ހަރުބަސްތައް 11 - ކިތާބުލް މުޤައްދަސާ

ބުނާބަސްތަކާއި ކުރާކަންތަކަށް ސަމާލުވާށެވެ.

¹ ހީލަތްތެރިން ދެކެ މާތްރަސްކަލާނގެ ރުހިވޮޑިއެއް ނުގަންނަވައެވެ. އެކަލާނގެ ލޯބިވަނީ ތެދުވެރިން ދެކެއެވެ.

² ބޮޑާ މީހާގެ ލަސްތަކެއް ނުވެ އަގު ވެއްޓިދާނެއެވެ. ހިތްތިރި ކަމަކީ ހިކުމަތްތެރި ކަމެކެވެ.

³ ރަނގަޅު މީހާއަށް ތެދުވެރިކަން މަގުދައްކާނެއެވެ. ދޮގުވެރިޔާ ބެދޭނީ އޭނާގެ ކެހިވެރިކަމުގެ މަޅީގައެވެ.

⁴ މަރު އައިސް ޖެހުމުން ފައިސާގެ ބޭނުމެއް ނުފުދެއެވެ. ފުރާނަ ސަލާމަތްވަނީ ތެދުވެރިކަމުންނެވެ.

⁵ ޙަޤީޤީ ރަނގަޅު މީހާ ކުރާކަންތައް އޮމާންވެ ސާފުސީދާ ވާނެއެވެ. ނުބައިމީހާ ވެއްޓޭނީ އޭނާގެ ފާފައިގެ ތެރެއަށެވެ.

⁶ ތެދުވެރިންނަށް އެމީހުންގެ ޞާލިޙުކަމުގެ ސަބަބުން ސަލާމަތްކަން ލިބެއެވެ. ބަހުގެ އިތުބާރު ނުހިފޭ މީހާ ޖެހޭނީ އޭނާގެ އަމިއްލަ ދަހިވެތިކަމުގެ ދަންތުރައިގައެވެ.

⁷ ނުބައިމީހާ މަރުވެދާއިރު އޭނާއާއެކު އޭނާގެ އުންމީދުތައް ވެސް ވަޅުލެވިދެއެވެ. މުއްސަނދިކަމަށް އެމީހުން ކުރި އިތުބާރު ވެސް ގެއްލިދެއެވެ.

⁸ މުސީބާތް ނުބައި މީހުންނާ ކުރިމަތިވަނީ ހެޔޮމީހުން ފަހަނަޅާ އައިހެވެ.

⁹ ނުބައި މީހުންގެ ނުބައި ބަސްތަކުން އަވަށްޓެރިޔާއަށް މުސީބާތް ކުރިމަތި ކުރެއެވެ. އެހެންނަމަވެސް ހެޔޮ މީހާ ތަންދޮރު ދަންނާތީ އޭނާގެ ރައްކާތެރިކަން ހޯދައިގަނެއެވެ.

¹⁰ ހެޔޮ މީހާއަށް ކާމިޔާބު ލިބި ނުބައި މީހުން ނެތިވެ ދިއުމުން، މުޅި ރަށް އުފާ ފާޅުކުރެއެވެ.

¹¹ ހެޔޮމީހުން ރަށަށް އުފާފާގަތިކަމާއި ތަނަވަސްކަން ގެނެސްދެއެވެ. އެކަމަކު ހީލަތްތެރިންގެ ކެހިވެރި އަނގަތަކުން ރަށް ވަނީ އިންދިރާހެވެ.

¹² އަވަށްޓެރިޔާ ބަދުނާމުކޮށް ވާހަކަ ދެއްކުމަކީ މޮޔަކަމެކެވެ. ހަމަވިސްނޭ މީހަކުނަމަ ހުންނާނީ އަނގަމަޑުން ލައިގެންނެވެ.

¹³ އަނގަބޮޑުމީހާ ނުބުނާނެ ވާހަކައެއް ނުހުންނާނެއެވެ. އެކަމަކު އިތުބާރު ހުރި މީހާ އެކައްޗެއް ވެސް ބޭޒާރެއް ނުކުރާނެއެވެ.

¹⁴ މޮޔަ ވެރިން ގިނަވެއްޖެނަމަ އެތަނެއް ހަލާކުވާކަށް ލަހެއްނެތެވެ. ހެޔޮ ވެރިން ގިނަ ތަނެއްނަމަ އެތަނެއް ރައްކާތެރިވާނެއެވެ.

¹⁵ ނުދަންނަ މީހެއްގެ ދަރަންޏަކަށް ޒިންމާވުމަކީ ނުރައްކާތެރި ކަމެކެވެ. އެ ޒިންމާ ތިމާގެ ބޮލުގައި ނާޅާށެވެ.

¹⁶ ޚުލްގުހެޔޮ އަންހެނާއަށް އިޙްތިރާމް ލިބެއެވެ. ރަޙުމްކުޑަ މީހާއަށް ލިބެނީ މުއްސަނދިކަން އެކަންޏެވެ.

¹⁷ އޯގާވެރިކަމުން ހެޔޮ ބަދަލު ލިބެއެވެ. އަނިޔާވެރިކަމުން އޭނާއަށް ގެއްލުމާ ހަލާކު ލިބެއެވެ.

¹⁸ ނުބައި ނުލަފާ މީހުންނަށް ލިބޭ ދާއިމީ ފައިދާއެއް ނޯވެއެވެ. އެކަމަކު ހެޔޮކަންތައް ކުރާ މީހާއަށް ލިބޭނީ ދާއިމީ އިނާމެވެ.

¹⁹ ހެޔޮކަންތައް ކުރަން ހިތުލައިގެން ހުންނަމީހާ ދިރި ހުންނާނެއެވެ. ނުބައިކަންތައް ކުރަން ހިތުލައި ހުންނަ މީހާ މަރުވެ ނެތިދާނެއެވެ.

²⁰ މަކަރުވެރިން ދެކެ މާތްރަސްކަލާނގެ ނުރުހުންވެ ވޮޑިގަންނަވައެވެ. ހެޔޮމީހުން ދެކެ އެކަލާނގެ ލޯބިވެ ވޮޑިގަންނަވައެވެ.

²¹ ނުބައި ނުލަފާ މީހުންނަށް އެކަމުގެ ސަޒާ ލިބޭނެކަމީ ޔަޤީންކަމެކެވެ. އެކަމަކު މާތްކަލާނގެއަށް ކިޔަމަންތެރި ޞާލިޙުންނަށް އަދަބެއް ނުލިބޭނެއެވެ.

²² ވިޔާނުދާ ރިވެތި އަންހެނާއެކޭ އޫރެއްގެ ނޭފަތުގައި ލާފައި އޮންނަ ރަން އަނގޮޓިއެކޭ އެއްފަދައެވެ.

²³ ހެޔޮމީހުންގެ ބޭނުންތަކުން ލިބެނީ ހެވާއި ފައިދާއެވެ. ގޯސް މީހުންގެ ބޭނުންތަކުން ރޯވަނީ ނުރުހުމުގެ އަލިފާނެވެ.

²⁴ ދީލަތިކަމުން މީހާ މުއްސަނދިވެދެއެވެ. ބަޚީލުކަމުން މީހާ ފަގީރުވެދެއެވެ.

²⁵ ދީލަތިކަމުން ތަނަވަސްކަން ލިބެއެވެ. އަނެކާއަށް ފެންފޮދެއް ދޭމީހާއަށް ފެން ލިބޭނެއެވެ.

²⁶ ވިޔަފާރީގައި ބޮޑު އަގުނަގާ މީހާއަށް ލަޢުނަތް ލިބެއެވެ. އެކަށީގެންވާ ހެޔޮއަގެއް އަތުލާ މީހާއަށް ބަރަކާތް ލިބެއެވެ.

²⁷ ހެޔޮކަމަށް ބާރު އަޅާ މީހާއަށް އިޙްތިރާމް ލިބެއެވެ. މައްސަލަ އުފައްދަން އުޅޭ މީހާއާ ކުރިމަތިވާނީ މައްސަލަތަކެވެ.

²⁸ ތިމާގެ މުއްސަނދިކަމަށް ބަރޯސާވާ މީހާގެ މުއްސަނދިކަން ޚަރީފު މޫސުމުގެ ފަތްތަކެއްހެން ފައިބާނެއެވެ. މާތްރަސްކަލާނގެއަށް ބަރޯސާވާ މީހާ ބަހާރު މޫސުމުގެ ގަސްތަކުގެ ފަތްތައް ފަދައިން ތާޒާ ވާނެއެވެ.

²⁹ އާއިލާގެ ތެރޭގައި ހަމަނުޖެހުން އުފައްދާ މީހާއަށް އާޚިރުގައި އެކައްޗެއް ވެސް ނުލިބެއެވެ. މޮޔައިންވާނީ ބުއްދިވެރިންގެ އަޅުންނަށެވެ.

³⁰ ހެޔޮ ދިރިއުޅުމެއް އުޅޭށެވެ. އޭރުން ދިރިހުރުމުގެ ގަހުން މޭވާ ކާން ލިބޭނެއެވެ. ބުއްދިވެރިގޮތުގައި އުޅޭނަމަ ރަޙުމަތްތެރިން ތިމާގެ ފަސްފަހަތުން އަންނާނެއެވެ.

³¹ ބިންމަތީގައި ހެޔޮމީހުންނަށް ހެޔޮކަމުގެ އިނާމު ލިބޭއިރު ނުބައި މީހުންނަށް ލިބޭ ނުބައިކަމުގެ ސަޒާ މާ ބޮޑު ނުވާނެ ހެއްޔެވެ؟