ހަރުބަސްތައް 8 - ކިތާބުލް މުޤައްދަސާ

ބުއްދިއަށް ކުރެވުނު ތާރީފު

¹ ބުއްދި ކަމަނާގެ އަޑު އަހާށެވެ. އެކަމަނާގެ އަޑު ގަދަވަމުން ދާން ފަށައިފިއެވެ.

² އެ އަޑު ކޮންމެ ހަތަރު އަނގޮޅިއަކުން އިވޭނެއެވެ. ކޮންމެ ފަރުބަދައެއްގެ އުހުން ވެސް އިވޭނެއެވެ.

³ އެ އަޑު ބޮޑު ދޮރާއްޓެއްގެ ކުރިމަތީގައި ހުންނާނެއެވެ. އެ އަޑު ހަރުއަޑުން ގޮވާނެއެވެ.

⁴ ”⁠އަހަރެން މިގޮވަނީ މިބިންމަތީގައި ތިބިހާ ބަޔަކަށެވެ.

⁵ ޖާހިލުންނޭވެ. ވިސްނާ ފިކުރުކުރާށެވެ. މޮޔައިންނޭވެ. ދެނެގަނެ ފަހުމު ކުރާށެވެ.

⁶ ނިކަން އަޑުއަހާށެވެ. އަހަރެން މިބުނަނީ އަގުހުރި ބަސްތަކެވެ. ތެދުބަސްތަކެވެ.

⁷ އަހަރެންގެ އަނގަ އަބަދުވެސް ބުނަނީ ތެދުބަސްތަކެވެ. ދޮގުބަސްތައް މަގޭ ތުންފަތަކަށް ކެތެއް ނުވެއެވެ.

⁸ އަހަރެން ބުނާ ހުރިހާ އެއްޗަކީ ހަމަ ޙައްޤު ތެދެވެ. ޙަޤީޤަތާއި ޚިލާފު އޮޅުވާލުމުގެ ބަހެއް ނުބުނަމެވެ.

⁹ ކަލޭމެންގެ ކިބައިގައި ކިރިޔާ ވެސް ވިސްނުމެއް ހުރިނަމަ އަހަރެން މިބުނަނީ ތެދެއްކަން ސާފުކޮށް އޮޅުމެއްނެތި އެނގިގެންދާނެއެވެ.

¹⁰ ރިހީގެ ބަދަލުގައި އިރުޝާދުތަކުގައި ހިފާށެވެ. ރަނުގެ ބަދަލުގައި އިލްމުގައި ހިފާށެވެ.

¹¹ އަހަރެން މީ ޙިކުމަތެވެ. އަހަރެން ހުރިހާ ޖަވާހިރަކަށް ވުރެން އަދި ހިތްއެދޭ ކޮންމެ އެއްޗަކަށް ވުރެން ވެސް އަގުބޮޑެވެ.

¹² އަހަރެން މީ ޙިކުމަތެވެ. އަހަންނާއެކު ތަންދޮރުދަތުން ވެއެވެ. އަހަންނަށް ކަންތައް ކުރަންވީ ރަނގަޅުގޮތާއި މޮޅުގޮތްތައް އެނގެއެވެ.

¹³ މާތްރަސްކަލާނގެއަށް ކަލޭމެން ބިރުވެތިވާނަމަ ކަލޭމެން ނުބައި ނުލަފާކަމާ ދުރުހެލިވާށެވެ. އަހަރެން ބޮޑާކަމާއި ކިބުރުވެރިކަމާއި ދޮގުވެރިކަމާއި ގޯސްކަންތައް ދެކެ ނަފްރަތު ކުރަމެވެ.

¹⁴ އަހަރެން ގަސްތުކުރާ ކަންތައް ކޮށް ނިންމަމެވެ. އަހަރެންގެ ހަމަބުއްދި ހުރެއެވެ. އަހަރެން ގަދަފަދައެވެ.

¹⁵ ރަސްކަލުން އަމުރުމައުރޫފު ހިންގަނީ އަހަރެންގެ އެހީގައެވެ. އަދި އަދުލުވެރިކަމާއެކު ނިޔާކަނޑައަޅަނީ އަހަރެންގެ ބޭނުން ހިފައިގެންނެވެ.

¹⁶ މި ބިންމަތީގައި ތެދުވެރި ކޮންމެ ވެރިޔަކު ވެސް އަމުރު ހިންގަނީ އަހަރެންގެ އެހީގައެވެ.

¹⁷ އަހަރެން ދެކެ ލޯބިވާ އެންމެން ދެކެ އަހަރެން ލޯބިވަމެވެ. އަހަރެން ހޯދާ މީހަކަށް އަހަރެން ފެންނާނެ އެވެ.

¹⁸ އަހަރެން ކަލޭމެންނަށް ދެމިގެންދާ މުއްސަނދިކަންދީ އިއްޒަތްތެރިކޮށްދީ އަދި ކާމިޔާބާއި ޝަރަފުވެރިކަން ދެމެވެ.

¹⁹ އަހަރެންގެ ކިބައިން ކަލޭމެންނަށް މިލިބޭ ތަކެތި އެންމެ މޮޅު ރަނާއި އެންމެ ސާފު ރިއްސަށް ވުރެން މާ އަގުބޮޑެވެ.

²⁰ އަހަރެން އަބަދުވެސް ކަންތައް ކުރަނީ ޙައްޤާ އެއްގޮތަށެވެ. އަދި އިންސާފުވެރިކަމާ އެކުގައެވެ.

²¹ އަހަރެން ދެކެ ލޯބިވާ އެންމެންނަށް އަހަރެންގެ ފަރާތުން އަގުބޮޑު ޚަޒާނާތައް ދެމެވެ.

²² މާތްރަސްކަލާނގެ ހުރިހާ އެއްޗެއް އުފެއްދެވުމުގެ ކުރީގައި އަހަރެން އެކަލާނގެއާއެކުގައި ވީމެވެ. އަހަރެން މީ އެކަލާނގެ އެންމެ ކުރީގައި އުފެއްދެވި އެއްޗެވެ.

²³ އަޒަލުގައި މިކަންތައް ހިނގީ މިގޮތަށެވެ. އަހަރެން އުފެއްދެވީ ދުނިޔެވެސް އުފެއްދެވުމުގެ ކުރީގައެވެ.

²⁴ އަހަރެން އުފަންވި އިރަކު ކަނޑެއް، ކޯދުލައިއަރާ ފެނުގެ ފައްވާރާއެއް ނެތެވެ.

²⁵ ފަރުބަދަތައް ބެހެއްޓެވުމުގެ ކުރީގައި ވެސް އަހަރެން އުފައްދަވާފައި ވެއެވެ.

²⁶ މިކަން ހިނގީ މާތްކަލާނގެ ބިމާއި ބިމުގެ ދަނޑުފަނގުތަކާއި ހިރަފުސް ވެސް އުފެއްދެވުމުގެ ކުރީގައެވެ.

²⁷ މާތްކަލާނގެ އުޑުތައް އުފައްދަވައި ކަނޑުތަކުގެ މަތީގައި އުދަރެސް ފެތުރުއްވި އިރު ވެސް އަހަރެން ހުރީމެވެ.

²⁸ އެކަލާނގެ އުޑުމަތީގައި ވިލާތައް ބެހެއްޓެވި އިރު ވެސް އަހަރެން ހުރީމެވެ. އަދި ކަނޑުގެ ފުނުން ފެން އެރުއްވި އިރު ވެސް އަހަރެން ހުރީމެވެ.

²⁹ އަދި ކަނޑުގެ ލޮނުގަނޑު ވަކިވަރަކަށް ވުރެން އުސް ނުވުމަށް އަންގަވައި ބިމުގެ ބިންގާ އެޅުއްވި އިރު ވެސް އަހަރެން ހުރީމެވެ.

³⁰ އެހުރިހާ ކަމެއް އެކަލާނގެ ކުރެއްވި އިރު އަހަރެން ހުރީ އާރުކާޓީއެއްގެ ގޮތުގައެވެ. އަހަރެން އެކަލާނގެއަށް އުފާލިއްބައިދޭން ހުރީމެވެ.

³¹ އެކަލާނގެ ދުނިޔެ އުފެއްދެވި އިރު އެތަނުގައި ހުރެވުނީތީ އަހަރެން ކިހާ އުފަލެއްވާނެ ހެއްޔެވެ؟ ދުނިޔޭގައި އާދަމުގެދަރިން ލެއްވީތީ އަހަރެން ކިހާ އުފާވާނެ ހެއްޔެވެ.

³² ވީމާ މަގޭ ދަރިންނޭވެ. އަހަންނަށް ސަމާލުކަން ދޭށެވެ. އަހަރެން ބުނާގޮތް ހެދުމުން ކަލޭމެންނަށް އުފާ ލިބޭނެއެވެ.

³³ ކަލޭމެންނަށް މި ދަސްކޮށް ދެވުނުކަންތައް ރަނގަޅަށް ބަލައިގަނެ އެގޮތުގެ މަތިން ބުއްދިވެރި ކަންކަމަށް ސަމާލުކަން ދޭށެވެ.

³⁴ އަދި ކޮންމެ ދުވަހަކު އައިސް އަހަރެން ބުނާ އެއްޗެއް އަޑުއަހަން އަހަރެންގެ ގޭދޮށުގައި އިންތިޒާރުގައި ތިބޭށެވެ. އޭރުން ކަލޭމެންނަށް އުފާވެރިކަން ލިބޭނެއެވެ.

³⁵ އަހަރެން ފެންނަ މީހަކަށް ދިރުން ލިބޭނެއެވެ. އަދި އެބަޔަކާ މެދު މާތްރަސްކަލާނގެ ރުހިވޮޑިގެންވާނެއެވެ.

³⁶ އަހަރެން ނުހޯދައިފި ނަމަ ގެއްލުން ހުރީ އެމީހަކަށެވެ. އަހަރެންދެކެ ނަފްރަތު ކުރާ މީހާ ލޯބި ކުރަނީ މަރަށެވެ.⁠“