ނެރުއްވުން 36 - ކިތާބުލް މުޤައްދަސާ

¹ މާތްވެގެންވާ ފޭލިގެކޮޅު އެކަލާނގެ އެންގެވި ފަދައިން ތައްޔާރުކުރުމަށް ބަޞަލީލުއާއި އަހޫލިޔާބުއާއި އަދި މާތްރަސްކަލާނގެ ފަންނުވެރިކަމުގެ ކުޅަދާނަކަން ދެއްވި އެންމެންނާ ހަވާލު ކުރެވިއްޖެއެވެ.

² މި މަސައްކަތަށް ޝައުގުވެރިކަން ހުރި ހުރިހާބަޔަކު ގެންނަވައި އެމަސައްކަތް ކުރިއަށް ގެންދިއުމަށް މޫސާގެފާނު އެންގެވިއެވެ.

³ ބަނީއިސްރާއީލުގެ މީސްތަކުން އެފޭލިގެކޮޅު ހެދުމަށްގެނައި ތަކެތި މޫސާގެފާނު އެމީހުންނާ ހަވާލު ކުރެއްވިއެވެ. އަދި ކޮންމެ ދުވަހަކު ހެނދުނު މެދުކެނޑުމެއްނެތި މީސްތަކުން ތަކެތި ގެނެސް ދެމުން ގެންދިޔައެވެ.

⁴ ދެން އެފޭލިގެ ކޮޅު ހެދުމުގެ މަސައްކަތް ކުރަމުން ދިޔަ މީހުން މަސައްކަތް ހުއްޓާލާފައި ހިނގައްޖެއެވެ.

⁵ އެމީހުން ގޮސް މޫސާގެފާނަށް ދެންނެވިއެވެ. ”⁠މިމީހުން މިތަކެތި ގެންނަނީ މާތްރަސްކަލާނގެ ކުރަން އެންގެވި މަސައްކަތަށް ބޭނުންވާ ވަރަށް ވުރެން މާ ގިނައިން.⁠“

⁶ ދެން މޫސާގެފާނު ބަނީއިސްރާއީލުން އުޅޭ ފޭލިގެތަކަށް އެންގެވުމެއް ފޮނުއްވައިފިއެވެ. ”⁠އެކަކު ވެސް ދެން އިތުރަށް މާތްކަލާނގެ ފޭލިގެކޮޅު ހެދުމަށް އެއްވެސް އެއްޗެއް ގެނަސްގެން ނުވާނެ.⁠“ އޭގެ ފަހުން އެކަކު ވެސް ދެން އިތުރަކަށް އެއްޗެއް ނުގެނެއެވެ.

⁷ އެއީ މީސްތަކުން ހަދިޔާކުރި ތަކެތި ހުރިހާ މަސައްކަތެއް ކޮށް ނިމި އިތުރުވާ ވަރަށް ވެސް ހުރީމައެވެ.

ފޭލިގެކޮޅު ހެދުން

⁸ ކަމުގެ ފަންނުވެރިން އައިސް ފޭލިގެކޮޅާއި އެތާނގެ ފަރުދާތައް ތައްޔާރުކޮށްފިއެވެ. އެމީހުން ނޫކުލައާއި ދަނބުކުލައާއި ގަދަރަތް ރޮދިން ކަރޫބީމު މަލާއިކަތުންގެ ސޫރަ ޖަރީކޮށްގެން މޮޅު ލިނެން ފޮތީގެ ދިހަ ފަރުދާ ތައްޔާރު ކުރިއެވެ.

⁹ އޭގެ ކޮންމެ ފަރުދާއެއްގެ ދިގުމިނުގައި ސާޅީސް ދެ ފޫޓު ފުޅާމިނުގައި ހަ ފޫޓު ހުއްޓެވެ. މި ހުރިހާ ފަރުދާތަކެއް ހުރީ އެއް މިނަކަށެވެ.

¹⁰ އެމީހުން އެ ފަރުދާތައް ދެބަޔަށް ބަހައި ކޮންމެ ބައެއްގައި ފަސް ފަރުދާ އެއްކޮށް ގުޅުވިއެވެ.

¹¹ ދެން އޭގެ އެންމެ ފަހު ފަރުދާގެ ކައިރިފަށުގައި ނޫކުލައިގެ ފޮތިން މަޅިތަކެއް ހަދައި ހަރުކުރިއެވެ.

¹² އޭގެ އެއް ފަރުދާގެ އަރިމަތީގައި ފަންސާސް މަޅި އަދި އަނެއް ފަރުދާގެ އަރިމަތީގައި ފަންސާސް މަޅި ހަރުކުރިއެވެ.

¹³ ދެން ރަނުގެ ފަންސާސް ބުޅި ހަދައި އެދެފޮތިގަނޑު އެއްފޮތިގަނޑަށް ވާނެ ފަދައިން ގުޅުވާލިއެވެ.

¹⁴ ދެން އެމީހުން ބަކަރީގެ ކެހެރިން ވިޔެފައިވާ އެގާރަ ފޮތިގަނޑު އެއްކޮށް ފޭލިގެކޮޅުގެ ބޭރުގައި ލުމަށް އުރަކޮޅެއް ހެދިއެވެ.

¹⁵ އޭގެ ކޮންމެ ފޮތިގަނޑެއް ވެސް ހެދީ އެއްމިނަކަށެވެ. އެއިން ކޮންމެ ފޮތިގަނޑެއްގެ ދިގުމިނުގައި ސާޅީސް ފަސް ފޫޓު އަދި ފުޅާމިނުގައި ހަ ފޫޓު ހުންނަ ގޮތަށެވެ.

¹⁶ އަދި އެމީހުން މި ފަރުދާތައް ދެބަޔަކަށް ބަހާލިއެވެ. އެއްބައިގައި ހަ ފަރުދާ އަނެއް ބައިގައި ފަސްފަރުދާ ވާ ގޮތަށް ގުޅުވާލިއެވެ.

¹⁷ މި ފަރުދާތަކުގެ ބޭރުކައިރިފަށުގައި އެމީހުން ފަންސާސް މަޅި ހަރުކުރިއެވެ. އަދި އަނެއް ފަރުދާއާގުޅޭ ކައިރިފަށުގައި ފަންސާސް މަޅި ހަރުކުރިއެވެ.

¹⁸ ދެން ކަފުލޮއިން ފަންސާސް ބުޅިގަނޑު ހަދައި އެދެފޮތިގަނޑު ގުޅުވައިގެން ފޭލިގެކޮޅުގެ އުރަކޮޅު ތައްޔާރު ކުރިއެވެ.

¹⁹ އެމީހުން އިތުރު ދެ އުރަކޮޅެއް ވެސް ހެދިއެވެ. އެއް އުރަކޮޅު ހެދީ ހިއްކައި ރަތް ކުލަ ޖައްސާފައިވާ ފިރިހެން ކަންބަޅި ހަމުން ވެ. އަނެއް އުރަކޮޅު ހެދީ މޮޅު ބަކަރި ހަމުން ވެ.

²⁰ ދެން އަކާސިޔާ ލަކުޑިން ފޭލިގެކޮޅުގައި ކޮޅަށް ބަހައްޓާ އޮނިގަނޑުތައް ހެދިއެވެ.

²¹ އޭގެ ކޮންމެ އޮނިގަނޑެއްގެ އުސްމިނުގައި ފަނަރަ ފޫޓު އަދި ފުޅާ މިނުގައި ހަތާވީސް އިންޗް ހުއްޓެވެ.

²² އޮނިގަނޑުތަކުގެ ދަށުގައި ވެސް އެ ހަރުކުރާނެ ދެ އިލި ހަދާފައިވެއެވެ. މި ހުރިހާ އޮނިގަނޑުތަކެއް ވެސް ހެދީ އެއް މިނަކަށެވެ.

²³ ފޭލިގެކޮޅުގެ ދެކުނު ބައިގައި ހަރުކުރުމަށް މީގެ ވިހި އޮނިގަނޑު އެމީހުން ހެދިއެވެ.

²⁴ އަދި މި އޮނިގަނޑުތައް ބަހައްޓަން ރިހީގެ ސާޅީސް ބުޑު ތައްޔާރު ކުރިއެވެ. އެއީ ކޮންމެ އޮނިގަނޑެއްގެ ދަށުގައި ދެ ބުޑު ހަރުކުރުމަށް ދެ އިލި ހުންނާނެހެންނެވެ.

²⁵ އަދި ފޭލިގެކޮޅުގެ އުތުރުބައިގައި ހަރުކުރުމަށް ވެސް ވިހި އޮނިގަނޑު ހެދިއެވެ.

²⁶ އޭގެ ކޮންމެ އޮނިގަނޑެއްގެ ދަށަށް ލެއްވުމަށް ދެ ބުޑު މަގުން ރިހީގެ ސާޅީސް ބުޑު ހެދިއެވެ.

²⁷ ފޭލިގެކޮޅުގެ ފަހަތުބައި ހުޅަނގު ބިތުގައި ހަރުކުރުމަށް އެމީހުން ހަ އޮނިގަނޑު ތައްޔާރުކުރިއެވެ.

²⁸ އަދި ކަންކަނުގައި ހަރުކުރުމަށް ވެސް ދެ އޮނިގަނޑު ތައްޔާރުކުރިއެވެ.

²⁹ ކަނުގައި ބެހެއްޓި އޮނިގަނޑުގެ ތިރިއާއި މަތި ހަރުކުރީ އެއް ބޮޅަކުންނެވެ. ކަނުގެ މި ދެ އޮނިގަނޑު ވެސް ހަދާފައި ހުރީ އެއްގޮތަކަށެވެ.

³⁰ މި ގޮތަށް އެމީހުން އަށް އޮނިގަނޑު ހެދިއެވެ. އޭގެ ކޮންމެ އޮނިގަނޑެއްގެ ދަށަށް ދެ ބުޑު ވާނޭހެން ސޯޅަ ބުޑު ތައްޔާރު ކުރިއެވެ.

³¹ ދެން އެމީހުން އަކާސިޔާ ލަކުޑިން ފަނަރަ ހުރަސް ބެރި ހެދިއެވެ. އެއީ ފޭލިގޭގެ އެއް އަރިމަތީގައި ހުރި އޮނިގަނޑުތަކަށް ފަސް ބެރި ވާނެހެންނެވެ.

³² އަދި އަނެއް އަރިމައްޗައް ވެސް ފަސް ބެރި ހެދިއެވެ. އަދި ހުޅަނގު ފަރާތަށް ފަސް ބެރި ހެދިއެވެ.

³³ އަދި އޮނިގަނޑުތަކުގެ ދެބައި ހަމަ ހިސާބުގައިވާ އެޅި ހުރަސް ބެރި ފޭލިގޭގެ އެއްކޮޅުން އަނެއްކޮޅަށް ފޯރައެވެ.

³⁴ މިއޮނިގަނޑުތަކާއި ހުރަސް ބެރިތަކުގައި ވަނީ ރަން އުނގުޅާފައެވެ. އަދި ހުރަސްދަނޑީގައި ހަރުކުރާނެ ރަނުގެ ބޮޅުތައް ހެދިއެވެ.

³⁵ ފޭލިގެކޮޅުގެ އެތެރޭގައި ހުރި ފަރުދާ އެމީހުން ތައްޔާރު ކުރީ މޮޅަށްވިޔެފައިވާ ފޮތިންނެވެ. އަދި އެފަރުދާގައި ނޫކުލައާއި ދަނބު ކުލައާއި ގަދަރަތްކުލައިގެ ރޮދިން ކަރޫބީމު މަލާއިކަތުންގެ ސޫރަ ކުރަހައި ޖަރީކޮށްފައި ވެއެވެ.

³⁶ ދެން އެމީހުން އަކާސިޔާ ލަކުޑީގެ ހަތަރު ތަނބު ހަދައި އޭގައި ރަން އުނގުޅައި ރަނުގެ ހަތަރު ބުޅި ހަރުކުރިއެވެ. މި ތަނބުތައް އެމީހުން ހަރުކުރީ ރިހީގެ ހަތަރު ބުޑުތަކުގެ މަތީގައެވެ.

³⁷ ފޭލިގެކޮޅުގެ ދޮރުކޮޅުމަތީގައި ދެމުމަށް މޮޅަށް ވިޔެފައިވާ ލިނެން ފޮތީގެ ފަރުދާއެއް އެމީހުން ތައްޔާރު ކުރިއެވެ. އަދި އޭގައި ނޫކުލައާއި ދަނބު ކުލައާއި ގަދަރަތްކުލައިގެ ރޮދިން ކުރެހުން އަޅައި ޖަރީކުރިއެވެ.

³⁸ އަދި މި ފަރުދާކޮޅު ހަރުކުރުމަށް އެމީހުން އަކާސިޔާ ލަކުޑިން ފަސް ތަނބު ހަދައި އޭގައި ބުޅި ހަރުކުރިއެވެ. އޭގެ މަތިން ވެސް ރަނުގެ ފަށަލައެއް ލިއެވެ. އަދި މި ތަނބުތައް ބަހައްޓާނެ ފަސް ބުޑު ވެސް ކަފުލޮއިން ތައްޔާރު ކުރިއެވެ.