Romaindjé 1 - Testament ke Siki 1960 (Kabba Laka)

¹ Paul, bere lo Jésus Christ, mmarè to ndjè koula, ke mmarè ke daka mbata pa tar ke madji lo Allah.

² Ke nè nto ta da leo deo té lo prophètedjé la mè maketourou té lo Allah ke madji toï.

³ Tar ke madji lo Ngonè ke dé deo koudjou té lo David deo da rò té.

⁴ Ke ntourè to Ngon lo Allah ke singa deo té lo Ndil ke madji toï, deo kï la mè bwa yo té, Jésus Christ Mbaibé lodjè.

⁵ Deo té la djèdjè djinga tokou mè madji ke tar koula lo ndjè kouladjé, ta kare dooudjé ndiki gè ta ko mèdè té horo Gentildjé té toï mbata ria ndja.

⁶ Ke horodè té mmarsè to mbata to ngà Jésus Christ.

⁷ Moula mare dèdè toï ke déh Rome té, ke Allah ndikidè nya, ke mmardè ta dé ndjè ko mè tédjé, Allah Bòdjèdjè ke Mbaibé Jésus Christ aresè tokou mè madji ke mè woul.

⁸ Dongor, mam nda woio Allah lom deo té lo Jésus Christ mbata sésè toï, mbata ko mè té losè bar do nange té toï.

⁹ Mbata Allah to tar nadji lom, nè ke mam nda sa ke ndii lom mè tar té ke madji lo Ngonè, ma meo ang ta doudjou mbata losè mè doudjou Allah té lom ke ndò toï.

¹⁰ Mam ndoudjou tokou Allah ndiki gè, loshénè ba ma mase kinga deo ta dé ròsè té.

¹¹ Mbata mam ndiki ta kosè, ta karem ma mase karesè mare né kinga ba lo Ndil ke ase ta kare ngengidjé.

¹² Yèn pana, ta karedjè ndedjina deo ko mè té lodjè kada kada, losè ke lom tò.

¹³ Mam ndikisè ta geré, ngakömdjé, mam ndiki ta dé ròsè té gar baya, a nderèng bokonè deo lom tò, ta karem mase kinga mare ko horosè té deo kadaba ke horo kese Gentildjé té tò.

¹⁴ Ma méh ke tar dom té ta da kare Grecdjé ke kare dooudjé ke mè mou té, kare ndjè kemkarèdjé ke dooudjé ke to mbedjé deo kadaba to.

¹⁵ Tokou ban ma méh ke boo ta pa tar ke madji karesè tò, sésè ke éhdjé Rome té.

¹⁶ Mbata ma misi ke ròkoul mbata tar ke madji nèn ang, né nto singa lo Allah mbata kadji dooudjé kada kada toï ke wo mèdè té, mbata Juifdjé dongor ke mbata Grecdjé to.

¹⁷ Mbata ke mè té ntòdjou gaté gaté lo Allah ke daka deo ko mè té mbata ko mè té, deo kadaba tokou maketourou pa, Doou ke gaté gaté a kisi ke tébe deo ko mè té.

¹⁸ Mbata ongou lo Allah ï dara dé do né té toï ke mbeté Allah, ke do né ke madjang té lo dooudjé, dèdè ke dòkou tar ke tokoro deo né ke madjang té lodè.

¹⁹ Mbata né lo Allah ke dèdè dase ta geré, téh daka nodè té mbä, mbata Allah tòdjoudè mbä.

²⁰ Mbata lé té ke kounkoutou da nange té nèn, tar la ke kem ase ta ko ang, yèn to singa la ke ndò ke ndò ke tar Allah la, dooudjé ase ta geré madji deo né té ke nda mbä. Tokou ban dèdè déh ke tar ta tél né ang.

²¹ Mbata tokou dèdè ngeré Allah, dèdè mpitè tokou lo Allah ang, aséh darè woio ang, a tar kedji lodè dé né ke ba, ke londoul to mbe mèdè.

²² Mbata dèdè mpana dèdè nto ndjè kemkarèdjé, dèdè ndé mbedjé.

²³ Dèdè ntourou ndokoo lo Allah ke ase kwoei ang mbata makedjé ke to tokou dooudjé ke ase ta kwoei, aséh eldjé, aséh dadjé, aséh lidjé.

²⁴ Mbata tar nèn Allah ïyadè ta kare nda né ke madjang ase boo ke mèdè té, ta da né ròkoul ke ròdè horodè té.

²⁵ Mbata dèdè ntourou tar ke tokoro lo Allah mbata tar ngem, ke dèdè mpiti né ke nda mbä wota nè ke nto Ndjè da né, nè ke néh ke tar ke madji ke ndò ke ndò. Amen.

²⁶ Mbata tar nèn Allah ïyadè ke boo kaiya, mbata dènèdjé tourou tar ke to tar ròdè mbata tar ke to ke deoè ang.

²⁷ Dingaodjé to ïya deo to ke dènèdjé ke to deo ke madji, ke boo ödè tokou pourou ròdè té ke maredjé ke no, dingaodjé da ke dingaodjé né ke to ròkoul nya, ke dèdè dinga ròdè té kouka ase né ke madjang lodè.

²⁸ Deo kadaba tokou dèdè ndiki ta geré Allah ang, Allah ïyadè ke mè kedji té ke to gatang, ke ta da né ke to madjang.

²⁹ Mèdè dousou ke tar ke madjang dang dang toï, né ke madjang, mè, mè madjang, ndousou ke tar mè, ke tar tòl doou, tar kölna, tar kere, mè ta mbeténa, dèdè mpa tar ke madjang hoi.

³⁰ Ntoula dò dooudjé madjang, ndjè mbeté Allah, ntél tar madjang, dòdè ngeng, ndoi ròdè ndja, nsange deo ta da né ke madjang, do tar lo bòdèdè ke kòdèdè ang.

³¹ Mbedjé, ko mè té lodè goto, ndiki go tar lodè goto, mè madji lodè goto.

³² Dèdè nèn lé ngeré saria ke Allah gange do dooudjé té, ke dèdè ke nda né tokou ban to ta kinga yo, dèdè ndja ndadè kadèba ang, a dèdè ndiki gè ke maredjé ke da ban to.