Ephésiendjé 3 - Testament ke Siki 1960 (Kabba Laka)

¹ Mbata tar nèn, ma Paul, ndjè kei koula lo Christ Jésus mbata sè Gentildjé.

² Ma medji sésè woidjé tar koula lo tòkou mè madji ke Allah arem mbata losè.

³ Deo di a ntòdjou né ke yarè darem, tokou mam nda mè maketourou té ase.

⁴ Tokou sésè etouraidjé yèn, sésè a geridjé kemkarè lom mè né té ke yarè lo Christ.

⁵ Ke dèdè ntòdjou nèn ngandjé lo gel dooudjé ke leo ang, tokou ntòdjou ndjè kouladjé ke prophètedjé la ke madji loshénè, deo té lo Ndil ndja.

⁶ Yèn pana deo di a Gentildjé to ndjè kwaa né ndouba naaté kedjè, barkem da rò kadaba, ke dinga né ke madji mè Christ Jésus té ke Allah to deo té lo tar ke madji.

⁷ Mam ndé to ndjè tòdjou tar lo tar ke madji nèn, deo té lo né kare ba lo tòkou mè madji lo Allah ke darem deo koula té ke singa la.

⁸ Darem tòkou mè madji nèn, ma ke nto ngadji ngadji horo ndjè ko mè tédjé toï, ta pa kare Gentildjé né kinga lo Christ ke ase geré gelè ang,

⁹ Ke ta kare dooudjé toï wo di a to gel tar ke yarè bal baya mè Allah té, nè ke nda né toï,

¹⁰ Baa ta kare ndjè kö loou, ke ndjè singa mongoudjé ke loou té ke dara, ngeré bashénè kemkarè lo Allah dang dang, deo té lo kei Allah.

¹¹ Yèn to deo kadaba tokou tar ke nè nedji ta da leo, ke nè nda mè Christ Jésus té Mbaibé lodjè.

¹² Deo ko mè té sa, djèdjè djéh ke bel ang, ke mèdjè oso pon ta téh no Allah té.

¹³ Tokou ban mam ndoudjousè ta kare mèsè enge ang mbata né ongou ke dam mbata losè, yèn to to né piti losè.

¹⁴ Mbata tar nèn ma mongou mekedjé gòlem no gòl Bòi Allah té,

¹⁵ Mbata noudjoudjé toï ke dara ke nange nèn dinga ridè deo té la.

¹⁶ Deo né kinga ndokoo té la nè naresè baa ta kare ngengidjé ke singa, deo té lo Ndil la ke doou ke mè té,

¹⁷ Baa ta kare Christ isi mèsè té deo ko mè té, mbata tokou sésè ouridjé mè ndiki té tokou kake ke ouba nange ke ngirè,

¹⁸ Sésè éhdjé ke singa ta geré deo kadaba ke ndjè ko mè tédjé toï, di wa to to taaté la, ke ngal la, ke ndeo la, ke kourou la,

¹⁹ Ke ta geré ndiki lo Christ ke ndai kemkarè toï, baa ta kare sésè edousidjé ke né toï lo Allah.

²⁰ Nè ke nase da nya wota né toï ke djèdjè ndoudjou aséh djedji, deo singa té ke da koula mèdjè té.

²¹ Nè néh ke ndokoo mè kei Allah té, ke mè Christ Jésus té horo gel dooudjé té toï mè bal ke bal. Amen.