Romaindjé 7 - Testament ke Siki 1960 (Kabba Laka)

¹ Egeridjé ang wa, ngakömdjé, mbata ma mpa tar ke dooudjé ke geré tar ndedji, tar ndedji ö doou ke nai tébe la ba ang wa?

² Tokou ban dènè ke éh ke ngaoèdjè, tar ndedji to dènè ke ngaoèdjè tokou ngaoèdjè isi ke tébe, a tokou ngaoèdjè woei, tar ndedji mbata ngaoèdjè goto dè té.

³ Tokou ban dènè ke taa mare dingao tokou ngaoèdjè isi ke tébe ba bai, a da barè to dènè kaiya. A tokou ngaoèdjè woei, dòrè tar ndedji té, bana tokou nè ntaa mare dingao nè nto dènè kaiya ang.

⁴ Ban to, ngakömdjé, sésè woeidjé mbä mbata tar ndedji, deo té lo da rò Christ, ta kare sésè asidjé mbòn ròsè ke mare doou, nè ke nï tarr mè bwa yo té, baa ta kare djase kan mbata Allah.

⁵ Tokou djèdjè djisi deo da rò té leo, boo né ke madjang lodjè ke téh deo tar ndedji té, da barkem ròdjè ta karedjè djan mbata kwoei.

⁶ A bashénè dòroudjè tar ndedji té, djèdjè djoei ke né té ke todjé leo, tokou ban djèdjè nda deo té lo tar maketourou té ke leo ang, a deo té lo tébe ke siki lo Ndil.

⁷ Tokou ban dja pana di wa? Tar ndedji to né ke madjang wa? Ngadji goto. Tokou tar ndedji pa arem ang, mam ngeré né ke madjang ang. Ma mase geré tar mè ang tokou tar ndedji pa ang, Ase kare eda mè ang.

⁸ A né ke madjang inga deo mè tar ndedji té baa ta da mare mè dang dang mem té. Mbata tokou tar ndedji goto, né ke madjang woei.

⁹ Mbata leo méh ke tébe tokou méh ke tar ndedji ang, a tokou tar ndedji dé mbä, né ke madjang ï ke tébe a ma moei.

¹⁰ Tar ndedji ndja ke to tar kadji dé to né yo mbata lom.

¹¹ Mbata né ke madjang ke inga deo mè tar ndedji té, erem baa tòlem deoè té.

¹² Tokou ban tar ndedji to madji toï, ke ndedji la to madji toï ke to gaté gaté, ke to né ke madji.

¹³ Tokou ban, né ke to madji dé to né yo mbata lom wa? Ngadji goto. To né ke madjang ke da baa ta karem moei deo né té ke to madji, baa ta tòdjou ke daka né ke madjang to madjang tokoro, ke deo té lo tar ndedji, né ke madjang ase ta dé madjang wota nya.

¹⁴ Djèdjè ngeré tar ndedji to né lo Ndil, a mam nto ngä da rò, ndokom ko né ke madjang té.

¹⁵ Mam ngeré né ke mam nda ang, mbata mam nda né ke mam ndiki ta da ang, a mam nda né nèn ndja ke ma mbeté.

¹⁶ A tokou mam nda né ke mam ndiki ta da ang, mam ndiki gè ke tar ndedji to madji.

¹⁷ Tokou ban to to ma ndja ke nda né marè bai ang, a to né ke madjang ke to mem té.

¹⁸ Mbata mam ngeré né ke madji kada to mem té ang, yèn pana, ke mè da rom té. Ma mase ta ndiki ta da né ke to gaté gaté, a ma mase ta da ang.

¹⁹ Mbata né ke madji ke mam ndiki ta da, mam nda ang, a né ke madjang ke mam ndiki ta da ang, to yèn ke mam nda.

²⁰ Bana tokou mam nda né ke mam ndiki ta da ang, to ma ndja ke nda yèn marè ang, a to né ke madjang ke to mem té.

²¹ Tokou ban ma minga to tar ndedji tokou mam ndiki ta da gaté gaté, né ke madjang éh ngosiba sem.

²² Mbata ma minga koukou tar ndedji té lo Allah ke doou ke mem té ndja.

²³ A ma mo mè barkem rom té mare tar ndedji ke doo ke tar ndedji gousou lom, nda baa ta karem ndé bere lo ndedji lo né ke madjang ke éh mè barkem rom té.

²⁴ Mam nto ndjè ongou nya. Na a kòroum rò yo té nèn wa?

²⁵ Mam nda woio Allah deo té lo Jésus Christ Mbaibé lodjè. Tokou ban ma ndja nda né ndedji lo Allah ke gousou lom, a ke da ròm mam nda né ndedji lo né ke madjang.