Lugu 6 - Testament ke Siki 1960 (Kabba Laka)

¹ Ndò sabbat té kada, tokou Jésus ndai mè ndoo ndakiri té, ndjè kao gè tédjé tete mare ndakiri ousa, gè té ke dèdè nder ndakiri ke djidè.

² Mare Pharisiendjé pana, Mbata di a sésè edaidjé né ke tar ndedji pana to madji ta da ang ndò sabbat té wa?

³ Jésus tél tar pana, Etouraidjé maketourou té ang wa, né ke David da leo tokou boo dè, nè ke dèdè ke dao sa?

⁴ Tokou nè nao mè kei Allah té, ke nè noun mourou ke ngem dare Allah, nousa ke nè nare dooudjé ke ndja sa tò, mouroun lé ke tar ndedji pana dooudjé ke ndjè kòrdjé kadaba ase ta kousa.

⁵ Nè mpa naredè, Ngon lo doou to to Mbaibé ke ndò sabbat té.

⁶ Mare ndò sabbat té, tokou nè nao mè kei Allah té, nao ntòdjou tar, doou kada éh nou ke dja ke kòl woei mbä.

⁷ Ndjè da maketourou ndedjidjé ke Pharisiendjé daa Jésus nya ta ko tokou nè na kòrou rò too ndò sabbat té, ta kinga tar ke ta toula dè kendé.

⁸ Jésus geré kedji ke mèdè té, nè mpa nare doou ke dja woei mbä, Edé arr nèn. Nè nï tarr, narr nodè té.

⁹ Jésus pa aredè, Mam ndoudjousè, tar ndedji pana to madji ta da madji ndò sabbat té, aséh ta da madjang wa, ta kadji doou aséh ta toï doou wa?

¹⁰ Jésus aadè kada kada toï, nè mpa nare doou nèn, Ndòdjou dji. Nè nda tokou ban ke dja dé madji.

¹¹ Mè ndjè da maketourou ndedjidjé ke Pharisiendjé dousou ke ongou nya, dèdè mpa horodè té dase ta da di wa ke Jésus.

¹² Ndò té ke nèn, Jésus ao dò tokou err té ta doudjou Allah, nè ndoudjou Allah mè tilti toï.

¹³ Tokou loou arè mbä, nè mmar ndjè kao gè tédjé, nè mberedè dòkou gérè djo horodè té, ke nè mmardè ndjè kouladjé.

¹⁴ Nè mmar Simon ke nè nounda ria na Pierre, ke André ngoköè, nè mmar Jacques ke Jean, Philippe ke Barthélemy.

¹⁵ Nè mmar Matthieu ke Thomas ke Jacques, ngon lo Alphée, ke Simon, nè ke mmarè na Zélote.

¹⁶ Nè mmar Jude, ngon lo Jacques, ke Judas Iscariot, nè ke nto ndjè ndoko Jésus.

¹⁷ Nè ndisi kedè nange, narr loou té ke taaté madji ke dooudjé ke ndjè kao gè tédjé baya baya, ke mare dooudjé baya ke ï Judée té ke Jérusalem té toï, ke nange té ke Tyr ke Sidon mbòr man katé té. Dèdè ndé rè té ta ko tar la, ke ta kare nòrou rò too lodè.

¹⁸ Dèdè ke disi ke ongou mbata ndildjé ke madjang ke to mèdè té, dèdè ndé madji.

¹⁹ Dèdè toï ke mbona dao nsange deo ta kòrè, mbata singa téh rè té ke da ròdè toï madji.

²⁰ Nè ntourou kèmè ke rò ndjè kao gè tédjé, mpana, Madji éh kesè, sésè ke etoidjé dangetédjé, mbata béh kö lo Allah to mbata losè.

²¹ Madji éh kesè, sésè ke boo dasè bokonè, mbata mèsè a ndan. Madji éh kesè, sésè ke nòidjé bokonè, mbata sésè a koukidjé.

²² Madji éh kesè tokou dooudjé mbetésè, ke dèdè ntoubasè ke ntadjisè, ke dèdè ntoura risè madjang mbata tar lo Ngon lo doou.

²³ Ekoukidjé ndò té ke nou, ekoudjaidjé ke rònèl mbata, woidjé, né kouka losè to nya dara, mbata bòdèdè da tokou ban ke prophètedjé to.

²⁴ Ongou a dasè, sésè ke isidjé ke né kinga nya, mbata sésè ingaidjé mè madji losè mba nga.

²⁵ Ongou a dasè, sésè ke ousaidjé mèsè ndan bokonè, mbata boo a dasè. Ongou a dasè, sésè ke koukidjé bokonè, mbata sésè a nòidjé ke ongou ke man kemsè.

²⁶ Ongou a dasè tokou dooudjé toï pa tar losè to ke madji, mbata bòdèdè da tokou ban ke prophètedjé ke ndjè ngem leo to.

²⁷ A ma mpa maresè, sésè ke woidjé tar lom, ndikidjé ndjè kembaadjé losè, edaidjé madji ke ndjè ke mbetésè.

²⁸ Epaidjé tar ke madji dòdè té ke ntadjisè. Edoudjidjé Allah mbata dèdè ke ndasè ke singa.

²⁹ Doou ke ounda kambòri, etourou marè arè to. Nè ke ntaa koubou loi ke bo, ïya mare koubou loi arè to.

³⁰ Are dooudjé kada kada toï né ke ndoudji, doou ke taa né loi, edoudjè ta karè ntél né nari ang.

³¹ Né ke sésè ndikidjé ta kare dooudjé da kesè, edaidjé kedè tokou ban to.

³² Tokou sésè ndikidjé dèdè ke ndikisè, woio losè to deo di té wa? Mbata dooudjé ke ndjè né da ke madjang ndiki dèdè ke ndikidè to.

³³ Tokou sésè edaidjé madji ke dèdè ke nda madji kesè, woio losè to deo di té wa? Mbata dooudjé ke ndjè né da ke madjang da tokou ban to.

³⁴ Tokou sésè aridjé né dèdè ke sésè ngebidjé mbata da tél ke mare né karesè to, woio losè to deo di té wa? Dooudjé ke ndjè né da ke madjang are né ndjè né da ke madjang ta kinga né lodè marè tò.

³⁵ Ndikidjé ndjè kembaadjé losè, edaidjé madji, aridjé né, ngebidjé ta kinga marè goukou ang, tokou ban kouka losè a to nya, ke sésè a kisidjé ngandjé lo nè ke nto nouta toï, mbata nè nda mè madji ke dèdè ke ndiki ta da woio ang, ke dèdè ke nto dooudjé ke madjang.

³⁶ Edaidjé mè madji deo kadaba tokou Bòsésè da mè madji.

³⁷ Egangidjé saria ang, ke da gange saria dèsè té ang to. Etoulaidjé dò doou ang, ke da toula dòsè ang to. Ïyaidjé tar, ke da kïya tar losè tò.

³⁸ Aridjé né, ke da karesè né tò, dèdè da kòdjou karesè madji, dèdè da mbousou, dèdè da yèkè ke a kongou nange, tokou ban dèdè da karesè né dò bingisè té. Mbata da kòdjousè deo kadaba tokou marè ke òdjidjédè tò.

³⁹ Nè mpa tar gousou naredè to, Doou ke ndjè kem to ase tòdjou deo mare doou ke ndjè kem to wa? Dèdè djokem da koso mè bwa té ang wa?

⁴⁰ Ndjè kao go doou té a kouta ndjè tòdjè tar ang, a nè ke no tar madji toï, na dé tokou doou ke ndjè tòdjè tar.

⁴¹ Mbata di a i wo ngoi kake ke to kem ngokoi té, a i wo doukourou kake ke to kemi té ndja ang wa?

⁴² Aséh i a pa kare ngokoi tokou di wa, Ngoköm, arem mòrou ngoi kake ke to kemi té, tokou i wo doukourou kake ke to kemi té ndja ang wa? I ndjè ngem, òrou doukourou kake ke to kemi té ndja dongor, tokou ban i a ko madji ta kòrou ngoi kake ke to kem ngoköi té.

⁴³ Mbata kake ke madji an kandé ke madjang ang, aséh kake ke toudjou mbö an kandé ke madji ang tò.

⁴⁴ Mbata da geré kake kada kada toï ke kandè ndja. Mbata doudja kandé toungoutisa konn té ang, aséh da ndè kandé ndouou kourgongoli té ang.

⁴⁵ Doou ke madji òrou tar ke madji ke né ke madji ke to mèa té. Doou ke madjang òrou tar ke madjang ke né ke madjang ke to mèa té, mbata tè pa tar né ke dousou mèa.

⁴⁶ Mbata di a ebaremdjé Mbaibé Seigneur, Mbaibé Seigneur, a edaidjé tokou ndoum pa ang wa?

⁴⁷ Dooudjé kada kada toï ke dé rom té, ke wo tar lom, ke dèdè ngem, ma ma tòdjousè dèdè nto tokou di wa.

⁴⁸ Dèdè nto tokou doou ke ao da kei. Nè nourou bwa nare ourou, nè nda gòl kei la dò err té. Tokou man oula nya, man oula ko kei té la, ase ta yè kei ang, mbata nda kei madji dò err té.

⁴⁹ Nè ke no tar ke nè ngem ang, nè nto tokou doou ke da kei la dò nange té ba, tokou man oula ko kei té nya, kei oso loshénè loshénè, ke toudjou lo kei nèn dé madjang nya.