji ki kia ngi jimbulukila; ngixi-phe: Muadiʼami, tata, imʼii ia kà suka bhebhi?

⁹ Kuala muene: Katuka, Daniiele, mbata makʼama a ma jika, ia ate-ku kidimbu katé kia kʼèza o thembu ia kà sukidilá-ku.

¹⁰ Athu avulu a kà a bhuisa o dixidilu dioso, a kà a zelesa, ni ku a teza; maji akua phulu a kà jijila kubhanga dingi phulu mu phulu iene, kuma akua phulu né ngó umoxi ka kà tena kutetuluka; maji oso ala jinjimu, kia kà a tetulukila muene.

¹¹ Mu kutunda bhu kumbi dia kubhuisa-ku o sata ia izuua ioso nʼa ta-ku o kisunji ki buidisa o mundu, bhua kà bhita midi, ni hama jiiadi ni makuinhiʼvua a izuua.

¹² Ua zediua ió uoso u kingila-ku dingi nʼa bhiẋila bhu midi, ni hama jitatu ni makuinhi atatu a izuua ni itanu.

¹³ Eie-phe, suluka kienhiki katé ku mbambe; mbata ua-ndu nhoha-ku, maji o mu kizuua kia kà suka-ku, ua kà fundumuka anga u tambula o undundu ué ua ku xikamena.