Lugu 4 - Testament ke Siki 1960 (Kabba Laka)

¹ Tokou ban Jésus ï man Jourdain té tél, ke mèa dousou ke Ndil ke madji toï.

² Ndil ao sa mè kòr té, Satan nèè ndò doso. Ndò té ke nou, Jésus ön mourou ang, tokou ndò nèn ndai mba boo dè.

³ Satan pa arè, Tokou i to Ngon lo Allah, epa are err nèn ta tél mourou.

⁴ Jésus tél pa arè, Maketourou lo Allah pana, To tar lo doou ta kisi ke tébe ngä mourou ke kadè ang.

⁵ Satan al sa tarr, nè ntòdjè béh ko ke nange nèn toï lé té ndja.

⁶ Satan pa arè, Ma ma kari singa né nèn toï ke ndokoo lodè to, mbata darem mbä, ke to tar lom ta kare doou ke mem ndiki.

⁷ Tokou ban, tokou i oso no gòlem té, epitim, né nèn toï a to to ngäi.

⁸ Jésus tél pa arè, Maketoutou lo Allah pana, Ase kare i piti Mbaibé Allah loi, ke ta da sa kadaba.

⁹ Satan ao sa Jérusalem té, nè narè nisi dò tokou kei Allah té ke ndeo, nè mpa narè, Tokou i to Ngon lo Allah, koudja ourou nange ke loou té ke nèn.

¹⁰ Mbata maketourou lo Allah pana, Nè na kare angedjé la ta ngemi,

¹¹ Ke, Dèdè da laai ke djidè, na dòmadjang a gòli a kòsou err té.

¹² Jésus tél pa arè, Maketourou lo Allah pana, Ase kare i naa Mbaibé Allah loi ang.

¹³ Tokou Satan ïya tar nèè toï mbä, nè nïya Jésus sar mare ndò.

¹⁴ Jésus tél Galilée té ke singa lo Ndil ndja. Tar la bar do nange té ke ngosiba ke nou toï.

¹⁵ Nè ntòdjou tar mè kei Allah té lodè, dooudjé toï pitè.

¹⁶ Nè ndé Nazareth té, béh ke nè ntòkou kendé. Nè nao kei Allah té ke ndò sabbat, deo kadaba tokou nè nda ke ndò ke ndò. Nè nï tarr ta toura maketoutou.

¹⁷ Dèdè darè maketourou lo prophète Ésaïe. Nè nòrou maketourou, nè ninga loou ke pana,

¹⁸ Ndil lo Mbaibé Seigneur to dòm té, mbata nè nila oubou dòm té ta pa tar ke madji kare dangetédjé. Nè noulam ta pa kare beredjé tar ta karedè téh daka dòdè to lél pè, ke ta kare ndjè kem tòdjé wo loou, ke ta kòrou dooudjé djidè té ke dwaadè ngeng.

¹⁹ Ke ta tòdjou bal kinga mè madji lo Mbaibé Seigneur.

²⁰ Nè ndebe maketourou naaté, ntél né nare ngonlokisi, nè nisi nange. Kem dooudjé toï ke isi kei Allah té èè nya.

²¹ Nè nounkoutou pa karedè, Bokonè tar maketourou lo Allah nèn dé to tar ke tokoro mbisè té mbä.

²² Dooudjé toï pa tar la to ke madji, mèdè edji nya mbata tar mè madji ke téh tè té. Dèdè mpana, Yèn to ngon lo Joseph ang wa?

²³ Nè mpa naredè, Tokoro, sésè a paidjé tar gousou nèn arem, Ndjè kouma adji ròi ndja. Né toï ke djèdjè djo i da Capernaüm té, eda né ban ke béh loi nèn ndja to.

²⁴ Nè mpana, Tokoro ma mpa maresè, dooudjé ndiki go tar lo prophète mè béh té la ndja kada ang.

²⁵ Ma mpa maresè ke tokoro, dènè ndoubadjé baya éh ke Israël ndò tè lo Élie. Ndò ke dara outou nderèng bal mouta ke nnè misä, ndò ke boo biriri nya ö do nange té toï.

²⁶ Ke doula Élie rò maredjé horodè té kada ang, bè doulè rò dènè ndouba kadaba ke béh Sarepta té, nange té ke Sidon.

²⁷ Ndjè bandjidjé baya éh ke Israël ndò té lo prophète Élisée, kada horodè té dé madji ang bè to Naaman, doou ke béh Syrie té kadaba.

²⁸ Tokou dooudjé wo tar nèn, dèdè toï ke disi mè kei Allah té, ongou ödè nya.

²⁹ Dèdè dï dilè daka giri béh té, dao sa dò err té ke tarr ke nda béh lodè dè té, mbata dèdè ndiki ta koutè kila nange.

³⁰ A Jésus ndai horodè té, nao deo la.

³¹ Nè nao Capernaüm té, béh kada nange té ke Galilée. Nè nao ntòdjoudè tar ndò sabbat té.

³² Mèdè ounda dò biä mbata tar ke nè ntòdjou, mbata nè mpa tar ke singa.

³³ Doou kada éh mè kei Allah té ke ndil ke madjang lo Satan to mèa té. Nè mpa ke tarr,

³⁴ Ïyadjè, di a to horodjè té, i ke djèdjè wa, Jésus ke Nazareth? I dé ta toudjoudjè wa? Mam ngeré i to na wa, i to kada ke madji toï lo Allah.

³⁵ Jésus ndangè pana, Eo, etéh daka mè doou té nèn. Tokou ndil ke madjang ila doou nèn nange horodè té, nè ntéh daka mèa té, nda sa madjang ang.

³⁶ Mèdè toï ounda dò biä, dèdè mpa horodè té, Tar nèn to di wa? Mbata nè ndange ndildjé ke madjang ke tè ke singa, ke dèdè ntéh daka.

³⁷ Tar la bar dò nange té ke ngosiba ke nou toï.

³⁸ Nè nï ntéh kei Allah té ke daka, nao kei té lo Simon. Moum Simondjè to ke rò too ke rè nounga nya. Dèdè ndoudjou Jésus mbata la.

³⁹ Nè narr mbòrè té, nè ndange rò too ke rè dé madji. Loshénè loshénè nè nï tarr nda kedè.

⁴⁰ Tokou kade dé ngosi ta kwoei, dooudjé toï ke isi ke ndjè rò toodjé dang dang, ndé kedè rè té. Nè nila dja dòdè té kada kada toï, nare ròdè dé madji.

⁴¹ Ndildjé ke madjang téh mè maredjé té ke baya to, mpana, I to Ngon lo Allah. Nè ndangedè, nè naredè ta pa tar ang mbata dèdè ngeré nè nto Christ ndja.

⁴² Tokou loou arè mbä, nè ntéh nao mare loou té mè mou té. Dooudjé sangè, ndé rè té, dèdè ndiki ta kare nè nïyadè ang.

⁴³ A nè mpa naredè, Ma mase pa tar ke madji lo béh kö lo Allah ke mare béh té tò, mbata doulam mbata tar ban.

⁴⁴ Nè nao mpa tar mè kei Allah té ke Galilée.