Apocalypse 22 - Testament ke Siki 1960 (Kabba Laka)

¹ Gè té nèn nè ntòdjoum ba man tébe ke ndokoo tokou cristal, ke téh ngèndé kö béh té lo Allah ke lo Ngon bati.

² Noula dana deo béh té ndja, ke mbòr ba té er té djokem, kake tébe to to ke an kandè ke dang dang dòkou gérè djo, nan kandè ke nnè kada kada toï, ke kam kake nèn to ta kòrou rò too lo gel dooudjé.

³ Né tadji a to marè ang nga, a ngèndé ko béh lo Allah ke Ngon bati a to mè té, ke nganlokisidjé la a walè.

⁴ Dèdè da ko kèmè, ke ria a to do natenòdè té.

⁵ Ke til a to marè ang nga, dèdè ndiki pourou lampe aséh kade ang, mbata Mbaibé Allah a to lokarè lodè, ke dèdè da ko béh ke ndò ke ndò.

⁶ Ke nè mpa narem, Tar nèn to ase ta ko ke to tokoro. Ke Mbaibé ke to Allah lo ndildjé lo prophètedjé oula ange la ta tòdjou nganlokisidjé la né ke nata téh loshénè.

⁷ Ke wo, Mam ndé loshénè. Madji éh ke nè ke ngem tar ke Allah oula mè maketourou té nèn.

⁸ Ma Jean, mam nto nè ke no nédjé nèn ke mbia ke kèmè. Ke tokou ma modè ke mbim ke modè ke kem, ma moso nange nò gòl ange té ta walè, nè ke ntòdjoumdè.

⁹ A nè mpa narem, Eda ban ang. Mam nto ngonlokisi mari ke ngaköi prophètedjé, ke naaté ke dèdè ke ngem tar ke to mè maketourou té nèn. Ewal Allah.

¹⁰ Nè mpa narem, Etò tar lo Allah ke to mè maketourou té nèn ang, mbata ndò dé ngosiba.

¹¹ Ase kare ndjè né da ke madjang da madjang bai, ke nè ke nto yèdo ase kare nisi to yèdo bai, ke nè ke gaté gaté ase kare nda gaté gaté bai, ke nè ke nto madji toï ase kare nisi madji toï bai.

¹² Wo, mam ndé loshénè, ke mam ndé ke kouka lom, ta tél kouka kare dooudjé kada kada toï mbata né ke dèdè nda mbä.

¹³ Mam nto Alpha ke Oméga, yéh ke dongor ke yéh ke télè, yéh ke kounkotè ke yéh ke dòbon.

¹⁴ Madji éh ke dèdè ke ntoko koubou lodè, baa ta kare dèdè dase kao kake tébe té, ke ta kare dase kande mè béh té deo tadeo té.

¹⁵ Bisidjé ke dooudjé ke ndjè né ndöndjé, ke ndjè kaiyadjé, ke ndjè tòl dooudjé, ke ndjè polo kòrdjé, ke dèdè kada kada toï ke ndiki kere ngem ke dere ngem, dèdè déh daka.

¹⁶ Ma Jésus, moula ange lom ròsè té ke tar nadji nèn mbata kei Allah. Mam nto ngira ke gel David, ndètélendè ke sindò ke ndokoo nya.

¹⁷ Ndil ndja ke dènè ke siki mpana, Edé. Ase kare nè ke no mpa, Edé. Ke ase kare nè ke kounda man öè dé ase kare nè ke ndiki ntaa man tébe ntaa ba.

¹⁸ Mam ndedji dooudjé kada kada toï ke wo tar ke Allah pa mè maketourou té nèn, tokou mare doou kada ounda mare tar kendé, Allah a kounda dè té né ke are doo ke maketourou nèn tòdjou.

¹⁹ Ke tokou mare kada òrou mare tar ke maketourou té ke dang, tar ke Allah pa nèn, Allah a kòrou né ke to mbata la ke kake tébe té ke dang, ke mè béh té ke madji toï, né ke ntòdjou mè maketourou té nèn.

²⁰ Nè ke mpa tar nadji nédjé nèn mpana, Tokoro, mam ndé loshénè. Amen. Edé, Mbaibé Jésus.

²¹ Tòkou mè madji lo Mbaibé Jésus éh ke ndjè ko mè tédjé toï. Amen.