Lugu 9 - Testament ke Siki 1960 (Kabba Laka)

¹ Nè mmardè dòkou gérè djo ta mbòna. Nè naredè singa ke tè ta touba ndildjé ke madjang toï, ke ta kòrou rò too dang dang.

² Nè nouladè ta kao pa tar lo béh kö lo Allah, ke ta da rò dooudjé ke ndjè rò toodjé karedè ndé madji.

³ Nè mpa naredè, Ounidjé né kada ta kao né ke deo ang, kake ang, bòl ang, mourou ang, narè ang. Abidjé ke koubou djo ang tò.

⁴ Kei ke sésè abidjé mè té, isidjé nou nderèng sésè ïdjé ta kao to ke siki.

⁵ Loou toï ke ntaasè kendé ang, tokou sésè ïyaidjé béhn lé, etoundaidjé boum nange ke gòlsè té mbata tar nadji dòdè té.

⁶ Dèdè ntéh dao béh té kada kada toï, dèdè mpa tar ke madji, ke dare rò dooudjé dé madji loou té toï.

⁷ Hérode mbai ke er kada, wo tar toï ke nda nèn, mèa edji nya mbata mare dooudjé pana Jean ï mè bwa yo té.

⁸ Maredjé pana, Élie téh mbä nga, ke maredjé pana, prophète kada ke leo ï mbä nga.

⁹ Hérode pana, Ma moudja gòsou Jean, a yèn to na wa, ke ma mo tar la tokou ban? Nè nsange ta ko Jésus.

¹⁰ Tokou ndjè kouladjé tél, dèdè mpa dare Jésus né ke dèdè nda mbä. Nè nao kedè mare béh té ke dang, ria na Bethsaïda.

¹¹ Tokou dooudjé baya baya ke mbona wo tar nèn, dèdè dao gè té. Nè ndadè laphia madji, ke nè mpa tar béh ko lo Allah naredè. Dèdè ke disi ke rò too, nè nda kare ròdè ndé madji.

¹² Bana kade ata tourou, dèdè dòkou gérè djo ndé mpa darè, Are dooudjé ke baya baya nèn ao, ta kao béh té ke nange ke to ngosiba ta tibi, ke ta kinga mourou, mbata djèdjè djéh mè mou té nèn.

¹³ A nè mpa naredè, Sésè aridjédè mourou dön. Dèdè mpana, Mourou lodjè éh mi ke kaindji djo ba, ase kare djèdjè djao ndoko mourou mbata dooudjé nèn toï.

¹⁴ Mbata dingaodjé ase dourou mi. Nè mpa nare ndjè kao gè tédjé, Aridjédè disi nange ke kotè dang dang ase dòmi dòmi.

¹⁵ Dèdè nda ban, daredè toï disi nange.

¹⁶ Jésus oun mourou ke mi ke kaindji djo, nè naa loou ke dara, mmar tar ke madji dòdè té, nè noukou nkai dana nare ndjè kao gè tédjé ta kounda no dooudjé té ke baya baya.

¹⁷ Dèdè toï dön mèdè ndan. Dèdè mbòn kese mourou ke nai, ase karè dòkou gérè djo.

¹⁸ Ndò kada, tokou nè ke kadèba nao ndoudjou Allah, ndjè kao gè tédjé isi sa, nè ndoudjoudè, Dooudjé pana mam nto na wa?

¹⁹ Dèdè ntél tar mpana, Jean ndjè da baptême, maredjé pana, Élie. Maredjé pana, Prophète kada ke leo ï mbä nga.

²⁰ Nè mpa naredè, A sésè epaidjéna mam nto na wa? Pierre tél tar pana, Christ lo Allah ndja.

²¹ Jésus ndedjidè ke nè mpa ngeng naredè ta pa tar nèn kare mare doou kada ang.

²² Nè mpana, Ngon lo doou ase ta kinga né ongou nya, ke tokou dooudjé ke tokou ndjè kòrdjé, ke ndjè da maketourou ndedjidjé dèdè da mbetè, ke da tòlè, ke gè té ndò mouta nè nase ta kï.

²³ Nè mpa naredè toï, Tokou doou kada ndiki ta dé gom té, ase kare nè mbeté rè ndja, ke nase koto kake yo la ke ndò ke ndò ta kao gom té.

²⁴ Mbata doou ke ndiki ta kadji tébe la, tébe la a nai, a doou ke tébe la nai mbata lom, nè na kadjè.

²⁵ Tokou mare doou inga né ke nange nèn toï, a tébe la nai, né lé toï a da sa madji to di wa?

²⁶ Doou ke da ròkoul mbata ma ke tar lom, Ngon lo doou a da ròkoul mbata la ndò ke nè ndé ke ndokoo la, ke ndokoo lo Bèdjè ke lo angedjé ke madji toï.

²⁷ Ma mpa maresè ke tokoro, maredjé ke arr nèn da kwoei ang dongor dèdè da ko béh ko lo Allah.

²⁸ Ase ndò djidjo go tar té nèn, Jésus oun Pierre ke Jean ke Jacques, nao kedè do tokou err té ta doudjou Allah.

²⁹ Tokou nè nao ndoudjou, kèmè tél dang ke koubou la ndokoo ndaa nya.

³⁰ Wo, dooudjé djo pa tar sa, dèdè nto Moïse ke Élie.

³¹ Dèdè ntéh ke ndokoo, dèdè mpa tar lo kwoei la ke nè na kwoei Jérusalem té.

³² Pierre ke dèdè ke déh sa, bi dadè nya a dèdè ntibi ang, dèdè do ndokoo la ke dooudjé djo ke arr sa.

³³ Tokou dooudjé djo nèn ao ta kïyè, Pierre pa are Jésus, Ndjè tòdjou tar, to madji ke djèdjè djéh nèn, aredjè nda kei kam mouta, kada mbata loi, kada mbata Moïse, ke kada mbata Élie. Nè ngeré tar ke nè mpa nèn ang.

³⁴ Tokou nè mpa ban mba, ndi ke il dé dibidè, bel dadè tokou dèdè dao mè ndi té ke il.

³⁵ Ndou téh ke mè ndi té ke il pana, Yèn to Ngonem ke mam ndikè nya, woidjé tar la.

³⁶ Tokou ndou pa tar ban, Jésus ke kadèba nai. Dèdè mpa tar ang ndò té ke nou, dèdè mpa dare doou kada né kada ang, né ke dèdè do nèn.

³⁷ Gè té ndò kada, tokou dèdè ndisi ke nange do tokou err té, dooudjé baya baya ingè.

³⁸ Wo, doou kada horo dooudjé té ke baya baya pa ke tarr, Ndjè tòdjou tar, mam ndoudji nya ta ko tar lo ngonem ke dingao, mbata nè nto ngonem ke kadaba.

³⁹ Wo, ndil kada wèè, nè nourouki lé té ndja, ndil yè rè nderèng poumtè téh tè té, ntoudjou singa la toï, ke nè ndiki ta kïyè ang.

⁴⁰ Mam ndoudjou ndjè kao goi tédjé ta toubè, a dèdè dase ang.

⁴¹ Jésus tél tar pana, Dooudjé ke ndjè ko mè té ang, ke ndjè né da ke gatang, ma kisi kesè ndò ban wa ke mem a kenge ang? Oun ngoni, dé sa nèn.

⁴² Tokou nè nao ndé, ndil ke madjang wèè yèè ngeng. A Jésus ndange ndil ke madjang, nare ngon ke dingao isi madji, ntél sa nare bèdjè.

⁴³ Mè dooudjé toï ounda dò biä mbata bo lo Allah. Tokou dèdè toï dedji nya dò né té toï ke Jésus da, nè mpa nare ndjè kao gè tédjé,

⁴⁴ Aridjé tar nèn ao mè mbisè té, mbata dèdè da kare Ngon lo doou dji dooudjé té.

⁴⁵ A dèdè do gel tar nèn ang, mbata yarè kemdè té ta karedè ngerè ang, ke bel dadè ta doudjè mbata tar nèn.

⁴⁶ Maitar ï horodè té, mbata na horodè té boui wota maredjé.

⁴⁷ Tokou Jésus geré kedji ke mèdè té, nè noun ngon kada nilè mbòrè té.

⁴⁸ Nè mpa naredè, Doou ke taa ngon ke ngadji nèn ke rim, taam, doou ke taam, taa nè ke noulam, mbata nè ke nto ngadjiba horosè té toï, nè nto nè ke na boui wota.

⁴⁹ Jean tél tar pana, Ndjè tòdjou tar, djèdjè djo doou kada ke touba ndildjé ke madjang ke ri, djèdjè ngangè mbata nè ndja kedjè ang.

⁵⁰ Jésus pa arè, Egangèdjé ang, mbata nè ke mbetésè ang, na kéh kesè.

⁵¹ Tokou ndò la dé ngosiba ta karè nao dara, Jésus ounda kèmè ta kao Jérusalem té.

⁵² Nè noula ndjè kouladjé dongor kèté. Dèdè dao ntéh mè béh té kada lo Samaritaindjé ta da loou mbata la.

⁵³ A dooudjé ndiki ta tèè ke ròdè té ang, mbata nè nounda kèmè ta kao Jérusalem té.

⁵⁴ Tokou ndjè kao gè tédjé Jacques ke Jean do né nèn, dèdè mpana, Mbaibé Seigneur, i ndikidjè ta doudjou ta kare pourou ï dara dé ta ködè wa?

⁵⁵ Nè ntourou rè ndangedè. Nè mpana, Sésè egeridjé ndil di a ke to mèsè té ang.

⁵⁶ Dèdè dao ke mare béh té.

⁵⁷ Tokou dèdè dao deo bo, doou kada pa are Jésus, Ma ma kao goi té, loou toï ke i ao kendé.

⁵⁸ Jésus pa arè, Taldjé éh ke bwa lodè, ke eldjé ke ao tarr éh ke kei lodè, a Ngon lo doou éh ke loou kada ta koula dè kendé ang.

⁵⁹ Nè mpa nare mare doou. Edé gom té. A nè mpana, Mbaibé Seigneur, arem mao ndoubou bòi dongor baa.

⁶⁰ Jésus pa arè, Are ndjè yodjé doubou yona ndja, a i ao pa tar béh ko lo Allah.

⁶¹ Mare doou pana, Ma ma kao goi té Mbaibé Seigneur, arem nda laphia dooudjé ke isi kei lom dongor baa.

⁶² Jésus pa arè, Doou ke oula dja dò kòsou sounda té ke bo, ke nè nnaa loou ke goukou, nè nto madji mbata béh ko lo Allah ang.