Afundixi 7 - O Mikanda Ikola

Ngidiione u vutula athu katé kia xala ni hâma jitatu ngó ja makuenze

¹ Bhenhobho Jelubaale, (muene Ngidiione), ni mundu uoso aia-nê kumoxi, a di meneka anga a ta kibangu bhu dijiia dia Halodi; o kilômbo kia akua Midiiana kia a kala ku mbandu ia kusuku tundé bhu kalundu ka Mbolé katé mu honga.

² Jihova anga u ambela Ngidiione, uixi: O mundu-ze u uala-nâ ua vuluʼé ngó, kuila eme ngi bhana akua Midiiana bhu lukuaku luâ. Sumba Izalaiele u ngi tela nzabala, kuila: Lukuaku luami eme-muène lua ngi bhulula.

³ Kiki-phe bhana ngolokela mu mátui ma mundu, kuila: Uoso uala ni uoma, uala mu teketa, a vutuke lusolo, mu mulundu ua Ngiliiade a muangane-mu. Ku mundu anga ku vutuka makuinhʼiadi a midi ni midi jiiadi; anga bhu xala ngó kuinhi dia midi.

⁴ Jihova anga u ambela dingi Ngidiione, uixi: Mundu hanji uavulu. A bheke ku menha, ngi ku tunguile-nâ kuenhoko. Mu kutula koko, oso ngi ku ambela, ngixi: Enhá ene uia-nâ, ene-phe muene aia; oso ngi ku ambela, ngixi: Enhá ka ii-ku, ene-phe a xala.

⁵ Kienhiki Ngidiione u bheka mundu ku menha. Jihova anga u ambela Ngidiione, uixi: Uoso uala kukabula menha ni lukuaku kala ki bhanga ímbua ni dimi, a di kalele; uoso ue u fukama ku jiphuna mu kúnua, a di kalele.

⁶ Ia-phe oso a kabula menha, o lukuaku luene luala kubhiẋidisa menha mu kanu, a tena hâma jitatu ja mala; mundu ua mukuá ene oso a fukama ku jiphuna mu kúnua.

⁷ Jihova anga u ambela Ngidiione, uixi: Hâma jitatu ja mala iá a kabula menha ni lukuaku, ene ngi mi bhulula-nâ, kua ene ku ngi bhakuila akua Midiiana bhu lukuaku luê; mundu ua mukuá a muangane, ene oso aie ku ididi iâ.

⁸ Ngidiione anga u tambula o huta ia kúdia ni jibuzina bhu maku a mundu hé u ji bhaka; akua Izalaiele oso muene anga u a muanganesa kala muthu ku balaka iê, u xala ngó ni hâma jitatu ja mala; kilômbo kia Midiiana anga ki mu kala bhoxi, mu honga.

Ngidiione u ivua nzoji ia mukua Midiiana

⁹ Mu kukala-pe usuku uenhó, Jihova u ambela Ngidiione, uixi: Balumuka, u kulumuke mu kúlua kilômbo; kuma nga ki bhakula bhu lukuaku lué.

¹⁰ O ki u kala-phe hanji ni uoma ua ku a lundumuna, kulumuka hanji ngoho eie muene ni kibese kié Pula, mu bhixile bhu kilômbo kiâ;

¹¹ u ivue kioso kiala kuzuela; phala maku a ku kale kiua ni nguzu ia ku vubuka bhu kilombo. Muene anga u kulumuka, ni Pula kibese kié, hé a bhixila bhua suku jifundu ja alangidi a kilombo.

¹² Akua Midiiana bhenhobho, ni akua Amaleke, ni ana a mukuá mu thunda-mbulu, a di zale mu honga kala kihoho mu kuvula, ni jikamelu jâ u lémbua ku ji tanga, mukuâ ni kisekele bhu ndundu ia kalunga mu kuvula.

¹³ Ngidiione kia zubha kutula bhu kilômbo kia akua Midiiana, u ivua muthu uala mu kunda mukuá nzoji iê ianjiua, uixi: Ivua nzoji i ngʼanjiua, ngi mona dikende dia mbolo ia sevada di dʼiza ni kumbolomoka mu kilômbo kia Midiiana, di di vunda ku balaka ia komandande, balaka anga i di bhala i di vudimika, ia xala bhoxi, ia buexuka.

¹⁴ Mukuá anga u mu kumbulula, uixi: Kienhiki, ki kima kiengi, kana; ki tokala o xibhata ia Ngidiione monʼa Jouaji, mukua Izalaiele. Mukonda Nzambi ua bhakula Midiiana ni kifuẋi kioso bhu lukuaku luê.

¹⁵ Anga ki bhita, kuila, kia zubha Ngidiione kuívua nzoji ia tange ialʼó, ni mukuá kia mu jimbuila-iu, u samba; anga u vutuka ku kibangu kia Izalaiele, uixi: Balumukenu, kuma Jihova ua bhakula kifuẋi kia Midiiana bhu maku metu.

¹⁶ Anga u uanununa o hâma jitatu ja mala mu ibuka itatu, anga u a kuatesa ene oso jibuzina ni masanga bhu maku; mu masanga-phe ki muala kima, u tesa-mu imakôngolo ia uama túbhia.

¹⁷ Anga u a ambela, uixi: Mu ngi tala eme, mu kaiela ioso i ngi bhanga; mu kuila nga bhixila bhua suku o kilômbo, kioso ki ngi bhanga eme, enu uenu kiene ki mu bhanga.

¹⁸ Eme ngʼila ngi xika mbungu kumoxi ni iá oso ala ni eme, enu uenu xikenu jimbungu mu mbandu joso ja kilômbo, mu kole, muexi: Xibhata ia Nzambi ni ia Ngidiione.

Kilômbo kia Midiiana a ki kaia

¹⁹ Kala kiki, Ngidiione ni hâma ia mala aia-nê, a bhixila bhua suku o kilômbo, bhu ola ia kumatekena kilangidilu kia mu kaẋi dia usuku, kuila kindala kia te-ku athu engi ku kilangidilu. Anga a xika jimbungu hé a bula o masanga bhu maku.

²⁰ Ibuka itatu ioso anga a xika jimbungu, a bula masanga, a kuata makôngolo ma túbhia bhu lukuaku lua kiasu, o lukuaku lua kúdia lua kuata mbungu ia kuxika. Anga a kola exi: Ku xibhata ia Nzambi ni ia Ngidiione,

²¹ Anga emana kala muthu bhu kididi kiê, kilômbo a ki bhake mu kaẋi; kifuẋi kioso-phe kia akua Midiiana anga ki lundumuka ni lusolo, a dikola-kola, anga aia ni kulenga.

²² A xiki kia kuata kuxika o hama jitatu ja jimbungu, Jihova u bhangesa kuila mu kifuẋi muthu ni muthu xibhata iê u i fomuena mukuá, anga kifuẋi kioso (kia akua Midiiana) a kala mu di ta mudiâ ni ku di jibha-jibha. Kifuẋi kioso anga ki lenga katé bhu Bete-xita, ala kuila njila ia Zelela, katé mu jimbambe ja Abele-mehola bhua lulama ni Tabate.

²³ Bhenhobho mala ma akua Izalaiele, anga a di kasa, ni mua Nafitali, ni mua Asele, ni Manasa ioso, hé a kuata kukaia akua Midiiana.

²⁴ Ngidiione muene ue anga u tuma jiphunga mu milundu ioso ia Ifalaime, uixi: Kulumukenu mu batuile akua Midiiana, mu a diangele ku kuata o matabhu a kuzaukila, katé bhu Bete-bala, mu matabhu a Njolodá. Kala kiki mala a Ifalaime oso a di kasa, anga a kuata matabhu katé bhu Bete-bala, o matabhu a kuvuua mu Njolodá.

²⁵ Anga a kuata jingana jiiadi, anʼa jisobha ja Midiiana, Olebe, ni Ziiebe; Olebe anga a mu jibhila bhu ndánji ia Olebe; o Ziiebe a mu jibhila bhu ditangi dia Ziiebe; anga aia kiua ni kukaia akua Midiiana; o mitue ia Olebe ni Ziiebe, anga a i bhekela Ngidiione ku sambua dia Njolodá.