ޢިބްރާނީންނަށް ސިޓީ 5 - ކިތާބުލް މުޤައްދަސާ

އީސާގެފާނު މަލްކީޞާދިޤު ފަދަ

¹ ކޮންމެ އުއްތަމަ އިމާމަކީ ވެސް އެހެން މީހުންނާ ބެހޭކަންކަން މާތްކަލާނގެއަށް ހުށަހަޅައި އެމީހުންގެ ފާފަތަކަށް ދައްކަންޖެހޭ ވެދުންތަކާއި ޤުރުބާނީ ހުށަހަޅަން މީސްތަކުންގެ ތެރޭން ހޮވާފައި ހުންނަ މީހެކެވެ.

² އުއްތަމަ އިމާމުގެ ކިބައިގައިވާ ބަލިކަށިކަމުގެ ސަބަބުން މަގުން ކައްސާލާފައިވާ މީހުންގެ ޖާހިލުކަން ހިތައި އެމީހުންނާމެދު ހަމްދަރުދީ ވެވެއެވެ.

³ މިހެންކަމުން އެހެން މީހުންގެ ފާފަތަކުގެ ކައްފާރާއާއެކު އޭނާގެ އަމިއްލަ ފާފަތަކުގެ ކައްފާރާ ވެސް ހުށަހަޅަން ޖެހެއެވެ.

⁴ މީހަކު ކިތަންމެ ބޭނުންވިޔަސް އޭނާއަކަށް އަމިއްލައަކަށް އުއްތަމަ އިމާމަކަށް ނުވެވޭނެއެވެ. އިމާމަކު އައްޔަން ކުރެއްވޭނީ މާތްރަސްކަލާނގެއަށެވެ. ހާރޫނުގެފާނަށް އުއްތަމަ އިމާމުކަން ދެއްވީ ވެސް މާތްރަސްކަލާނގެއެވެ.

⁵ އީސާ އަލްމަސީޙު އުއްތަމަ އިމާމަކަށް ވުމުގެ ޝަރަފު އަމިއްލަފުޅަށް ނުހޯއްދެވީ އެހެންވީމައެވެ. މާތްރަސްކަލާނގެ ވަޙީކުރެއްވީ މިހެންނެވެ. ”⁠ކަލޭގެފާނަކީ ތިމަންކަލާނގެ ދަރިކަލުންނެވެ. ކަލޭގެފާނުގެ ބައްޕަކަމަށް މިއަދު ތިމަންކަލާނގެ ވެ ވޮޑިގެންފީމެވެ.⁠“

⁶ އެހެން އާޔަތެއްގައި އެކަލާނގެ މިހެން ވެސް ވަޙީކުރައްވާފައި ވެއެވެ. ”⁠ކަލޭގެފާނަކީ މަލްކީޞާދިޤުގެ މަގުން ދާއިމަށް އިމާމެއްގެ ގޮތުގައި ހުންނަވާނެ ކަލޭގެފާނެވެ.⁠“

⁷ އީސާގެފާނު މަރުން ސަލާމަތް ކުރެއްވުމުގެ ބާރުފުޅު މާތްރަސްކަލާނގެ ކިބަފުޅުގައި އޮތެވެ. އޭރު އެކަލޭގެފާނު ބިންމަތީގައި ހުންނަވައި ކަރުނައަޅައި ގަދަ އަޑުފުޅުން ސަލާމަތަށް އެދި މާތްރަސްކަލާނގެއަށް ދަންނަވަމުން ދިޔައެވެ. އެކަލޭގެފާނުގެ ޚުޝޫއަތްތެރިކަމާއި މަޑުމޮޅިކަމުގެ ސަބަބުން މާތްރަސްކަލާނގެ އެކަލޭގެފާނުގެ އަޑުފުޅު އެއްސެވިއެވެ.

⁸ އެކަލޭގެފާނަކީ ދަރިކަލުންނެއް ކަމަކު ވޭނާއި ކެކުޅުންތަކުގެ ތެރެއިން ކިޔަމަންތެރި ވުމަށް ތަމްރީނު ވެވަޑައިގެންނެވިއެވެ.

⁹ މިގޮތުގެ މަތިން އެކަލޭގެފާނު ފުރިހަމަވެ ވަޑައިގަތެވެ. އަދި އެކަލޭގެފާނަށް ކިޔަމަންތެރިވާ އެންމެހާ މީސްތަކުންނަށް ދާއިމީ ދިންނެވުން ދެއްވުމުގެ ވަސީލަތަކީ އެކަލޭގެފާނު ކަމުގައި ހަމަޖެހިގެން ދިޔައެވެ.

¹⁰ ސަބަބަކީ މާތްރަސްކަލާނގެ އެކަލޭގެފާނު ހޮއްވެވީ މަލްކީޞާދިޤުގެ މަގުން އުއްތަމަ އިމާމަކަށް ހެއްދެވުމަށެވެ.

¹¹ މިކަމާ ބެހޭގޮތުން ދައްކާނެ ވަރަށް ގިނަ ވާހަކަތައް އެބަހުއްޓެވެ. އެހެންނަމަވެސް ކަލޭމެންނަށް މިކަންތައް އޮޅުންފިލުވައި ދިނުމަކީ އުނދަގޫ ކަމެކެވެ. އެއީ ކަލޭމެންގެ ފަހުމުވުން ކޮށިކަމުންނެވެ.

¹² މިހާރު ކަލޭމެން ތިއީ އެދުރުންގެ ގޮތުގައި ތިބެންޖެހޭ މީހުންނެވެ. އެކަމަކު ކަލޭމެންނަށް އަދިވެސް މި ޖެހެނީ މާތްރަސްކަލާނގެ އެންގެވި ބަސްފުޅުތަކުގެ އެންމެ އަސާސީ ކަންތައް ވެސް ބުނެދޭށެވެ. ކަލޭމެންނީ އަދިވެސް ހަރުކާނާ ނުކެވޭ ކިރުބޯ ޅަދަރިންތަކެއް ފަދަ ބައެކެވެ.

¹³ ކިރުބޯ ޅަދަރިންނަކަށް ކަންކަން ކުރާނެ ހެޔޮނުބައެއް ނޭނގޭނެއެވެ.

¹⁴ ހަރު ކާނާ ކެވޭނީ ބޮޑުވެ ތަސައްރަފު ފުދުނީމައެވެ. ހެޔޮނުބައި ވަކިކޮށް ދެނެގަތުމުގެ ތަމްރީނު ދެވުނީމައެވެ.