Afundixi 8 - O Mikanda Ikola

Ngidiione u luulula akua Ifalaime. Jisobha ja Midiiana a ji kuata, a ji jibha

¹ Akua Ifalaime anga ambela Ngidiione, exi: Mbebhu-ohi eie ua bhange kiki? Ua kambe ku tu kasa ki uaii kúlua ni Midiiana? Anga a zoka-nê mvunda, a tangelela muene kiavulu.

² Muene anga u a ambela, uixi: Eme-phe nga bhangeʼhi, ku ki fika ni kiki ki mua bhange enu? Manhi o kuangulula, kuangulula akua Ifalaíme ki kualʼé kota, o kumuna kua munu akua Abiiezele, ki ndenge?

³ Nzambi ua bhakula bhu lukuaku luenu anʼa jisobha ja Midiiana, Olebe ni Ziiebe. Eme-phe kima ki nga tena kubhanga kima kiahi, ki soka ni ki mua bhange enu? Njinda iâ ia mu kuatelele, anga i sosoloka, kia zubha ku a zuelela kiki.

⁴ Ngidiione anga u tula ku Njolodá hé u zaúka, ni muene ni hâma jitatu ja mala aia-nê kumoxi, a bhuila, maji hanji iá kaia akua Midiiana.

⁵ Anga u ambela akua Sukote, uixi: Nga mi diondo, bhanenu kúdia ku mundu ala ku ngi kaiela; kuma a bhuila ni nzala, eme-phe ngala kukaia Zeba ni Zalumuna, jisobha ja Midiiana.

⁶ Jingana ja Sukote-phe, exi: Manhi maku a Zeba ni Zalumuna ua a kuata kiá bhu lukuaku lué, phala etu tu bhane kúdia ku kifuẋi ki uala kuenda-na-kiu?

⁷ Ngidiione-phe, uixi: Dixibhienunu! Jihova kia-ndu ngi bhakuila Zeba ni Zalumuna bhu lukuaku luami, ngi mi aza xitu ienu ni minha ia muxitu ni kathathala.

⁸ Anga u tunda bhenhobho, u banda ku Penuuele, anga u a zuelesa ue kiene kimoxi; akua Penuuele anga a mu vutuila kala kia vutula akua Sukote.

⁹ Muene anga u ambela ue akua Penuuele, uixi: Kioso ki ngʼiza, kuila nga tululuka kiá, o kathôndo ka mbonge ienu iii ia matala, ngi ka bula.

¹⁰ Kienhokio-phe Zeba ni Zalumuna a bhixila bhu Kadikodi, ni ifuẋi iâ iala kuenda na-iu kumoxi, kuinhi dia midi ni midi jitanu ja mala, ene ngó a subhuka-ku ku kifuẋi kia anʼa thunda-mbulu-uanga-ua-kisongo. Mukonda kuafu kiá hama ni makuinhi aiadi a midi ia mala, oso a tena kufomona xibhata ia kubhanga.

¹¹ Ngidiione anga u bandela mu njila ia jisanzala ja jibalaka, mu kuia ku Noba ni Jongibeia, ene ua a xi ku luiji, kifuẋi anga u ki beta, kuma ua a sange a di jimbi, exi ki kuiza kima.

¹² Ni Zeba ni Zalumuna-phe anga a lenga; muene-phe anga u a kaia; jisobha jiiadi ja Midiiana Zeba ni Zalumuna, ua kuata, kifuẋi kioso u ki muanga-muanga ni ku ki kaia-kaia.

¹³ Ngidiione monʼa Jouaji anga u vutuka ku ita, kuila kumbi kiluua di tunda, u ijila njila ia kalundu ka Helese.

¹⁴ Anga u kuata munzangala múkua Sukote, u mu tokuesa ni ku mu ibhula kiambote; muene hé u mu bhana o majina ma jingana joso ja Sukote ni adiakime oso, makuinhi sambuadi a muthu ni sambuadi.

¹⁵ Ngidiione anga u tula kua akua Sukote, uixi: Talenu Zeba ni Zalumuna mua a tumbuila mu ku ngʼâmba eme ni ku ngi nongena, muixi: Manhi maku a Zeba ni Zalumuna ua a kuata kiá bhu lukuaku lué, phala etu tu bhane kúdia ku mala a ku tokala a bhuila ni nzala?

¹⁶ Muene anga u kuata adiakime, akua bhata dia Sukote, anga u a bhana kibetu kiambote ni minha ia muxitu ni kathathala, phala ku a longa.

¹⁷ O kathondo mu mbonge ia Penuuele ua ka bula-bula, o mala oso a tungile mu mbongeʼomo ua a jibha-jibha.

¹⁸ Muene anga u ambela Zeba ni Zalumuna, uixi: Athu a kidifua kiahi, u mua jibhila bhu Tabolo? Ene a mu vutuila, exi: Kiene ki ualʼeiʼiki ene ue kiene; ene oso edi kala anʼa sobha.

¹⁹ Muene-phe uixi: Enhó jiphange jami, anʼa mamʼetu! Ni kidi kiene, nga lokela mua Jihova uene ni muenhu, kuila se enhó mua a xile ni muenhu, eme uami ue ki ngeji ku mi jibha enu.

²⁰ Anga u ambela Jetele, monʼê ua phande-kumbi iê, uixi: Balumuka u a jibhe! Munzangala-phe ka fomona xibhata iê, kuma uala ni uoma, mukonda hanji mona ndenge.

²¹ Ni Zeba ni Zalumuna anga ambela Ngidiione, exi: Balumuka eie muene u tu jibhe; kuma diiala diiala kiá, ni nguzu iê. Ngidiione anga u balumuka, u jibha Zeba ni Zalumuna, hé u tambula o makembu óiudike mu kidífua kia mbeji, a zuika jikamelu jâ mu xingu.

Ngidiione u dituna ungana, u bhanga efodi, anga u fua

²² Kia bhiti imʼiii, akua Izalaiele ambela, Ngidiione, exi: Eie muene u tu tumina, ni eie, ni monʼé, ni mulaulʼé; mukonda eie muene ua tu bhulula bhu lukuaku lua akua Midiiana.

²³ Ngiddiione anga u ambela, uixi: Eme ki ngi mi tumina, ne bhuofele ue monʼami ka mi tumina; kikala u mi tumina Jihova.

²⁴ Ngidiione anga u a ambela, uixi: Inda eme ngi mi bhinga kima kimoxi: Mu ngi bhana enu oso o jibixa ji mua bhundu ku jinguma. (Kuma o jinguma ja akua Ijimaiele, ja bhange na-ju Ngidiione, kifua kiâ a zuata jinga malenge a ulu ni jibixa ja ulu.)

²⁵ Ene a mu vutuila, exi: Tu ji bhana muene ni muẋima uoso ni vondadi ioso. Anga a zala thanga bhoxi, ene oso anga a takula-bhu o jibixa ja bhûndu ku jinguma, mu imoxi-imoxi.

²⁶ O jibixa ja uluʼiji ja bhingi muene, anga a ji pezala, o kunema kuê kifua kimbamba ki bhinga ngamba, kuma ja tenene midi ni hama sambuadi ja xikulu ia ulu; kua di te o makembu a kidifua kia jimbeji, ni makoladi, ni izuatu i kusuka ia zuatele o jisobha ja Midiiana, kua di te dingi ue o malubhambu ma kexile mu jixingu ja jikamelu jâ.

²⁷ Ngidiione anga u iudika na-u efodi, u kala na-iu bhu bhata diê, bhu Ofila; Izalaiele ioso anga i sendukila bhu bhata diê bhenhobho; anga ki di bhanga kutondala kua Ngidiione, ni kua dibhata diê.

²⁸ Kala kiki, akua Midiiana kienhokio a toloka bhu pholo ia anʼa Izalaiele, ka zangula dingi mítue iâ mu kusota kuvua Izalaiele. Ixi anga i kala ni kutululuka mu makuinhi auana a muvu, mu izúua ia Ngidiione.

²⁹ Jelubaale monʼa Jouaji, anga uia u tunga bhu bhata dié.

³⁰ Ngidiione anga u kala ni makuinhi sambuadi a mona, a mu tundu ku miogo iê; mukonda muene ua kexi ni ahatu avulu.

³¹ A nga u kala ni mukama uê bhu Xikeme, u mu vualela ue monʼa diiala, hé u mu luka dijina dia Abimeleke.

³² Ngidiione monʼa Jouaji anga u fua, kia zubha kubhiẋila mu mivu iavulu, ua kuka muene; anga a mu funda mu mbila ia Jouaji tatʼâ, mu Ofila ia akua Abi-ezele.

³³ Mu kukala-phe, kia zubha Ngidiione kúfua, anʼa Izalaiele a di bhange dingi jindumbu mu kukaiela Jibaale, anga a ta-bhu Baale-belite mu kala nzambi iâ.

³⁴ Anʼa Izalaiele anga a fula kuxinganeka Jihova Nzambi iâ, ua a kudila jinga bhu lukuaku lua jinguma jâ, ku mbandu ni mbandu;

³⁵ a fula ue kuidikiza henda ku dibhata dia Jelubaale, a muedi Ngidiione, kala kia tokalele mu mbote ioso ia bhanga jinga muene kua Izalaiele.