Marəke 13 - Testament ke Siki 1960 (Kabba Laka)

¹ Tokou Jésus ao téh tokou kei Allah té, ndjè kao gè té kada pa arè, Ndjè tòdjou tar, wo err ke madji nya ke kei tokou madji nya.

² Jésus pa arè, Wo tokou kein lé wa? Err kada nèn a to dò marè té ang, toï a koso nange.

³ Tokou nè nisi kare err Olivier té ke no tòkou kei Allah nòè té, Pierre ke Jacques ke Jean ke André ndoudjè hoi,

⁴ Epa aredjè ndò ke né nèn a dé wa? Né di wa a dé to né tòdjou tokou nèn ao dé ngosiba ta téh wa?

⁵ Jésus ao pa aredè, Ngemidjé madji baa doou kada eresè ang.

⁶ Dooudjé tokou baya a dé ke rim, pana, Mam nto to nè, ke dèdè da kere dooudjé nya.

⁷ Tokou sésè woidjé doo to ke woidjé tar dòòna, edaidjé bel ang. To tar lo né nèn ta kare dé, a gelè nai bai.

⁸ Mbata gel dooudjé a kï ta mbeté mare gel dooudjé, ke mè béh ko a kï a mbeté mare béh kö. Dò nange a yè ke loou dang dang. Boo biriri a kö loou. Nèn to kounkoutou né ongou ba.

⁹ Ngemidjé ròsè mbata dèdè da kwaasè kare ndjè gange sariadjé, ke da koundasè mè kei Allah té. Sésè a kamdjé nò padjadjé té ke mbaibédjé mbata lom, mbata pa tar nadji nodè té.

¹⁰ Ase tòdjou tar ke madji lo Allah dooudjé toï dongor.

¹¹ Tokou dao kesè dèdè dwaasè loou saria té, esangidjé mèsè dongor ang epaidjé tar di wa. Epaidjé tar ke da karesè lé té ndja, mbata to sésè a paidjé tar ang, to to Ndil ke madji toï.

¹² Ngokö ke dingao a kwaa ngoköè ke dingao karè yo, ke bò ngon a da ban ke ngonè tò; ke ngandjé a kï ta mbeté bòdèdè ke ködèdè, dèdè da da baa ta tòldè.

¹³ Dooudjé toï a mbetésè mbata rim. Doou ke waa are ngeng sar ndò té ke goukou, nè na kinga kadji.

¹⁴ Ndò ke sésè a koidjé né ke madjang nya ke ao ta toudjou, nisi loou té ke to tar la ta kisi ang, are doou ke toura maketourou geré, bana are dooudjé ke isi nange té ke Judée aïngorou dò tòkou err té.

¹⁵ Are doou ke éh dò kei té disi ang, ke are nao mè kei té ta koun mare né la ang.

¹⁶ Are doou ke éh mè ndòò té tél ta djï koubou la ang.

¹⁷ Ongou a da dènèdjé ke waa sem ke dèdè ke ngandè il mba ndò té ke nou.

¹⁸ Edoudjidjé Allah mbata kare nèn dé nai koul té ang.

¹⁹ Mbata ndè té ke nou né ongou a dé, né ongou ke to tokou ban leo ang ke ndò ke dongor ke Allah ounkotè ta da né sar bokonè, ke né tokou ban a téh mare ndò kada ang.

²⁰ Tokou Mbaibé Seigneur gange ndè ang, doou kada a kinga kadji ang, a mbata lo dèdè ke Allah bardè ke daka, dèdè ke Allah mberedè, nè ngange ndè ngosiba.

²¹ Ke ndè té ke nou tokou doou pana, Woidjé Christ éh nèn, aséh, Woidjé nè néh yo, woidjé tar nèn ang.

²² Mbata lo christidjé ke ndjè ngemdjé ke prophètedjé ke ndjè ngemdjé da dé, da da né tòdjou ke né ke ta da baa kare mè dooudjé ounda dò bia, ta tòdjou deo kere kare dèdè ke Allah bardè ke daka, tokou dase ta da tokou ban.

²³ Ngemidjé madji, ma mpa maresè né toï dongor.

²⁴ Ndè té ke nou, gè té ndò ongou nèn, kade a ndoul ke nnè a ndokoo ang.

²⁵ Ke ndètélendèdjé a gaï nange, ke né singa ke dara dèdè da yè.

²⁶ Gè té da ko Ngon lo doou ao dé ke ndi ke il ke singa nya ke ndokoo.

²⁷ Ke gè té nè na koula angedjé ke dara ta mbòn dèdè ke Allah bardè ke daka, ke loou ke lél sò oula, ke ngange nange toï sar ngange dara toï.

²⁸ Lé sésè a koidjé gel tar gousou kake toungoutisa. Tokou barkem kake to ndèrè ndèrè a kamè ao téh, séxè egeridjé nnè lo nounga dé ngosiba.

²⁹ Tokou ban, tokou sésè woidjé tar nèn ao dé, sésè egeridjé Ngon lo doou éh ngosiba, ndò la ta dé éh ngosiba.

³⁰ Tokoro ma mpa maresè, gel dooudjén lé a kwoei ang sar né nèn toï dé mbä.

³¹ Dara ke nange a ndai, a tar lom a ndai ang.

³² Tar ke ndè té ke nou, aséh kade ke nou, doou kada geré ang. Angedjé ke dara aséh Ngon ndja geré ang, sè Bòi Allah kadaba gerè.

³³ Ngemidjé madji, ngemidjé edoudjidjé Allah mbata sésè egeridjé ndè ke a dé ang.

³⁴ To tokou lo doou ke ïya kei la ao isi mare béh té. Nè nare nganlokisidjé ta ngem, nè naredè koula lodè kada kada toï. Nè mpa nare ndjè ngem tadeo kei ta ngem madji.

³⁵ Tokou ban ngemidjé mbata sésè egeridjé ndò ke ndjè kei a dé ang, tokou kade woei aséh mè tilti, aséh tokou könra no aséh ke sindò.

³⁶ Tokou nè ndé loshénè loshénè nè nosè dò bi té.

³⁷ Né ke ma mpa maresè, ma mpa mare dooudjé toï, ngemidjé.