Afundixi 3 - O Mikanda Ikola

O miji ia kambe kuijiia Nzambi mu kaẋi ka Izalaiele

¹ Enhá ene akua ʼxi a xala-ku, a a xi kuala Jihova mu kulola-nâ muẋima ua Izalaiele, oso ku Izalaiele a kambe kuijiia ita ioso ia Kanana;

² mbé miiji ia anʼa Izalaiele a kʼijiie, a di longe kúlua ita, oso mʼokulu kejidile luua kúlua;

³ sobha jitanu ja akua Fidíxia, ni akua Kanana oso, ni akua Sidónia, ni akua Hivi a tungu mu mulundu ua Libano, tundé mu mulundu ua Baale-helemone katé bhu phaka ia Hamate.

⁴ Iá a xala, mu kulola-nâ o muẋima ua Izalaiele, phala kuijiia mba a xikina kuívua ijila ia Jihova, ioso ia bhele ku jitata jâ, mu ukunji ua Mozé.

⁵ Anʼa Izalaiele-phe anga a tunga kumoxi ni Makanana, ni Mahiti, ni Mamodi, ni Mapelezi, ni Mahivi, ni Majebuzi;

⁶ anga a bhenga anʼâ a ahatu mu kala ahatuʼâ, a bhana ue anʼâ a ahatu kua anʼâ-êne a mala, hé a bhikila o jinzambi jâ.

Kuxane, sobha ia Sídia, u bhikisa Izalaiele

⁷ Anʼa Izalaiele anga a bhanga kiaiibha ku mesu a Jihova, kuma Jihova, Nzambi iâ, a mu jimbi hé a bhikila Jibaale ni iteka ia Jitalote.

⁸ Mukonda dia kiki, njinda ia Jihova i uama ku thandu dia Izalaiele, anga u a sumbisa bhu lukuaku lua Kuxane-Lesataime muenexi ku Mezopotâmia; anʼa Izalaiele anga a bhikila Kuxane-Lesataime mu nake dia muvu.

Otoniiele u a kudila

⁹ Anʼa Izalaiele anga a dikola kua Jihova, Jihova anga u a zangelekela mubhuludi uâ, u bhulula anʼa Izalaiele: Muene Otoniiele, monʼa Kenaze, ndenge ia Kalebe.

¹⁰ Nzumbi ia Jihova anga iiza ku thandu diê, u kala mu fundisa Izalaiele; anga u tunda mu kúlua ita, Jihova anga u bhakula Kuxane-Lesataime, sobha ia Sídia, bhu lukuaku luê; lukuaku luê anga lu lenda o kutolola Kuxane-Lesataime.

¹¹ Ixi anga i tululuka hanji mu makuinhi auana a muvu. Otoniiele monʼa Kenaze anga ufua.

Ubhika kua Engolone, sobha ia Mouabhe

¹² Anʼa Izalaiele anga a tona dingi kubhanga kiaiibha mu mesu a Jihova; Jihova anga u bhana kutena kua Engolone, sobha ia Mouabhe, mu butula Izalaiele, mukonda ene a bhange kiaiibha ku mesu a Jihova.

¹³ Muene anga u bhongolola ni anʼa Amone ni Amaleke; hé uia, u nemeka Izalaiele, u tambula mbonge ia máie.

¹⁴ Anʼa Izalaiele anga a bhikila sobha ia Mouabhe mu kuinhi dia muvu ni nake.

Ehudi u kudila Izalaiele

¹⁵ Anʼa Izalaiele-phe anga a di kola kua Jihova, Jihova anga u a zangelekela mubhuludi uâ, muene Ehudi monʼa Jela, mukua muiji ua Bejamí, mukua kiasu. Anʼa Izalaiele anga a mu katula kuia mu kubheka ujitu kua Engolone sobha ia Mouabhe.

¹⁶ Ehudi anga u iudika xibhata iê ia mazu aiadi, kulebha kuê kóvadu, anga u i maneka moxi dia kizuatu kiê, ku ditabela dia mbandu ia kúdia.

¹⁷ Anga u bhakula ujitu kua Engolone sobha ia Mouabhe; Engolone-phe u neta kiavulu.

¹⁸ Kia zubha kubhakula o ujitu ueza na-u, u sulula jingamba jejile-nê ku mu bheka ni ujitu.

¹⁹ Muene anga u vutukila bhu matadi a iteka ia kusonga, bhu Jidingale, anga u mu ambela, uixi: Sobha ngala ni njimbu ia ku ku tudila, i tokala bhua kondama ku ubheka. Muene anga u tuma, uixi: Dixibhe. Ene oso a mu imanena anga a tunda bhu kanga.

²⁰ Ehudi anga u bokona muoso muala sobha; u mu sanga ua xikama u bheka uê mu tambula mulenge mu sala ku thandu. Ehudi anga u zuela, uixi: Ngala ni njimbu ia ku ku tudila ia tundu kua Nzambi.

²¹ Muene anga u balumuka mu kialu muala. Ehudi anga u sunga lukuaku luê lua kiasu, u fomona xibhata ia maneka ku ditabela dia kúdia, u mu toma na-iu mu mala;

²² o mubhinhi anga u kaiela o phoko ma bokona, ua naminina mu banha; xibhata ka i fomona dingi mu mukutu uê, ia tundidila ku kunda. Anga u xidisila bhobho.

²³ Ehudi anga u tundila mu mbalanda, mabhitu a xilu, a kuartu ia ku thandu, ua a jika, hé u ta-ku sabhi.

²⁴ Kia zubha kutunda, akua mbèle eza, a sanga mabhitu a xilu dia thandu, òte sabhi; exi-phe: Kidi kiene uala ku di futa inama mu xilu.

²⁵ Anga a kinga katé kia a kumu, muene-phe ka xikina kujikula, a katula sabhi, a jikula-ku, a sanga ngana iâ ua dibhale, iú bhoxi, uafu.

²⁶ Kioso-phe kia laleka kiki, Ehudi uaii dikanga, bhu matadi a iteka ia kusonga ua somboka-bhu, anga a mu lémbua, u bhixila mu Seíle.

²⁷ Kia zubha kutula koko, u xika koloneta mu milundu ia Ifalaime; anʼa Izalaiele anga a kulumuka-nê kumoxi, a tundu mu milundu, muene ua a tuamenena ku pholo.

²⁸ Uixi: Ngi kaiedienu; kuma Jihova ua bhakula jinguma jenu ja akua Mouabhe bhu lukuaku luenu. Anga a kulumuka ku kunda dia muene, a kuata matabhu oso a kuvúua mu Njolodá, mu batuila akua Mouabhe, kehela muthu kuzáuka.

²⁹ Ku akua Mouabhe-phe anga a beta-ku kuinhi dia midi ia muthu kithangana kienhokio, uoso diiala dia nguzu, uala dizonda dia kubhânga, ki bhuala muthu ua a xi bhu maku, ni muthu umoxi ngó.

³⁰ Kienhiki Mouabhe ua toloka kizúua kienhókio, bhoxi dia lukuaku lua Izalaiele. Ixi anga i tululuka mu makuinhi nake a muvu.

Sangale u kula Izalaiele bhu maku a Jifilisteu

³¹ O kua muene ku kaiela Sangale monʼa Anati, hé u beta ku akua Fidíxia hâma jisamanu ja muthu ni ngiiada ia kukombuela jingombe; muene ue u bhulula Izalaiele.